Gaa-zhi-ndaadizid Nenabosho
The Birth of Nenabosho - Manitoulin Dialect
Wiigwaaming anishinaabeg gii-daawag, mndimoowenh miinwaa daansan owiijgendaadwag.
Ngoding ganoonaan niwi daansan: “Ambe sa naa n-daanis aangwaamizin. Ga-bzindaw dash wi waa-wiindmooninaa.
Aapji go n-naniizaanendam giin onji, g-naniizaanenmin.
Gegwa wiikaa zhichgeke oodi e-pngishmog ji-naasmabyan zaag’aman.
Gegoo ka-zhi-yaa giishpin widi naasmabyan.
Mii wi sa ezhi-naniizaanenminaa.
Aangwaamzin wi noongo eninaa ji-zhichgeyan; ka-nigaatoon k-wiiyaw.
Mii sa iw eninaa.”
Aanish mii sa go iw, aaniish mii sa geget aangwaamzigobanen aw kwe e-shkiniigkwewid.
Gaawii wiikaa niniwan besho gii-waabmaasiin.
Ngoding go gaa-zhi-wnised aw shkiniigkwe;
mii dash pii zaag’amgobanen gaa-zhi-naasmabid e-pngishmag
mii dash pii noondmogbanen biidweweyaanmadnig.
Gaa-zhi-gkendang dkaashid iwidi zaaga’moowining.
Mii dash ezhi-bzigonjised. “n-maamaa, nashke genii, gaa-zhayaayaan!
Mii gnabach gaa-zhiyan ezhi-ayaayaan.”
Gaa-zhi-gnoonaad aw mndimoowenh niwi daansan: “Memdage kii-nigaatoon k-wiiyaw.”
Aaniish mii sa iw zhigwa gii-mwid aw mndimoowenh. “Aaniish mii go iw n-daanis, nigaatooyan k-wiiyaw.
Nashke ga-gkendaan go ge-ni-zhiwebiziyan.
Wiya gii-biindgeshkaag k-wiiyawing, mii go iw n-daanis, nigaaziyan.
Gaawii anishnaabewisiiwag gaa-biindgeshkaagoowin imaa sa k-wiiyawing.
Gaawii waasa iw ji-niigiwaad.
Na, mii dash giwi gaa-gsagig.”
Aaniish nashke dash gmaa go pii mii sa go gii-noondwaad aw sa mndimoowenh wiya mdwe-giikaandinid.
Gii-gkenimaan biinjyi’ii danwewedamnid.
Mii dash pane gii-mwid aw mndimoowenh, gii-aabdademo.
Mii dash geget imaa gii-gwayakwenmaad ji-bmaadzisinig niwi daansan.
Aaniish gii-noondwaan sa iw gaakaandinid, imaa misadaaning danwewedamnid.
Wa dash mdwe-kidwan: “Niin go nga-ziikis.”
“Gaawii” mdwe-kida bezhig miinwaa go kida aw bezhig: “Gaawii gdaa-ziikzisii. Niin sa nga-ziikis.”
Aaniish mii sa pane mwid aw mndimoowenh bzindawaad iw giikaandnid.
Gii-gkenimaan aw mndimoowenh wi waa-dazhnid iw oosheyan.
Na, mii dash iw ekidwaad ngaawebnidwaad aanawii-zaag’amowaad.
Giwi dash aanin aano-gii-kidwag: “Gegwa bina! Ka-nigaa’aanaa gsha g-maamaanaa.
Weweni bina go zaagjiitmadaa,” aano-kidwag.
Gaawiin dash zhi-minwendziiwag giwi waa-ziikzijig.
Mii dash iw e-kidwaad zhigwa noonj go wii-zhi-zaag’amwaad.
Bezhig ogii-waabndaan waaskonenig.
“Aaniish mii imaa gwayak niin waa-zhaayaan.”
Mii dash pii gii-gagwedaanmidwaad, aagnetaadiwaad, wenen aw ntam ge-zaag’ang,
Mii dash iw gaa-zhi-biigshkawaawaad niwi omaamaawaan.
Wiikaa go ngoji bbaa-naabid mndimoowenh gii-mkaan mskwi bngii.
Mii sa wiigwaas ezhi-baapaagonang.
Mii dash maa gaa-zhi-tibiignang wiigwaasing iw mskwi, mii sa gaa-zgaknang.
Aaniish piichnaag gii-waabndaan.
Ngoding go biniskweginang gii-waabmaan binoojiiyan, mii go iw gii-gnoonigod, ow dash gii-igoon:
“Nookmis,” gii-igoon pii genoongod.
Aaniish mii sa zhigwa gii-igoon: “Gii-gkenim na yaawyaan? Niin sa Nenaboozhoo.”
Ngoding ganoonaan niwi daansan: “Ambe sa naa n-daanis aangwaamizin. Ga-bzindaw dash wi waa-wiindmooninaa.
Aapji go n-naniizaanendam giin onji, g-naniizaanenmin.
Gegwa wiikaa zhichgeke oodi e-pngishmog ji-naasmabyan zaag’aman.
Gegoo ka-zhi-yaa giishpin widi naasmabyan.
Mii wi sa ezhi-naniizaanenminaa.
Aangwaamzin wi noongo eninaa ji-zhichgeyan; ka-nigaatoon k-wiiyaw.
Mii sa iw eninaa.”
Aanish mii sa go iw, aaniish mii sa geget aangwaamzigobanen aw kwe e-shkiniigkwewid.
Gaawii wiikaa niniwan besho gii-waabmaasiin.
Ngoding go gaa-zhi-wnised aw shkiniigkwe;
mii dash pii zaag’amgobanen gaa-zhi-naasmabid e-pngishmag
mii dash pii noondmogbanen biidweweyaanmadnig.
Gaa-zhi-gkendang dkaashid iwidi zaaga’moowining.
Mii dash ezhi-bzigonjised. “n-maamaa, nashke genii, gaa-zhayaayaan!
Mii gnabach gaa-zhiyan ezhi-ayaayaan.”
Gaa-zhi-gnoonaad aw mndimoowenh niwi daansan: “Memdage kii-nigaatoon k-wiiyaw.”
Aaniish mii sa iw zhigwa gii-mwid aw mndimoowenh. “Aaniish mii go iw n-daanis, nigaatooyan k-wiiyaw.
Nashke ga-gkendaan go ge-ni-zhiwebiziyan.
Wiya gii-biindgeshkaag k-wiiyawing, mii go iw n-daanis, nigaaziyan.
Gaawii anishnaabewisiiwag gaa-biindgeshkaagoowin imaa sa k-wiiyawing.
Gaawii waasa iw ji-niigiwaad.
Na, mii dash giwi gaa-gsagig.”
Aaniish nashke dash gmaa go pii mii sa go gii-noondwaad aw sa mndimoowenh wiya mdwe-giikaandinid.
Gii-gkenimaan biinjyi’ii danwewedamnid.
Mii dash pane gii-mwid aw mndimoowenh, gii-aabdademo.
Mii dash geget imaa gii-gwayakwenmaad ji-bmaadzisinig niwi daansan.
Aaniish gii-noondwaan sa iw gaakaandinid, imaa misadaaning danwewedamnid.
Wa dash mdwe-kidwan: “Niin go nga-ziikis.”
“Gaawii” mdwe-kida bezhig miinwaa go kida aw bezhig: “Gaawii gdaa-ziikzisii. Niin sa nga-ziikis.”
Aaniish mii sa pane mwid aw mndimoowenh bzindawaad iw giikaandnid.
Gii-gkenimaan aw mndimoowenh wi waa-dazhnid iw oosheyan.
Na, mii dash iw ekidwaad ngaawebnidwaad aanawii-zaag’amowaad.
Giwi dash aanin aano-gii-kidwag: “Gegwa bina! Ka-nigaa’aanaa gsha g-maamaanaa.
Weweni bina go zaagjiitmadaa,” aano-kidwag.
Gaawiin dash zhi-minwendziiwag giwi waa-ziikzijig.
Mii dash iw e-kidwaad zhigwa noonj go wii-zhi-zaag’amwaad.
Bezhig ogii-waabndaan waaskonenig.
“Aaniish mii imaa gwayak niin waa-zhaayaan.”
Mii dash pii gii-gagwedaanmidwaad, aagnetaadiwaad, wenen aw ntam ge-zaag’ang,
Mii dash iw gaa-zhi-biigshkawaawaad niwi omaamaawaan.
Wiikaa go ngoji bbaa-naabid mndimoowenh gii-mkaan mskwi bngii.
Mii sa wiigwaas ezhi-baapaagonang.
Mii dash maa gaa-zhi-tibiignang wiigwaasing iw mskwi, mii sa gaa-zgaknang.
Aaniish piichnaag gii-waabndaan.
Ngoding go biniskweginang gii-waabmaan binoojiiyan, mii go iw gii-gnoonigod, ow dash gii-igoon:
“Nookmis,” gii-igoon pii genoongod.
Aaniish mii sa zhigwa gii-igoon: “Gii-gkenim na yaawyaan? Niin sa Nenaboozhoo.”