Nanabushu Marries
Aaniish, ningoding sa giiwenh Nenaboozhoo gii-babimose babaamaadizid, wiin eta go nishike.
Gegapii ningoding anishinaaben odoodisaan; imaa dash ayaawaad igiw anishinaabeg opimeya’ii dash imaa owaabandaan wiigiwaamens ayaanig.
Mii dash gaa-izhi-naazikang, gii-dapaabi dash ishkwaandeng; ikwewan owaabamaan namadabinid.
Gaawiin ganage bi-inaabisiiwan; apii idash gekenimigod mii ganoonigod: “Gego indawaa biindigeken,” odigoon; “onjida omaa nishike nindayaa,” odigoon.
“Maanoo, ninga-piindige!” odinaan.
“Gego biindigeken,” odigoon.
“Gaawiin awiya omaa da-piindigesii.”
Gaawiin ganage bi-onji-inaabisiiwan.
Nenaboozhoo dash aapiji inendam wii-piindiged, mii dash gaa-izhi-piindiged; mii giiwenh aw ikwe ezhi-aapiji-nawagikwenid.
Baanimaa dash wayaabang gigizheb bi-dagwishinoon ogiin a’aw ikwe bi-ashamigod; baateni wiiyaas baadood aw mindimooye, mii iw gaa-ashamaad odaanisan.
Nenaboozhoo dash oganoonaan iniw mindimooyeyan: “Gaawiin ina nindaa-wiidigemaasii a’aw gi-daanis?”
“Niyaa,” ikido aw mindimoye; “megwaa gosha manidoo’o!
Gaye dash gaawiin dibenindizosii, oosan odibenimigoon.
Ninga-wiindamawaa aw akiwenzii.”
“Aaniish, maanoo sa. Miinawaa na kawe ninga-babaamaadis.
Gii-niizhwaasogonagak ninga-dagwishin, mii iw ji-bi-nando-gikendamaan ged-ikidogwen aw akiwenzi.”
Mii dash gaa-izhi-maajaad Nenaboozhoo gii-pabaamaadizid noopiming; anooji gegoon obabaa-nitoon maajid.
Apii idash eni-niizhwaasogonagadinig mii iw zhigwa izhaad, anooj awesiiyensan odani-maajiinaan.
Apii idash eni-oditang iwe wiigiwaamens owaabandaan, weweni biinichjigaadenig.
Apii idash depaabandang iwe wiigiwaamens, obi-ganawaabamigoon iniw ikwewan.
“Aaniish, gidaa-piindige,” odigoon.
Mii dash a’aw ikwe agwajing gii-izhaa; mii dash waabandang Nenaboozhoo obimiwanaan, wiiyaas etenig, mizise’ gaye binewa’ gaye.
Mii dash awi kwe gaa-izhi-jiibaakwed, mii dash ekidod: “Ningad-awi-nandomaag ni-niigi’igoog.”
Mii gaa-izhi-maajaad awi kwe, ogii-awi-nandomaan oosan ogiin gaye.
Ninga anidash gii-pi-dagwishin aw ikwe.
Apii idash degoshinowaad igiw gichi-anishinaabeg, owaabamaawaan Nenaboozhoon namadabinid agaamindesing.
Mii dash ekidod awe akiwenzi: “Aaniish, Nenaboozhoo, ningii-wiindamaagoo i’iw gaa-ikidowanen e-nenimaawaaden a’awi nin-daanisinaan.
Gaawiin aapiji gegoon onitaawidoosiin noondezi,”
Weweni ogii-wiindamawaan iniw Nenaboozhoon.
“Giishpin dash aanawenimaasiwad, maanoo sa indawaa gidaa-wiijiiwaa.”
Mii dash gaa-izhi-pazigwiid a’aw akiwenzii ogii-saginikenaan odaanisan, Nenaboozhoon dash namadabinid ogii-onabi’aan.
Mii dash gii-kagiikamaawaad iniw odaanisiwaan weweni ji-wii-bimaadizinid.
Mii dash gaa-izhi-wiisiniwaad.
Gaa-ishkwaa-wiisiniwaad gii-kanoonaa Nenaboozhoo: “Ambe, bi-izhaayog endaayaang, gaye giinawaa ji-pi-ayaayeg imaa oodetoowaad anishinaabeg.”
Mii dash imaa gii-na’aangabid; moozhag idash gii-nandawenjige, anooj gego onitoon awesiiya’.
Naaniingodinong obi-wiijiiwaan makwan mii dash imaa baanimaa bi-dagwishing ishkwaandeng mii imaa niiwanawaad.
Wiiba dash igo Nenaboozhoo gii-ikido: “Wiikondiwin ji-ozhichigaadenig awesiinh miijim, mizise gaye, gakina go endaswewaanagiziwaad, binewa’ gaye.”
Mii dash gaa-izhi-wiikomindwaa niibiwa anishinaabeg, ikwewag gaye.
Gaa-ishkwaa-wiikonding dash mii iw gaa-izhi-odaminowaad, bi-paaga’adowewag.
Ikwewag gaye bakaan gii-odaminowag, gii-papasikawewag.
Mii dash gaa-ikidong: “Mii sa iw Nenaboozhoo owiidigewin noongom wenji-odaminowin.
Mii ged-izhiwebak awiya ge-wiidigedin,” gii-ikidowag.
Mii iw gaye wiinawaa gaa-izhichigewaad anishinaabeg awiya gaa-wiidigedin.
Gegapii ningoding anishinaaben odoodisaan; imaa dash ayaawaad igiw anishinaabeg opimeya’ii dash imaa owaabandaan wiigiwaamens ayaanig.
Mii dash gaa-izhi-naazikang, gii-dapaabi dash ishkwaandeng; ikwewan owaabamaan namadabinid.
Gaawiin ganage bi-inaabisiiwan; apii idash gekenimigod mii ganoonigod: “Gego indawaa biindigeken,” odigoon; “onjida omaa nishike nindayaa,” odigoon.
“Maanoo, ninga-piindige!” odinaan.
“Gego biindigeken,” odigoon.
“Gaawiin awiya omaa da-piindigesii.”
Gaawiin ganage bi-onji-inaabisiiwan.
Nenaboozhoo dash aapiji inendam wii-piindiged, mii dash gaa-izhi-piindiged; mii giiwenh aw ikwe ezhi-aapiji-nawagikwenid.
Baanimaa dash wayaabang gigizheb bi-dagwishinoon ogiin a’aw ikwe bi-ashamigod; baateni wiiyaas baadood aw mindimooye, mii iw gaa-ashamaad odaanisan.
Nenaboozhoo dash oganoonaan iniw mindimooyeyan: “Gaawiin ina nindaa-wiidigemaasii a’aw gi-daanis?”
“Niyaa,” ikido aw mindimoye; “megwaa gosha manidoo’o!
Gaye dash gaawiin dibenindizosii, oosan odibenimigoon.
Ninga-wiindamawaa aw akiwenzii.”
“Aaniish, maanoo sa. Miinawaa na kawe ninga-babaamaadis.
Gii-niizhwaasogonagak ninga-dagwishin, mii iw ji-bi-nando-gikendamaan ged-ikidogwen aw akiwenzi.”
Mii dash gaa-izhi-maajaad Nenaboozhoo gii-pabaamaadizid noopiming; anooji gegoon obabaa-nitoon maajid.
Apii idash eni-niizhwaasogonagadinig mii iw zhigwa izhaad, anooj awesiiyensan odani-maajiinaan.
Apii idash eni-oditang iwe wiigiwaamens owaabandaan, weweni biinichjigaadenig.
Apii idash depaabandang iwe wiigiwaamens, obi-ganawaabamigoon iniw ikwewan.
“Aaniish, gidaa-piindige,” odigoon.
Mii dash a’aw ikwe agwajing gii-izhaa; mii dash waabandang Nenaboozhoo obimiwanaan, wiiyaas etenig, mizise’ gaye binewa’ gaye.
Mii dash awi kwe gaa-izhi-jiibaakwed, mii dash ekidod: “Ningad-awi-nandomaag ni-niigi’igoog.”
Mii gaa-izhi-maajaad awi kwe, ogii-awi-nandomaan oosan ogiin gaye.
Ninga anidash gii-pi-dagwishin aw ikwe.
Apii idash degoshinowaad igiw gichi-anishinaabeg, owaabamaawaan Nenaboozhoon namadabinid agaamindesing.
Mii dash ekidod awe akiwenzi: “Aaniish, Nenaboozhoo, ningii-wiindamaagoo i’iw gaa-ikidowanen e-nenimaawaaden a’awi nin-daanisinaan.
Gaawiin aapiji gegoon onitaawidoosiin noondezi,”
Weweni ogii-wiindamawaan iniw Nenaboozhoon.
“Giishpin dash aanawenimaasiwad, maanoo sa indawaa gidaa-wiijiiwaa.”
Mii dash gaa-izhi-pazigwiid a’aw akiwenzii ogii-saginikenaan odaanisan, Nenaboozhoon dash namadabinid ogii-onabi’aan.
Mii dash gii-kagiikamaawaad iniw odaanisiwaan weweni ji-wii-bimaadizinid.
Mii dash gaa-izhi-wiisiniwaad.
Gaa-ishkwaa-wiisiniwaad gii-kanoonaa Nenaboozhoo: “Ambe, bi-izhaayog endaayaang, gaye giinawaa ji-pi-ayaayeg imaa oodetoowaad anishinaabeg.”
Mii dash imaa gii-na’aangabid; moozhag idash gii-nandawenjige, anooj gego onitoon awesiiya’.
Naaniingodinong obi-wiijiiwaan makwan mii dash imaa baanimaa bi-dagwishing ishkwaandeng mii imaa niiwanawaad.
Wiiba dash igo Nenaboozhoo gii-ikido: “Wiikondiwin ji-ozhichigaadenig awesiinh miijim, mizise gaye, gakina go endaswewaanagiziwaad, binewa’ gaye.”
Mii dash gaa-izhi-wiikomindwaa niibiwa anishinaabeg, ikwewag gaye.
Gaa-ishkwaa-wiikonding dash mii iw gaa-izhi-odaminowaad, bi-paaga’adowewag.
Ikwewag gaye bakaan gii-odaminowag, gii-papasikawewag.
Mii dash gaa-ikidong: “Mii sa iw Nenaboozhoo owiidigewin noongom wenji-odaminowin.
Mii ged-izhiwebak awiya ge-wiidigedin,” gii-ikidowag.
Mii iw gaye wiinawaa gaa-izhichigewaad anishinaabeg awiya gaa-wiidigedin.