Nänabushu and the Wolves (1)
Ningoding ayindaawag wiigiwaaming Nenaboozhoo oosan, Gwesind, wiiwan gaye niizh oskinaweg gaye, Nenaboozhoo miinawaa dash Baaninii.
Moozhag nandawenjigewag, awesiiyan nisaawaad; mitigwaabiin odaabaji’aawaan bimwaawaad awesiian – binewan, zhiishiiban, nikan, anooji gego onitoonaawaa.
Ginwenzh gii-daawag imaa.
Gegapii Nenaboozhoo odinaan oosan: “Noose, ninga-maajaa.”
“Aandi waa-izhaayan?”
“Niwii-babaamaadis.”
“Booshke giin maajaan.”
Nenaboozhoo gaa-izhi-maajaad; miziwe gii-izhaa, omitigwaabiin odayaawaan.
Onooji gegoo [wa] nitoon maajid.
Ningoding idash wiigiwaam owaabandaan, mii dash odoo-daapinaan obikwak omadwe’aan ishkwaandem.
Madwe-giigido ikwe: “Biindigen!” ikido.
Gaa-izhi-piindiged Nenaboozhoo, owaabamaan ikwewan niizh gaye abinoojiiya’.
Ikwe ogii-odaapinaan mitig; ikwe obakitewaan okaading memeshkod.
“Gego, gego!” ikido Nenaboozhoo.
“Ninga-awi-nandawenjige,” ikido Nenaboozhoo.
Mii dash gaa-izhi-nisaad oniijaanisan bezhig, mii dash gaa-izhi-ozhitood goke’awan, giingoonh goke’awan, niibiwa gaye wiigob biiminakwaan, migiskanan gaye.
Mii dash gii-ozhitood obimiwanaan.
“Gichi-gichi-gamiing ninga-bagidaabii.
Nisagwa giingoonyag ninga-biinaag, ji-wiisiniwaad abinoonjiyag.
Naanagonagak ninga-dagwishin.”
Mii dash gii-maajaad. Nitam idash dibikadinig gii-gabeshi; gii-nibaa.
Wayaabaninig idash gii-ani-maajaa; gwayak giiwedinong izhaa.
Gikizheb, jibwaa-naawakweg, gii-madaabii zaaga’igan.
Ogii-waabamaan niswi ma’iingana’ bimipatoonid; oganawaabamaan.
Oo, biibaagi Nenaboozhoo: “E, bekaa, niijii! Bii’ishiyok!”
Ma’inganag ganoonidiwag: “Aa, mii awe Nenaboozhoo!”
Bezhig akiwenzii ma’iingan, niizh ogwisan ma’inganag.
“Gego, gego ganoonaakegon. Maajaag, maajaag!”
Aah, gichi-pimipatoo Nenaboozhoo!
Miinawa biibaagi: “Bekaa, bekaa, niijii! Bii’ishin akawe, giwii-kanoonin!”
Gegapii gii-kibijigaabawi.
E Nenaboozhoo gii-dagwishin imaa. Aah, boozhoo, boozhoo, niijii!”
Gaye odoozhima’ Nenaboozhoo ogagwejimaan: “Aandi e-zhaayeg?”
“Oh, waasa waabanong.”
“Aaniin ezhinikaadeg?”
“Giizhikidigwanishing.”
“We!” Nenaboozhoo ikido, “mii iwe gaye niin izhaayaan.”
Ma’iingan ogagwejimaan Nenaboozhoo: “Wegonen gaa-bimoondaman?”
“Nim-biinjigosaan gaa-bimoondamaan.”
Aa, Nenaboozhoo ikido: “Giga-wiijiiwininim. Wegonen nendawaabandameg? Gaye niin mii iwidi ezhaayaan.”
“Niibinong gii-kii’osewag gidoozhimag; niibiwa awesiiyan ogii-nisaawaan; mii dash niibiwa wiiyaas baateg bimide gaye mii dash gii-asanjigowaad; mii wendazhi-izhaayang.
Miinawaa dash, wii-kii’osewag gidoozhimag.”
Mii i’iw ekidod a’aw akiwenzii-ma’iingan.
“We,” Nenaboozhoo ikido, “Giga-wiijiwiininim.”
“Aa, gaawiin!” ikido akiwenzii-ma’iingan. “Gaawiin gidaa-dibi’aasig gidoozhimag.”
“Aah, maanoo! Ninga-bimibatoo gaye niin.”
“Aaniish, booshke giin.”
Ezhi-maajaawaad ma’iinganag bimibatoowaad.
Eni-kopiiwaad odoo-daapinaan obimiwanaan ogii-apagidoon mitigoong.
“Bikwaandag da-izhinikaade ji-ani-akiiwang.”
Mii dash gii-maajaawaad. Moozhag bimibatoowag ma’iinganag, Nenaboozhoo gaye wiin gichi-pimipatoo.
Miinawaa bizhishig [?] zaaga’igan omadaabiinaawaa; gwayak naawakwam gii-izhaawag.
Anishinaabeg i’imaa daawag, owaabamaawaan ma’iingana’.
“Hehii, naske ma’iinganag bemipatoowaad! Niiwiwag, niiwin!”
Nenaboozhoo gaye owe doodam onikan owe babimipatood.
Miinawaa biibaagi anishinaabe; “Aaniin izhinaagozid bezhig ma’iingan? Gaawiin gegoo ozowaasii!”
Aa, baapiwag anishinaabeg!
“Shkaa mii iidog Nenaboozhoo!”
Gwayak gii-maajaawag. Aa, aazha ayekozi Nenaboozhoo!
Apii dash wenaagoshig gii-kabeshiwag.
Aapiji ezhi-kisinaag jiigibiig zaaga’iganing mii imaa gii-kabeshiwaad.
Gaawiin gego ishkode.
Bangii gii-moona’igewag goonikaang, mii imaa gii-kawishimowaad.
Gaye wiin Nenaboozhoo bangii gii-moona’ige goonikaang, mii maa gii-kawishimod.
Aapiji ayekozi, aapiji gaye gii-abwezo, gii-kichi-bimipatood.
Gaawiin ogashkitoosiin ji-nibaad; zhayiigwa giikaji, gichi-giikaji.
Akiwenzii-ma’iingan oganoonaan ogwisan. “Daga, awi bezhig gi-konaas.”
Ma’iinganens inaanowe bagizo Nenaboozhoo nibaanid.
Aa! Nenaboozhoo aapiji giizhoozi. Mii dash gii-nibaad.
Mii dash goshkozid aapij abwezo.
Mii dash e-kidod, ningoji odapagidoon ma’iingan ozow: “Diwe! geget gichi-abweskaagoon animwaano.”
Miinawaa gii-nibaa Nenaboozhoo. Miinawaa goshkozi, aapiji miinawaa giikaji,
A’aw ma’iinganens i’imaa nibaa.
Mii dash miinawaa Nenaboozhoo owiikobidoon ma’ingan-ozow wii-agwazhed.
A’aw ma’inganens idash ningoji gii-inaanowe bagizo.
„Noongom gosha animwaano gididaan.”
Aa! Mii dash miinawaa gii-giikajid Nenaboozhoo.
Bijiinag igo baadaabang, madwe-bazigwiiwag; madwe-babawiwag.
Mii dash gii-madwe-maajaawaad, akiwenzii-ma’iingan giigido: “Ambe, Nenaboozhoo, onishkaan! Aazha gii-maajaawag gidoozhimag.”
Oo, miinawaa gii-maajaa Nenaboozhoo maamawi.
Miinawaa gii-kichi-bimipatoo Nenaboozhoo gabe-giizhig.
Miinawaa dash wenaagoshig gii-ikido akiwenzii-ma’iingan, oganoonaan ogwisan:
“Wiin nitam gi-mishoome’iwaa oga’onaabandaan aaniindi ji-gabeshiyang.”
Mii dash oskinawe-ma’iingan: „Onaabandan aaniindi ji-gabeshiyang.”
Mii dash Nenaboozhoo gii-onaabandang aapiji dibinawaanig, aapiji zhingobikaang.
“Mii sa omaa ji-gabeshiyang.”
Mii imaa gii-nibaawaad.
Ayaabitaa-dibikak gii-madwe-onishkaawag oshkinaweg ma’iinganag, giikajiwag.
Gii-madwe-maajaawag. Gigizheb idash giigido akiwenzii-ma’iingan:
„Ambe, Nenaboozhoo! aazha gii-naganigoomin. Aazha waasa ayaadogenag gidoozhimag.”
Mii dash gii-maajaawaad akiwenziiyag.
Ogii-mikawaawaan jiigibiig zaaga’iganing ezhi-kisinaag dinong.
Mii dash miinawaa gii-ani-maajaawaad maamawi.
Aa! gichi-pimipatoo Nenaboozhoo.
Naaningodinong waasa naganaa, obaabii’igoon dash igo wiijikiwenyan.
“Gizhiikaan, gizhiikaan Nenaboozhoo!”
Mii dash miinawaa wenaagoshig gii-kabeshiwaad.
Mii dash e-kidod akiwenzii-ma’iingan.
Oganoonaan Nenaboozhoon: ”Mii iw waabang ji-oditamang e-zhaayang.”
Gigizheb gii-maajaawag maamawi.
Aa! miinawaa bimipatoo Nenaboozhoo.
Nayaawakweg, gii-madaabiiwag bezhig zaaga’igan.
Owaabamaawaan namadabinid mishawakwam.
Giigido akiwenzii-ma’iingan: “Nashke, Nenaboozhoo! ganabaj mii sha’ajigewag gidoozhimag.”
Mii dash gii-ani-odisaawaad i’imaa namadabinid.
Akiwenzii-ma’iingan ani-daatagikweni, ominaamaan moozoon.
Gaye wiin Nenaboozhoo mii endoodang.
Oganoonigoon dash wiijikiweyan: “Gii-minaamaa na mooz?”
“Eyen’,” ikido.
“Aaniin endazhiwaad?” ikido akiwenzii-ma’iingan.
“Nisiwag” ikido Nenaboozhoo, “bezhig noozhens niizh idash maanishensag.”
“Gaawiin,” ikido akiwenzii-ma’iingan, “beshig gwa eta mooz.”
Mii dash gii-maajiibatoowaad oshkinaweg, gaye wiinawaa akiwenzii-ma’iingan Nenaboozhoo gaye, niigaan wiinawaa oshkinaweg.
Mii idash aazha gii-maajaad mooz, mii idash noopinanaawaad moozoon oshkinaweg.
Odinaan dash Nenaboozhoon ma’iingan: “Ani-inaabin weweni.”
Ningoding igo owaabandaanaawaa ma’iingan wiibid badakaakwisinig mitigong.
Mii dash e-kidod akiwenzii-ma’iingan: “Daga odaapinan gidoozhim odasawaan.”
Nenaboozhoo dash ikido: “Aaniin ge-doodamaan animwaabid?”
Akiwenzii-ma’iingan dash owiikobidoon mii dash gaa-izhi-pabawinang asawaan, aapiji onizhishin asawaan.
Wayaabandang idash Nenaboozhoo ikido: “Daga niin, ningad-ani-dakonaan nindoozhim odasawaan!”
Akiwenzii idash ikido: “Noongom gosha animwaabid gididaan. Ani-maajaan igo!”
Mii dash ani-maajaawaad. Miinawaa dash waabandaanaawaa ma’iingan gii-ani-miiziid.
Mii dash e-kidod akiwenzii-ma’iingan: “Daga, Nenaboozhoo! Ani-dakonan gidoozhim omadadaasan.”
Mii dash e-kidod Nenaboozhoo: “Aaniin ge-doodamaan animo-moo?”
Mii dash akiwenzii ogii-odaapinang. Mii dash gii-pabawinang, mii dash madadaasan gaa-ondinaad.
Apii dash Nenaboozhoo wayaabamaad madadaasan, ikido: “Niin daga, ningad-ani-dakonaan nindoozhim omadadaasan!”
Mii dash e-kidod akiwenzii: “Noongom gosha animomoo gid-idaan. Ani-maajaan igo.”
Ningoding igo giigido akiwenzii: “Aa, moozoon ogii-nisaawaan gidoozhimag.”
Aapiji bakade Nenaboozhoo, ayekozi gaye.
Mii dash waabamaad ma’iinagana’ zhingishininid, aapiji debisiniinid.
Gaawiin gegoo owaabandaziin, gaawiin gaye moozoon owaabamaasiin.
Mii eta miskwi goonikaang owaabandaan.
Mii dash e-kidod akiwenzii-ma’iingan: ”Ozhitoodaa gabeshiwin!”
Aa, Nenaboozhoo gitimi! Agaawaa dash owiiji’aan ma’iinganan gabeshinid gaa-kiizhitoowaad dash gabeshiwin, mii iw bi-bazigwiiwaad oshkinaweg ma’iinganag.
Mii iw ezhi-bi-shigagowewaad oskinaweg; dibiskoo go noongom gii-pi-giishkizhigaadeg wiiyaas, mii ezhi-naagwak moozo-wiiyaas.
Mii dash Nenaboozhoo gichi-minwendang ji-wiisinid.
Aah! mii dash jiibaakwewaad. Aah! Nenaboozhoo geget gichi-wiisini.
Mii dash imaa gaa-daawaad, moozhag idash gii-kii’osewag oshkinaweg; niibiwa moozoon onisaawaan; gaye waawaashkeshiwan anooj gaye awesiinyan onisaawaan.
Gaa wiikaa bakadesii Nenaboozhoo; moozhag wenizhishininig wiiyaas omiijim.
Ningoding idash gii-osigane bezhig oshkinawe ma’iingan, mii dash bimide niibiwa gii-ozhitood.
Mii dash geget Nenaboozhoo gii-minwendang niibiwa bimide waabandang.
Miinawaa dash ningoding bezhig oshkinawe wii-osigane.
Mii dash e-kidod: “Gaawiin awiya ninga-ganawaabamigosii, gawishimoyok.”
Baanimaa go gaa-tibikadinig mii dash e-kidod akiwensii-ma’iingan: “Gego, Nenaboozhoo, ganawaabamaaken waa-osiganed.”
Mii dash gii-kawishimowaad, mii dash eta awe oshkinawe ma’iingan nemadabid osiganed.
Mii dash Nenaboozhoo giimooj ezhi-kanawaabamaad, mii dash waabamaad endoodaminid zhaashaagwandang okanan, mii dash bimide wenjijiwaninig odooning onaaganing idash odani-atoon.
Megwaa dash ganawaabamaad Nenaboozhoo endoodaminid, mii ezhi-kotigwandang obikwaakoganan mii dash Nenaboozhoo oshkiinzhigong mayaa gii-bangisininig.
Mii dash Nenaboozhoo gii-aaoisigaagwad iwe okan.
Akiwenzii dash ma’iingan odii baaboodaanaan Nenabozhoon, mii dash gii-bimaadizid.
Mii dash e-naad: “Maagizhaa gigii-kanawaabamaa.”
Mii dash e-kidod Nenaboozhoo: “Gaawiin ningii-kanawaabamaasii, onjida go nimbakite’og.”
Mii dash miinawaa ningoding niibiwa e-yaawaad okanan, mii e-kidod akiwenzii-ma’iingan: “Daga naa, giinitam, Nenaboozhoo, osiganen.”
Mii dash geget Nenaboozhoo e-kidod: “Ahaaw isa ninga-osigane.”
Nenaboozhoo dash ogii-mikwendaan gaa-doodaagod, gegaa gii-nisigod.
Mii dash e-kidod Nenaboozhoo: “Gawishimoyog. Gego awiya ninga-ganawaabamigosii. Badagwiingweshinog.”
Mii dash geget gaa-toodamowaad.
Mii dash Nenaboozhoo mamadawendang okanan, akiwenzii dash ma’iingan odo-onji-ganawaabamaan Nenaboozhoo endodaminid; mii dash Nenaboozhoo ezhi-odaapinang gichi-okan, mii dash ezhi-pakitewaad oshkinawe ma’iinganan, mii ezhi-nisaad.
Mii dash ezhi-onishkaawaad gakina.
Akiwenzii dash ikido: „Aaniish wiin bakitewad?”
„Gaawiin nin-bakitewaasii,” ikido Nenaboozhoo.
„Geget gi-pakitewaa, gigii-ganawaabamin gosha.”
”Gaawiin,” ikido Nenaboozhoo. „Ganabaj giimooj ningii-kanawaabamigoban, mii dash gii-kodigwandamaan iwe bigwaakogan.”
„Geget gigii-pakitewaa gosha.”
Mii dash akiwenzii-ma’iingan gii-baaboodaanaad ogwisan, mii dash gii-pimaaji’aad, gii-bimaadizinid ogwisan.
Ningoding idash akiwenzii oganoonaan Nenaboozhoon: „Mii sa zhigwa ji-goziyang.
Bezhig giga-miinin gidoozhim, mii aw gaye giin ge-wiijiiwad ji-nandawenjiged.
Bezhig gaye ninga-wiijiiwaa. Giga-miinin ishkode.”
Mii dash ezhi-poogidid akiwenzii. “Mii awe apis.”
Miinawaa gii-poogidi. “Mii iwe gii-iman.”
Miinawaa gii-poogidi. „Mii awe wiigwaas. (2) Baanimaa go, gii-kapeshiyan gii-atooyan misan, mii iw ged-izhi-paazhijigwaashkoniyan i’imaa misan ateg, mii iw ged-izhi-biskanesag ishkode.
Gego wiin anishaa go goji-doodamoken.”
Moozhag nandawenjigewag, awesiiyan nisaawaad; mitigwaabiin odaabaji’aawaan bimwaawaad awesiian – binewan, zhiishiiban, nikan, anooji gego onitoonaawaa.
Ginwenzh gii-daawag imaa.
Gegapii Nenaboozhoo odinaan oosan: “Noose, ninga-maajaa.”
“Aandi waa-izhaayan?”
“Niwii-babaamaadis.”
“Booshke giin maajaan.”
Nenaboozhoo gaa-izhi-maajaad; miziwe gii-izhaa, omitigwaabiin odayaawaan.
Onooji gegoo [wa] nitoon maajid.
Ningoding idash wiigiwaam owaabandaan, mii dash odoo-daapinaan obikwak omadwe’aan ishkwaandem.
Madwe-giigido ikwe: “Biindigen!” ikido.
Gaa-izhi-piindiged Nenaboozhoo, owaabamaan ikwewan niizh gaye abinoojiiya’.
Ikwe ogii-odaapinaan mitig; ikwe obakitewaan okaading memeshkod.
“Gego, gego!” ikido Nenaboozhoo.
“Ninga-awi-nandawenjige,” ikido Nenaboozhoo.
Mii dash gaa-izhi-nisaad oniijaanisan bezhig, mii dash gaa-izhi-ozhitood goke’awan, giingoonh goke’awan, niibiwa gaye wiigob biiminakwaan, migiskanan gaye.
Mii dash gii-ozhitood obimiwanaan.
“Gichi-gichi-gamiing ninga-bagidaabii.
Nisagwa giingoonyag ninga-biinaag, ji-wiisiniwaad abinoonjiyag.
Naanagonagak ninga-dagwishin.”
Mii dash gii-maajaad. Nitam idash dibikadinig gii-gabeshi; gii-nibaa.
Wayaabaninig idash gii-ani-maajaa; gwayak giiwedinong izhaa.
Gikizheb, jibwaa-naawakweg, gii-madaabii zaaga’igan.
Ogii-waabamaan niswi ma’iingana’ bimipatoonid; oganawaabamaan.
Oo, biibaagi Nenaboozhoo: “E, bekaa, niijii! Bii’ishiyok!”
Ma’inganag ganoonidiwag: “Aa, mii awe Nenaboozhoo!”
Bezhig akiwenzii ma’iingan, niizh ogwisan ma’inganag.
“Gego, gego ganoonaakegon. Maajaag, maajaag!”
Aah, gichi-pimipatoo Nenaboozhoo!
Miinawa biibaagi: “Bekaa, bekaa, niijii! Bii’ishin akawe, giwii-kanoonin!”
Gegapii gii-kibijigaabawi.
E Nenaboozhoo gii-dagwishin imaa. Aah, boozhoo, boozhoo, niijii!”
Gaye odoozhima’ Nenaboozhoo ogagwejimaan: “Aandi e-zhaayeg?”
“Oh, waasa waabanong.”
“Aaniin ezhinikaadeg?”
“Giizhikidigwanishing.”
“We!” Nenaboozhoo ikido, “mii iwe gaye niin izhaayaan.”
Ma’iingan ogagwejimaan Nenaboozhoo: “Wegonen gaa-bimoondaman?”
“Nim-biinjigosaan gaa-bimoondamaan.”
Aa, Nenaboozhoo ikido: “Giga-wiijiiwininim. Wegonen nendawaabandameg? Gaye niin mii iwidi ezhaayaan.”
“Niibinong gii-kii’osewag gidoozhimag; niibiwa awesiiyan ogii-nisaawaan; mii dash niibiwa wiiyaas baateg bimide gaye mii dash gii-asanjigowaad; mii wendazhi-izhaayang.
Miinawaa dash, wii-kii’osewag gidoozhimag.”
Mii i’iw ekidod a’aw akiwenzii-ma’iingan.
“We,” Nenaboozhoo ikido, “Giga-wiijiwiininim.”
“Aa, gaawiin!” ikido akiwenzii-ma’iingan. “Gaawiin gidaa-dibi’aasig gidoozhimag.”
“Aah, maanoo! Ninga-bimibatoo gaye niin.”
“Aaniish, booshke giin.”
Ezhi-maajaawaad ma’iinganag bimibatoowaad.
Eni-kopiiwaad odoo-daapinaan obimiwanaan ogii-apagidoon mitigoong.
“Bikwaandag da-izhinikaade ji-ani-akiiwang.”
Mii dash gii-maajaawaad. Moozhag bimibatoowag ma’iinganag, Nenaboozhoo gaye wiin gichi-pimipatoo.
Miinawaa bizhishig [?] zaaga’igan omadaabiinaawaa; gwayak naawakwam gii-izhaawag.
Anishinaabeg i’imaa daawag, owaabamaawaan ma’iingana’.
“Hehii, naske ma’iinganag bemipatoowaad! Niiwiwag, niiwin!”
Nenaboozhoo gaye owe doodam onikan owe babimipatood.
Miinawaa biibaagi anishinaabe; “Aaniin izhinaagozid bezhig ma’iingan? Gaawiin gegoo ozowaasii!”
Aa, baapiwag anishinaabeg!
“Shkaa mii iidog Nenaboozhoo!”
Gwayak gii-maajaawag. Aa, aazha ayekozi Nenaboozhoo!
Apii dash wenaagoshig gii-kabeshiwag.
Aapiji ezhi-kisinaag jiigibiig zaaga’iganing mii imaa gii-kabeshiwaad.
Gaawiin gego ishkode.
Bangii gii-moona’igewag goonikaang, mii imaa gii-kawishimowaad.
Gaye wiin Nenaboozhoo bangii gii-moona’ige goonikaang, mii maa gii-kawishimod.
Aapiji ayekozi, aapiji gaye gii-abwezo, gii-kichi-bimipatood.
Gaawiin ogashkitoosiin ji-nibaad; zhayiigwa giikaji, gichi-giikaji.
Akiwenzii-ma’iingan oganoonaan ogwisan. “Daga, awi bezhig gi-konaas.”
Ma’iinganens inaanowe bagizo Nenaboozhoo nibaanid.
Aa! Nenaboozhoo aapiji giizhoozi. Mii dash gii-nibaad.
Mii dash goshkozid aapij abwezo.
Mii dash e-kidod, ningoji odapagidoon ma’iingan ozow: “Diwe! geget gichi-abweskaagoon animwaano.”
Miinawaa gii-nibaa Nenaboozhoo. Miinawaa goshkozi, aapiji miinawaa giikaji,
A’aw ma’iinganens i’imaa nibaa.
Mii dash miinawaa Nenaboozhoo owiikobidoon ma’ingan-ozow wii-agwazhed.
A’aw ma’inganens idash ningoji gii-inaanowe bagizo.
„Noongom gosha animwaano gididaan.”
Aa! Mii dash miinawaa gii-giikajid Nenaboozhoo.
Bijiinag igo baadaabang, madwe-bazigwiiwag; madwe-babawiwag.
Mii dash gii-madwe-maajaawaad, akiwenzii-ma’iingan giigido: “Ambe, Nenaboozhoo, onishkaan! Aazha gii-maajaawag gidoozhimag.”
Oo, miinawaa gii-maajaa Nenaboozhoo maamawi.
Miinawaa gii-kichi-bimipatoo Nenaboozhoo gabe-giizhig.
Miinawaa dash wenaagoshig gii-ikido akiwenzii-ma’iingan, oganoonaan ogwisan:
“Wiin nitam gi-mishoome’iwaa oga’onaabandaan aaniindi ji-gabeshiyang.”
Mii dash oskinawe-ma’iingan: „Onaabandan aaniindi ji-gabeshiyang.”
Mii dash Nenaboozhoo gii-onaabandang aapiji dibinawaanig, aapiji zhingobikaang.
“Mii sa omaa ji-gabeshiyang.”
Mii imaa gii-nibaawaad.
Ayaabitaa-dibikak gii-madwe-onishkaawag oshkinaweg ma’iinganag, giikajiwag.
Gii-madwe-maajaawag. Gigizheb idash giigido akiwenzii-ma’iingan:
„Ambe, Nenaboozhoo! aazha gii-naganigoomin. Aazha waasa ayaadogenag gidoozhimag.”
Mii dash gii-maajaawaad akiwenziiyag.
Ogii-mikawaawaan jiigibiig zaaga’iganing ezhi-kisinaag dinong.
Mii dash miinawaa gii-ani-maajaawaad maamawi.
Aa! gichi-pimipatoo Nenaboozhoo.
Naaningodinong waasa naganaa, obaabii’igoon dash igo wiijikiwenyan.
“Gizhiikaan, gizhiikaan Nenaboozhoo!”
Mii dash miinawaa wenaagoshig gii-kabeshiwaad.
Mii dash e-kidod akiwenzii-ma’iingan.
Oganoonaan Nenaboozhoon: ”Mii iw waabang ji-oditamang e-zhaayang.”
Gigizheb gii-maajaawag maamawi.
Aa! miinawaa bimipatoo Nenaboozhoo.
Nayaawakweg, gii-madaabiiwag bezhig zaaga’igan.
Owaabamaawaan namadabinid mishawakwam.
Giigido akiwenzii-ma’iingan: “Nashke, Nenaboozhoo! ganabaj mii sha’ajigewag gidoozhimag.”
Mii dash gii-ani-odisaawaad i’imaa namadabinid.
Akiwenzii-ma’iingan ani-daatagikweni, ominaamaan moozoon.
Gaye wiin Nenaboozhoo mii endoodang.
Oganoonigoon dash wiijikiweyan: “Gii-minaamaa na mooz?”
“Eyen’,” ikido.
“Aaniin endazhiwaad?” ikido akiwenzii-ma’iingan.
“Nisiwag” ikido Nenaboozhoo, “bezhig noozhens niizh idash maanishensag.”
“Gaawiin,” ikido akiwenzii-ma’iingan, “beshig gwa eta mooz.”
Mii dash gii-maajiibatoowaad oshkinaweg, gaye wiinawaa akiwenzii-ma’iingan Nenaboozhoo gaye, niigaan wiinawaa oshkinaweg.
Mii idash aazha gii-maajaad mooz, mii idash noopinanaawaad moozoon oshkinaweg.
Odinaan dash Nenaboozhoon ma’iingan: “Ani-inaabin weweni.”
Ningoding igo owaabandaanaawaa ma’iingan wiibid badakaakwisinig mitigong.
Mii dash e-kidod akiwenzii-ma’iingan: “Daga odaapinan gidoozhim odasawaan.”
Nenaboozhoo dash ikido: “Aaniin ge-doodamaan animwaabid?”
Akiwenzii-ma’iingan dash owiikobidoon mii dash gaa-izhi-pabawinang asawaan, aapiji onizhishin asawaan.
Wayaabandang idash Nenaboozhoo ikido: “Daga niin, ningad-ani-dakonaan nindoozhim odasawaan!”
Akiwenzii idash ikido: “Noongom gosha animwaabid gididaan. Ani-maajaan igo!”
Mii dash ani-maajaawaad. Miinawaa dash waabandaanaawaa ma’iingan gii-ani-miiziid.
Mii dash e-kidod akiwenzii-ma’iingan: “Daga, Nenaboozhoo! Ani-dakonan gidoozhim omadadaasan.”
Mii dash e-kidod Nenaboozhoo: “Aaniin ge-doodamaan animo-moo?”
Mii dash akiwenzii ogii-odaapinang. Mii dash gii-pabawinang, mii dash madadaasan gaa-ondinaad.
Apii dash Nenaboozhoo wayaabamaad madadaasan, ikido: “Niin daga, ningad-ani-dakonaan nindoozhim omadadaasan!”
Mii dash e-kidod akiwenzii: “Noongom gosha animomoo gid-idaan. Ani-maajaan igo.”
Ningoding igo giigido akiwenzii: “Aa, moozoon ogii-nisaawaan gidoozhimag.”
Aapiji bakade Nenaboozhoo, ayekozi gaye.
Mii dash waabamaad ma’iinagana’ zhingishininid, aapiji debisiniinid.
Gaawiin gegoo owaabandaziin, gaawiin gaye moozoon owaabamaasiin.
Mii eta miskwi goonikaang owaabandaan.
Mii dash e-kidod akiwenzii-ma’iingan: ”Ozhitoodaa gabeshiwin!”
Aa, Nenaboozhoo gitimi! Agaawaa dash owiiji’aan ma’iinganan gabeshinid gaa-kiizhitoowaad dash gabeshiwin, mii iw bi-bazigwiiwaad oshkinaweg ma’iinganag.
Mii iw ezhi-bi-shigagowewaad oskinaweg; dibiskoo go noongom gii-pi-giishkizhigaadeg wiiyaas, mii ezhi-naagwak moozo-wiiyaas.
Mii dash Nenaboozhoo gichi-minwendang ji-wiisinid.
Aah! mii dash jiibaakwewaad. Aah! Nenaboozhoo geget gichi-wiisini.
Mii dash imaa gaa-daawaad, moozhag idash gii-kii’osewag oshkinaweg; niibiwa moozoon onisaawaan; gaye waawaashkeshiwan anooj gaye awesiinyan onisaawaan.
Gaa wiikaa bakadesii Nenaboozhoo; moozhag wenizhishininig wiiyaas omiijim.
Ningoding idash gii-osigane bezhig oshkinawe ma’iingan, mii dash bimide niibiwa gii-ozhitood.
Mii dash geget Nenaboozhoo gii-minwendang niibiwa bimide waabandang.
Miinawaa dash ningoding bezhig oshkinawe wii-osigane.
Mii dash e-kidod: “Gaawiin awiya ninga-ganawaabamigosii, gawishimoyok.”
Baanimaa go gaa-tibikadinig mii dash e-kidod akiwensii-ma’iingan: “Gego, Nenaboozhoo, ganawaabamaaken waa-osiganed.”
Mii dash gii-kawishimowaad, mii dash eta awe oshkinawe ma’iingan nemadabid osiganed.
Mii dash Nenaboozhoo giimooj ezhi-kanawaabamaad, mii dash waabamaad endoodaminid zhaashaagwandang okanan, mii dash bimide wenjijiwaninig odooning onaaganing idash odani-atoon.
Megwaa dash ganawaabamaad Nenaboozhoo endoodaminid, mii ezhi-kotigwandang obikwaakoganan mii dash Nenaboozhoo oshkiinzhigong mayaa gii-bangisininig.
Mii dash Nenaboozhoo gii-aaoisigaagwad iwe okan.
Akiwenzii dash ma’iingan odii baaboodaanaan Nenabozhoon, mii dash gii-bimaadizid.
Mii dash e-naad: “Maagizhaa gigii-kanawaabamaa.”
Mii dash e-kidod Nenaboozhoo: “Gaawiin ningii-kanawaabamaasii, onjida go nimbakite’og.”
Mii dash miinawaa ningoding niibiwa e-yaawaad okanan, mii e-kidod akiwenzii-ma’iingan: “Daga naa, giinitam, Nenaboozhoo, osiganen.”
Mii dash geget Nenaboozhoo e-kidod: “Ahaaw isa ninga-osigane.”
Nenaboozhoo dash ogii-mikwendaan gaa-doodaagod, gegaa gii-nisigod.
Mii dash e-kidod Nenaboozhoo: “Gawishimoyog. Gego awiya ninga-ganawaabamigosii. Badagwiingweshinog.”
Mii dash geget gaa-toodamowaad.
Mii dash Nenaboozhoo mamadawendang okanan, akiwenzii dash ma’iingan odo-onji-ganawaabamaan Nenaboozhoo endodaminid; mii dash Nenaboozhoo ezhi-odaapinang gichi-okan, mii dash ezhi-pakitewaad oshkinawe ma’iinganan, mii ezhi-nisaad.
Mii dash ezhi-onishkaawaad gakina.
Akiwenzii dash ikido: „Aaniish wiin bakitewad?”
„Gaawiin nin-bakitewaasii,” ikido Nenaboozhoo.
„Geget gi-pakitewaa, gigii-ganawaabamin gosha.”
”Gaawiin,” ikido Nenaboozhoo. „Ganabaj giimooj ningii-kanawaabamigoban, mii dash gii-kodigwandamaan iwe bigwaakogan.”
„Geget gigii-pakitewaa gosha.”
Mii dash akiwenzii-ma’iingan gii-baaboodaanaad ogwisan, mii dash gii-pimaaji’aad, gii-bimaadizinid ogwisan.
Ningoding idash akiwenzii oganoonaan Nenaboozhoon: „Mii sa zhigwa ji-goziyang.
Bezhig giga-miinin gidoozhim, mii aw gaye giin ge-wiijiiwad ji-nandawenjiged.
Bezhig gaye ninga-wiijiiwaa. Giga-miinin ishkode.”
Mii dash ezhi-poogidid akiwenzii. “Mii awe apis.”
Miinawaa gii-poogidi. “Mii iwe gii-iman.”
Miinawaa gii-poogidi. „Mii awe wiigwaas. (2) Baanimaa go, gii-kapeshiyan gii-atooyan misan, mii iw ged-izhi-paazhijigwaashkoniyan i’imaa misan ateg, mii iw ged-izhi-biskanesag ishkode.
Gego wiin anishaa go goji-doodamoken.”
