Gii-gimoodid ishkode Nenabosho / Nenabosho Steals Fire
Aaniish mii sa iw zhigwa gii-ntaawginaad, gii-bi-kognaad wa mindimooyenh.
Mii sa iw gmaapiich gii-naan niwi ookmisan: “Gaawiin na ngoji anishinaabeg gi-gkenmaasiig ji-yaawaad?”
“Enh,” gii-igoon niwi ookmisan. “Oodi gaami-gchigami yaawag giwi anishinaabeg.”
“Gaa na gnage odahaaziinaawaadig wi shkode?”
“Enh,” gii-igoon niwi ookmisan; “Geget odahaanaawaa wi shkode.”
Oodi dash gii-inaan niwi ookmisan: “Ambe sa naa, nga-naazkaan iw shkode,” gii-naan ookmisan.
Oodi dash gii-igoon niwi ookmisan: “Gaawiin gdaa-gshkitoosiin.
Geget, aapji weweni wi e-kwaamdamwaad oodi wi endaawaad,
Kiwenzii maa yaa.
Mii go pane enso-giizhgag sabiin zhi’aad.
Gaawii wiikaa ngoji zhaasii, mii go pane maa biindig yaad.
Niizhwag dash iw odaanisag, mii eta pane gwajing eyaajig.”
Ow dash ogii-naan niwi ookomisan: “Maanoo nga-zhaa,” gii-naan niwi ookomisan.
“Nahaaw dash,” gii-igoon niwi ookomisan.
Aaniish mii sa gmaapiich gaa-kidod: “Ambe sa naa ji-gbading ow gichigami, wiigwaasabakwaang da-wii-piitadin ow gichigami.”
Mii sa geget gaa-zhiwebdinig wi sa gaa-kidod.
“Ow dash nga-zhinaagos,” gii-kido; “ndawaach nga-waaboozoonsiw. Waaboozoong nga-zhinaagos”
Aaniish mii sa geget gaa-zhinaagozid.
Mii sa zhigwa gii-maajiikowad.
Mii sa geget gaawiin gii-dwaashizii.
Aaniish mii sa gii-gkenmaan imaa yaanid wi Anishinaabe.
Mii dash gaa-zhi-dgoshing imaa wenda’ibiinid, ow dash gii-nendam: “Ambegish sa bi-nbi-naadid aw kwe,” gii-nendam.
Ow dash gii-zhichge imaa waa-gwaaba’iminid wi nbi,
mii dash gaa-zhi-gwaaweb’ogod wi gchi-gami mii imaa gii-titibaweba’agod mii imaa niwi kwewan ge-nji-binaad’abiinid.
Ow dash gii-kido: “Aabdeg sa naa gnimaa nga-waawnenmig.”
Aaniish mii sa kawaabmaad ji-bi-naadoobiinid.
Geget gii-waabmaan biidaasmosenid.
Mii dash zhigwa imaa dgoshinoon imaa sa yaad, zhigwa gii-gwaaba’biinid.
Gaa-izhi-miikwaawaabmigod mii sa gaa-bi-zhi-debibinigod
Mii dash wi gaa-zhi-siikoobiignigod, gaa-bengwaad, gaa-zhi-giiwewnigod oodi gaa-zhi-biindoomawind iw wiiyaw.
Mii sa gaa-zhi-biindganigod geget gii-waabmaan kiwenziiyan nmadbinid.
Geget asabkewan.
Ow dash gii-naan wa kwe niwi misenyan: “Nashke niin,” ogii-naan giimooch niwi misenyan.
“Nashke niin wa gaa-mkawag, waaboozoons.
Ambe eta waawninaagzi wa waaboozoons!
Ambe sa naa gegiin waawnenim n-misenh wa sa waaboozoons.”
Ow dash gii-igoon niwi misenyan: “Ga-nchii’gonaa koosinaa maanda nji,” ogii-igoon niwi misenyan;
giimooj dash gii-igoon niwi misenyan.
Mii dash wi gaa-zhi-ndobagwid gaa-zhi-bgidinigod imaa jiigi-shkode wii-baasigwad.
Mii dash wi baap’aad giwi kwewag waawnenmaawaad niwi waaboozoonsan.
Ezhi-gkenmigowaad niwi ooswaan. “Gdoo-mbiigizim,” gii-igoowaan niwi ooswaan.
Ow dash gii-naawaan niwi ooswaan: “Nashke maaba,” gii-naawaan.
“Nashke maaba waaboozoons.”
“She!” gii-igoowaan niwi ooswaan.
“Gaawiin na kii-noondziim giwi manidoog wi gii-niigi’aad?
Gaa na mii wa bezhig aawsiidog. Neyaab awi-asig,” gii-igoowaan niwi ooswaan.
“Geget sa gii-giibaadzim wi sa gii-daapneg.”
Ow dash gii-kido wa kwe: “Eta gsha n-waawnenmaa wa sa waaboozoons.”
Ow dash gii-naan niwi oosan: “Aaniish ge-zhi-aawpa mnidoo waaboozoonswid?” gii-naan niwi oosan.
Ow dash gii-kido: “Geget sa gaawiin g-nitaa-noondzii.
Gaawiin na g-waabamisii epiitziyaan?”
Ow dash gii-zhichge wa kwe noonj go gii-baaswaan niwi waaboozoonsan;
wi sa wii-bengwaaweswaad gaa-zhi-gwekwekishmaad imaa jiigishkode.
Ow dash gii-nendam wa Nenabozhoo: “Mii aabdeg wi pii bengwaawesowaanen.”
Aaniish baap’aawaan giwi kwewag.
Ow dash gii-nendam: “Ambe sa naa ndaa-bskaakne, ji-bskaneyaash.”
Geget ezhi-jiisaakzod.
Gaa-shkwaa-nwadizod gaa-zhi-zaagjigwaashkonid.
Ow dash gii-kidwag giwi kwewag, “Nashke maaba, zaagjibtawaadaan wi shkode!” dinaawaan niwi ooswaan.
“Ayii!” gii-kido wa kiwenzii;
“geget sa gaawiin g-nitaa-babaamtaziinaawaa gegoo aano-wiindmaagooyeg.
Kaa na mii wa bezhig manidoo bi-mkamigoonaa wi gdi-shkodemnaa.”
Gaa-zhi-bzigonjised wa kiwenzii aanwi-patoo wi jiimaan.
Aano-gii-zhi-bkobiiwebnang, mii dash gaa-zhi-mkwamiikaanig.
Mii dash go eta go gaa-zhi-gnawaabmaawaad mishawi-gichigami ni-zhaawashkwaakonenid,
mii dash gmaapiich gaa-zhi-gwiinwaabmaawaad.
Aaniish gii-gwiinwi-zhichgewag.
Mii dash zhigwa debaabndaan endaawaad wi dash gii-naan niwi ookomisan jibwaa-maajaad: And then presently he was coming in sight of his home.
“ashwiin, gmaage geget biidooyaan wi shkode,” gii-naan niwi ookomisan.
Gaa-zhi-gnoonaad pii debaabndang wi endaawaad, ow gii-naan bi-baandgesed niwi ookomisan:
“aate’ebinishin n-jaagis, nookoo!”
Mii dash geget gaa-zhi-aatwebinaad wa mdimoowenh.
Mii dash wi imaa gaa-ndinmowaad wi shkode.
Ow dash gii-kido wa Nenaboozhoo: “Mii sa wi gaa-zhinaagzid wa waabooz wi ji-niibing.”
Mii sa iw gmaapiich gii-naan niwi ookmisan: “Gaawiin na ngoji anishinaabeg gi-gkenmaasiig ji-yaawaad?”
“Enh,” gii-igoon niwi ookmisan. “Oodi gaami-gchigami yaawag giwi anishinaabeg.”
“Gaa na gnage odahaaziinaawaadig wi shkode?”
“Enh,” gii-igoon niwi ookmisan; “Geget odahaanaawaa wi shkode.”
Oodi dash gii-inaan niwi ookmisan: “Ambe sa naa, nga-naazkaan iw shkode,” gii-naan ookmisan.
Oodi dash gii-igoon niwi ookmisan: “Gaawiin gdaa-gshkitoosiin.
Geget, aapji weweni wi e-kwaamdamwaad oodi wi endaawaad,
Kiwenzii maa yaa.
Mii go pane enso-giizhgag sabiin zhi’aad.
Gaawii wiikaa ngoji zhaasii, mii go pane maa biindig yaad.
Niizhwag dash iw odaanisag, mii eta pane gwajing eyaajig.”
Ow dash ogii-naan niwi ookomisan: “Maanoo nga-zhaa,” gii-naan niwi ookomisan.
“Nahaaw dash,” gii-igoon niwi ookomisan.
Aaniish mii sa gmaapiich gaa-kidod: “Ambe sa naa ji-gbading ow gichigami, wiigwaasabakwaang da-wii-piitadin ow gichigami.”
Mii sa geget gaa-zhiwebdinig wi sa gaa-kidod.
“Ow dash nga-zhinaagos,” gii-kido; “ndawaach nga-waaboozoonsiw. Waaboozoong nga-zhinaagos”
Aaniish mii sa geget gaa-zhinaagozid.
Mii sa zhigwa gii-maajiikowad.
Mii sa geget gaawiin gii-dwaashizii.
Aaniish mii sa gii-gkenmaan imaa yaanid wi Anishinaabe.
Mii dash gaa-zhi-dgoshing imaa wenda’ibiinid, ow dash gii-nendam: “Ambegish sa bi-nbi-naadid aw kwe,” gii-nendam.
Ow dash gii-zhichge imaa waa-gwaaba’iminid wi nbi,
mii dash gaa-zhi-gwaaweb’ogod wi gchi-gami mii imaa gii-titibaweba’agod mii imaa niwi kwewan ge-nji-binaad’abiinid.
Ow dash gii-kido: “Aabdeg sa naa gnimaa nga-waawnenmig.”
Aaniish mii sa kawaabmaad ji-bi-naadoobiinid.
Geget gii-waabmaan biidaasmosenid.
Mii dash zhigwa imaa dgoshinoon imaa sa yaad, zhigwa gii-gwaaba’biinid.
Gaa-izhi-miikwaawaabmigod mii sa gaa-bi-zhi-debibinigod
Mii dash wi gaa-zhi-siikoobiignigod, gaa-bengwaad, gaa-zhi-giiwewnigod oodi gaa-zhi-biindoomawind iw wiiyaw.
Mii sa gaa-zhi-biindganigod geget gii-waabmaan kiwenziiyan nmadbinid.
Geget asabkewan.
Ow dash gii-naan wa kwe niwi misenyan: “Nashke niin,” ogii-naan giimooch niwi misenyan.
“Nashke niin wa gaa-mkawag, waaboozoons.
Ambe eta waawninaagzi wa waaboozoons!
Ambe sa naa gegiin waawnenim n-misenh wa sa waaboozoons.”
Ow dash gii-igoon niwi misenyan: “Ga-nchii’gonaa koosinaa maanda nji,” ogii-igoon niwi misenyan;
giimooj dash gii-igoon niwi misenyan.
Mii dash wi gaa-zhi-ndobagwid gaa-zhi-bgidinigod imaa jiigi-shkode wii-baasigwad.
Mii dash wi baap’aad giwi kwewag waawnenmaawaad niwi waaboozoonsan.
Ezhi-gkenmigowaad niwi ooswaan. “Gdoo-mbiigizim,” gii-igoowaan niwi ooswaan.
Ow dash gii-naawaan niwi ooswaan: “Nashke maaba,” gii-naawaan.
“Nashke maaba waaboozoons.”
“She!” gii-igoowaan niwi ooswaan.
“Gaawiin na kii-noondziim giwi manidoog wi gii-niigi’aad?
Gaa na mii wa bezhig aawsiidog. Neyaab awi-asig,” gii-igoowaan niwi ooswaan.
“Geget sa gii-giibaadzim wi sa gii-daapneg.”
Ow dash gii-kido wa kwe: “Eta gsha n-waawnenmaa wa sa waaboozoons.”
Ow dash gii-naan niwi oosan: “Aaniish ge-zhi-aawpa mnidoo waaboozoonswid?” gii-naan niwi oosan.
Ow dash gii-kido: “Geget sa gaawiin g-nitaa-noondzii.
Gaawiin na g-waabamisii epiitziyaan?”
Ow dash gii-zhichge wa kwe noonj go gii-baaswaan niwi waaboozoonsan;
wi sa wii-bengwaaweswaad gaa-zhi-gwekwekishmaad imaa jiigishkode.
Ow dash gii-nendam wa Nenabozhoo: “Mii aabdeg wi pii bengwaawesowaanen.”
Aaniish baap’aawaan giwi kwewag.
Ow dash gii-nendam: “Ambe sa naa ndaa-bskaakne, ji-bskaneyaash.”
Geget ezhi-jiisaakzod.
Gaa-shkwaa-nwadizod gaa-zhi-zaagjigwaashkonid.
Ow dash gii-kidwag giwi kwewag, “Nashke maaba, zaagjibtawaadaan wi shkode!” dinaawaan niwi ooswaan.
“Ayii!” gii-kido wa kiwenzii;
“geget sa gaawiin g-nitaa-babaamtaziinaawaa gegoo aano-wiindmaagooyeg.
Kaa na mii wa bezhig manidoo bi-mkamigoonaa wi gdi-shkodemnaa.”
Gaa-zhi-bzigonjised wa kiwenzii aanwi-patoo wi jiimaan.
Aano-gii-zhi-bkobiiwebnang, mii dash gaa-zhi-mkwamiikaanig.
Mii dash go eta go gaa-zhi-gnawaabmaawaad mishawi-gichigami ni-zhaawashkwaakonenid,
mii dash gmaapiich gaa-zhi-gwiinwaabmaawaad.
Aaniish gii-gwiinwi-zhichgewag.
Mii dash zhigwa debaabndaan endaawaad wi dash gii-naan niwi ookomisan jibwaa-maajaad: And then presently he was coming in sight of his home.
“ashwiin, gmaage geget biidooyaan wi shkode,” gii-naan niwi ookomisan.
Gaa-zhi-gnoonaad pii debaabndang wi endaawaad, ow gii-naan bi-baandgesed niwi ookomisan:
“aate’ebinishin n-jaagis, nookoo!”
Mii dash geget gaa-zhi-aatwebinaad wa mdimoowenh.
Mii dash wi imaa gaa-ndinmowaad wi shkode.
Ow dash gii-kido wa Nenaboozhoo: “Mii sa wi gaa-zhinaagzid wa waabooz wi ji-niibing.”
