Nanabosho is fed Meat from the Back of a Woman
Aaniish, a’yiindaawag imaa anishinaabeg, Nenabosho oniijaanisa niizhiwa wiiwan gaye.
Mii sa imaa babiboonishiwaad, aaniish inaa, nawaj igo gaawiin gegoo ona’enimosiin.
Aaniish, mii sa zhigwa ji-biboonini, mii sa gaawiin wiikaa naa obiidoosiin gegoo.
Aaniish mii sa bakadewaad.
Ningoding igo, babaamosed, anishinaabe ezhi-odisaad; niizhiwa abinoojiiya abiwan iiniw ininiwan.
Aaniish, mii sa ekidonid: “Aaniin dash naa, giige-aasiwang a’aw gipiiwideminaan,” odinaan wiiwan.
Aaniish, shkwaandeng naasamabiwan iiniw ikwewan.
Ezhi-oo-nagoodakikwenid.
Aaniish, ezhi-giiniboodoonid omookomaanini, mashkimodekewan iiniw wiiwini.
Mii sa gaa-giizhiboodoonid i’iw omookomaanini.
Obiminanaadabiidawaanini iiniw wiiwini.
Ezhi-gidashkaakonamawaad iiniw wiiwan odanikamaanini,(1) ezhi-midawaganebinaad; ezhi-pezhishwaad* nawaawigan; mii sa ezhi-pakweninweshwaad; gaawiin ganage maadabisiiwan iiniw ikwewan.
Mii sa gaa-izhi-pishagaawiganeshwaad iiniw wiiwini, ezhi-poodaakwewaanid i’imaa akikong.
Akakanzhe ezhi-oodaapinaminid, ezhi-sinigonnamawaanid i’imaa obikwanaaning.
Ezhi-sagaakowaad miinawaa.
Mii sa gaawiin ganage gii-maadabisiiwan iiniw ikwewan.
Zhigwa giizhisekwewan, “Aaniish, mii sa iw ezhi-wiisiniiyamban,” inaa Nenabosho.
Mii dash geget ezhi-wiisinid, pane go gaa-niishkininodenig mii sa ezhi-wiisinid.
Gomaa minik shkwanjige Nenabosho.
“Mii iw izhi-kiiwewida giniijaanisag naa minik eshkwanjigeyan.”
Mii sa zhigwa wii-giiwe.
“Awegwenigish?” gii-inendam.
Mii nangwana omashkoosoon gaa-odisaad.
Aaniish mii sa zhigwa gii-kikenimaad eyaawinid.
Zhigwa wii-giiwe, ezhi-aabawaad i’iw ogiizhoodebizona i’iw waaboozowayaana; ezhi-shengwaandaginaad i’iw ogiizhoodewona ezhi-saaga’ang.
Gomaapii eni-ayaad, ozaagijinisha’ogoo i’iw abinoojiinya.
Mii dash ezhi-piibaagid “Aay!” ikido; “gii-waniike gigiizhoode’onag!”
“Nindooshimag oga-biinaawa,” odinaa.
Mii sa geget waabamimaawaad abinid.
“Waasa go ojiwebinamawik.
Gaawiin giiga-pasemigosiiwa.”
Mii dash geget waasa go waa-onji-webinamaago i’iw abinoojiiga (abinoojiinya?).
“Ish!” odinaa; “gaawonaagonewebinaawaag,” odinaa.
“Bi-miishiyokiko!” odinaa.
Aaniish mii sa geget ewishimiinigod, mii dash enishimaajiiba’idinid.
Aaniish, ogii-inaa aw awedi weniijaanisid: “Waasa go onji-webinamawik, gaawiin giiga-basemigosiiwaa.”
Mii dash geget aanawi-doodaminid, aaniish ogii-onjii-aanidish.
Mii dash gaa-inaad apii gaa-miinigod: “Ambe sa noo, waabang koosiwaa dabiizhaa,” ogii-inaa.
Mii sa gaa-izhi-kiiweba’idiwaad iigiw gwiiwisensag, ezhi-wiindamawaawaad oniigi’igowaa ekidonid Nenaboshoowan: “Gebakademwaasa giinawaa!” odinaa i’iw oniigii’igowa iigiw gwiiwisensag.
Mii sa ekidod inini: “Aanishinaa, ninga-izhaa,” ikido.
Zhigwa sa ani-dagwishin endaawaad.
Aaniish obiidawaa oniijaanisa i’iw gaa-ashaminid.
Zhigwa oganoonaan iiniw wiiwan: “Gaawiin sa naa wiikaa ji-omashkimodekeyan?” odinaan iiniw wiiwan.
“Indashkaa miinawaa awiya gii-waabamaagwen i’iw ezhichigenid,” odigoon iiniw wiiwan.
“Awawa izhichigen!” odinaan.
Mii sa geget ezhi-mashkimodeked wayaabaninig a’aw ikwe.
Aaniish abi a’aw Nenabosho, obii’aan.
Zhigwa sa bi-giigidoowa oniijaanisa: “Nashke giniin, zhigwa biiwide!” odigoo.
Aaniish mii sa ezhi-piindigaagowaad iiniw biiwiden.
Mii sa namadabinid.
“Wegonena gegii-ge’ang a’aw biiwide?” odinaan iiniw wiiwan.
“Wegonen dash i’iw eyaayan?” odigoon iiniw wiiwan.
Aaniish maajiboodoon omookomaan.
Zhoozhamiingweniwan obiiwideman.
Mii zhigwa gii-oo-nagoodakikwed.
Aaniish zhigwa ogiigidiz gaa-gonamawaan odanikamaanini iiniw wiiwan, ezhi-nitaawaganebinaad iiniw wiiwan; ezhi-pezhishwaad imaa bikwanaaning.
Aaniish inaa, “Igoo!” odigoon.
Zhooshamiingweniwan iiniw obiiwideman.
Daga shkomaa, Nenabosho,” odigoon.
Aaniish, mii sa ezhi-ando-damaagod i’iw mookomaan, mii dash egod: “Daga, Nenabosho!” odigoon.
“Agashkomaa, Nenabosho!” odigoon.
Ezhi-miinaad i’iw mookomaan, ezhi-peshaawaganeshomind iiniw wiiwan, mii sa gaawiin ganage maadabisiiwan.
Bakwadishomind iiniw wiininoon.
Zhigwa ogii-pakwadishwaanini, “Aaw, Nenabosho, mii iw ezhi-jiibaakwen,” odigoon.
Ezhi-odaapinaminid i’iw akakanzhe ezhi-sinagwanaminid i’imaa bikwanaaning iiniw wiiwan.
Zhigwa sa basigwiiwan, “Mii iw, Nenabosho, da-izhi-wiisiniwag giniijaanisag,” odigoowaan.
Mii sa geget apane mii sa gaa-ani-maajaanid iiniw biiwidemiwaan.
Mii sa zhigwa wiisiniwaad.
Mii sa imaa babiboonishiwaad, aaniish inaa, nawaj igo gaawiin gegoo ona’enimosiin.
Aaniish, mii sa zhigwa ji-biboonini, mii sa gaawiin wiikaa naa obiidoosiin gegoo.
Aaniish mii sa bakadewaad.
Ningoding igo, babaamosed, anishinaabe ezhi-odisaad; niizhiwa abinoojiiya abiwan iiniw ininiwan.
Aaniish, mii sa ekidonid: “Aaniin dash naa, giige-aasiwang a’aw gipiiwideminaan,” odinaan wiiwan.
Aaniish, shkwaandeng naasamabiwan iiniw ikwewan.
Ezhi-oo-nagoodakikwenid.
Aaniish, ezhi-giiniboodoonid omookomaanini, mashkimodekewan iiniw wiiwini.
Mii sa gaa-giizhiboodoonid i’iw omookomaanini.
Obiminanaadabiidawaanini iiniw wiiwini.
Ezhi-gidashkaakonamawaad iiniw wiiwan odanikamaanini,(1) ezhi-midawaganebinaad; ezhi-pezhishwaad* nawaawigan; mii sa ezhi-pakweninweshwaad; gaawiin ganage maadabisiiwan iiniw ikwewan.
Mii sa gaa-izhi-pishagaawiganeshwaad iiniw wiiwini, ezhi-poodaakwewaanid i’imaa akikong.
Akakanzhe ezhi-oodaapinaminid, ezhi-sinigonnamawaanid i’imaa obikwanaaning.
Ezhi-sagaakowaad miinawaa.
Mii sa gaawiin ganage gii-maadabisiiwan iiniw ikwewan.
Zhigwa giizhisekwewan, “Aaniish, mii sa iw ezhi-wiisiniiyamban,” inaa Nenabosho.
Mii dash geget ezhi-wiisinid, pane go gaa-niishkininodenig mii sa ezhi-wiisinid.
Gomaa minik shkwanjige Nenabosho.
“Mii iw izhi-kiiwewida giniijaanisag naa minik eshkwanjigeyan.”
Mii sa zhigwa wii-giiwe.
“Awegwenigish?” gii-inendam.
Mii nangwana omashkoosoon gaa-odisaad.
Aaniish mii sa zhigwa gii-kikenimaad eyaawinid.
Zhigwa wii-giiwe, ezhi-aabawaad i’iw ogiizhoodebizona i’iw waaboozowayaana; ezhi-shengwaandaginaad i’iw ogiizhoodewona ezhi-saaga’ang.
Gomaapii eni-ayaad, ozaagijinisha’ogoo i’iw abinoojiinya.
Mii dash ezhi-piibaagid “Aay!” ikido; “gii-waniike gigiizhoode’onag!”
“Nindooshimag oga-biinaawa,” odinaa.
Mii sa geget waabamimaawaad abinid.
“Waasa go ojiwebinamawik.
Gaawiin giiga-pasemigosiiwa.”
Mii dash geget waasa go waa-onji-webinamaago i’iw abinoojiiga (abinoojiinya?).
“Ish!” odinaa; “gaawonaagonewebinaawaag,” odinaa.
“Bi-miishiyokiko!” odinaa.
Aaniish mii sa geget ewishimiinigod, mii dash enishimaajiiba’idinid.
Aaniish, ogii-inaa aw awedi weniijaanisid: “Waasa go onji-webinamawik, gaawiin giiga-basemigosiiwaa.”
Mii dash geget aanawi-doodaminid, aaniish ogii-onjii-aanidish.
Mii dash gaa-inaad apii gaa-miinigod: “Ambe sa noo, waabang koosiwaa dabiizhaa,” ogii-inaa.
Mii sa gaa-izhi-kiiweba’idiwaad iigiw gwiiwisensag, ezhi-wiindamawaawaad oniigi’igowaa ekidonid Nenaboshoowan: “Gebakademwaasa giinawaa!” odinaa i’iw oniigii’igowa iigiw gwiiwisensag.
Mii sa ekidod inini: “Aanishinaa, ninga-izhaa,” ikido.
Zhigwa sa ani-dagwishin endaawaad.
Aaniish obiidawaa oniijaanisa i’iw gaa-ashaminid.
Zhigwa oganoonaan iiniw wiiwan: “Gaawiin sa naa wiikaa ji-omashkimodekeyan?” odinaan iiniw wiiwan.
“Indashkaa miinawaa awiya gii-waabamaagwen i’iw ezhichigenid,” odigoon iiniw wiiwan.
“Awawa izhichigen!” odinaan.
Mii sa geget ezhi-mashkimodeked wayaabaninig a’aw ikwe.
Aaniish abi a’aw Nenabosho, obii’aan.
Zhigwa sa bi-giigidoowa oniijaanisa: “Nashke giniin, zhigwa biiwide!” odigoo.
Aaniish mii sa ezhi-piindigaagowaad iiniw biiwiden.
Mii sa namadabinid.
“Wegonena gegii-ge’ang a’aw biiwide?” odinaan iiniw wiiwan.
“Wegonen dash i’iw eyaayan?” odigoon iiniw wiiwan.
Aaniish maajiboodoon omookomaan.
Zhoozhamiingweniwan obiiwideman.
Mii zhigwa gii-oo-nagoodakikwed.
Aaniish zhigwa ogiigidiz gaa-gonamawaan odanikamaanini iiniw wiiwan, ezhi-nitaawaganebinaad iiniw wiiwan; ezhi-pezhishwaad imaa bikwanaaning.
Aaniish inaa, “Igoo!” odigoon.
Zhooshamiingweniwan iiniw obiiwideman.
Daga shkomaa, Nenabosho,” odigoon.
Aaniish, mii sa ezhi-ando-damaagod i’iw mookomaan, mii dash egod: “Daga, Nenabosho!” odigoon.
“Agashkomaa, Nenabosho!” odigoon.
Ezhi-miinaad i’iw mookomaan, ezhi-peshaawaganeshomind iiniw wiiwan, mii sa gaawiin ganage maadabisiiwan.
Bakwadishomind iiniw wiininoon.
Zhigwa ogii-pakwadishwaanini, “Aaw, Nenabosho, mii iw ezhi-jiibaakwen,” odigoon.
Ezhi-odaapinaminid i’iw akakanzhe ezhi-sinagwanaminid i’imaa bikwanaaning iiniw wiiwan.
Zhigwa sa basigwiiwan, “Mii iw, Nenabosho, da-izhi-wiisiniwag giniijaanisag,” odigoowaan.
Mii sa geget apane mii sa gaa-ani-maajaanid iiniw biiwidemiwaan.
Mii sa zhigwa wiisiniwaad.