Nänabushu and the Winged Startlers
Mii dash zhayiigwa ani-babimosed ningoting igo ogii-waabamaan awiya okoshininid.
“Gonige Gii-wiinzomwaadog?" ogii-inaan i’iw wayaabamaad.
"Mii nange," ogii-igoon; "o’ow nindizhinikaazomin, Goshkongesiinag, nindigoomin."
"Geget sa, mii nangwani iw ezhinikaazoyeg!"
Mii dash gaa-izhi-miijinaad, o’ow dash gaa-izhi-inaad: “Wa’aw gosha eta Goshkongesii, ogow gosha eta,” ogii-inaan.
Mii dash gaa-ni-zhi-maajaad, gii-ani-babimosed.
Gaa-izhi-madaabiid i’iw Gichigami, ogii-waabandaan Gichi-giishkaabikaanig; inaabid, Geget naawi-naagwadini iwidi nibiikaang.
“Onjida maawiin nindaa-izhi-kwaashkwan ikwedog ataading, aapiji go dataakonjiigwaned.
Onjida maawiin nintaa-izhi-kwaashkwan: ‘Awegwen ge-izhi-kwaashkwanigwen?’ ikidong.
Onjida maawiin nindaa-izhi-kwaashkwan."
Mii go imaa eko-giibaabikaanig niibawid.
O’ow dash doodam, miizan ezhi-waaninigaadenid.
Mii dash zhigwa gii-odisaad o’owedi gaa-miijinimind mii i'iw oniijaanisa’.
"Aaniin gaadiyeg?" odinaa' i'i'w oniijaanisa’.
“Gaa, nangwana Nenaboozhoo ningii-miijinigonaan.”
“Ningodanoo maawiin inaawegoban.”
“Gaawiin,” Gii-ikido a’aw bezhig i’imaa moowiing osibidood.
“Geget ninga-gwejimigonaan, ‘Aaniin ezhinikaazoyeg?’ ningii-igonaan
O’ow idash ningii-inaanaan, ‘Goshkongesiinag nindigoomin,’ ningii-inaanaan.
O’ow idash gii-ikido: ‘Naabisa Goshkongesi!’ ningii-igonaan; mii dash gaa-izhi-mamashkijishiyangid, mii dash gaa-ani-zhi-maajaad.”
Wa’aw idash weniijaanizit gaa-izhi-giziibiiginaad; gaa-ishkwaa-giziibiiginaad, zhigwa gaa-izhi-maajaad.
“Mishanim!” ogii-inaan Nenaboozhoowan.
Mii dash gaa-izhi-adimaad i’imaa giishkaabikaang, mii dash besho ogii-onzaabamaan.
Mii dash gaa-inenimaad: “Wiikaage sa miinawaa da-waaninigaadeni.”
Zhigwa Geget ombigaadeni Nenaboozhoo.
“Onjida sa nindaa-izhi-kwaashkwan ningodwaakwa’aagan ekwo-jiingwaned adaading.”
Mii dash gaa-izhi-bazigwa’od a’a’w bine, mii dash gaa-izhi-gwaashkwaninid i’imaa giishkaabikaang.
Mii dash i’imaa gaa-izhi-booniid ganawaabamaad animibizonid; mii dash i’iwidi nibiikaang gaa-izhi-bangishininid.
Mii dash i’imaa gaa-onzaabimaad, geget gabeya’ii gii-inaandiiwan i’imaa nibiikaang; wiikaa ayagoozid.
Onji-mookisewan, mii go iwidi gaa-bi-inaabinid; o’ow idash ogii-igoon: “Geget sa gi-goshkongesiw,” ogii-igoon.
Mii dash gaa-izhi-giiwed a’aw bine mii dash gaye wiin gaa-izhi-maajiiyaadagaad, mii sa gaa-izhi-agwaadaad.
Mii dash miinawaa gii-ani-maajaad.
“Gonige Gii-wiinzomwaadog?" ogii-inaan i’iw wayaabamaad.
"Mii nange," ogii-igoon; "o’ow nindizhinikaazomin, Goshkongesiinag, nindigoomin."
"Geget sa, mii nangwani iw ezhinikaazoyeg!"
Mii dash gaa-izhi-miijinaad, o’ow dash gaa-izhi-inaad: “Wa’aw gosha eta Goshkongesii, ogow gosha eta,” ogii-inaan.
Mii dash gaa-ni-zhi-maajaad, gii-ani-babimosed.
Gaa-izhi-madaabiid i’iw Gichigami, ogii-waabandaan Gichi-giishkaabikaanig; inaabid, Geget naawi-naagwadini iwidi nibiikaang.
“Onjida maawiin nindaa-izhi-kwaashkwan ikwedog ataading, aapiji go dataakonjiigwaned.
Onjida maawiin nintaa-izhi-kwaashkwan: ‘Awegwen ge-izhi-kwaashkwanigwen?’ ikidong.
Onjida maawiin nindaa-izhi-kwaashkwan."
Mii go imaa eko-giibaabikaanig niibawid.
O’ow dash doodam, miizan ezhi-waaninigaadenid.
Mii dash zhigwa gii-odisaad o’owedi gaa-miijinimind mii i'iw oniijaanisa’.
"Aaniin gaadiyeg?" odinaa' i'i'w oniijaanisa’.
“Gaa, nangwana Nenaboozhoo ningii-miijinigonaan.”
“Ningodanoo maawiin inaawegoban.”
“Gaawiin,” Gii-ikido a’aw bezhig i’imaa moowiing osibidood.
“Geget ninga-gwejimigonaan, ‘Aaniin ezhinikaazoyeg?’ ningii-igonaan
O’ow idash ningii-inaanaan, ‘Goshkongesiinag nindigoomin,’ ningii-inaanaan.
O’ow idash gii-ikido: ‘Naabisa Goshkongesi!’ ningii-igonaan; mii dash gaa-izhi-mamashkijishiyangid, mii dash gaa-ani-zhi-maajaad.”
Wa’aw idash weniijaanizit gaa-izhi-giziibiiginaad; gaa-ishkwaa-giziibiiginaad, zhigwa gaa-izhi-maajaad.
“Mishanim!” ogii-inaan Nenaboozhoowan.
Mii dash gaa-izhi-adimaad i’imaa giishkaabikaang, mii dash besho ogii-onzaabamaan.
Mii dash gaa-inenimaad: “Wiikaage sa miinawaa da-waaninigaadeni.”
Zhigwa Geget ombigaadeni Nenaboozhoo.
“Onjida sa nindaa-izhi-kwaashkwan ningodwaakwa’aagan ekwo-jiingwaned adaading.”
Mii dash gaa-izhi-bazigwa’od a’a’w bine, mii dash gaa-izhi-gwaashkwaninid i’imaa giishkaabikaang.
Mii dash i’imaa gaa-izhi-booniid ganawaabamaad animibizonid; mii dash i’iwidi nibiikaang gaa-izhi-bangishininid.
Mii dash i’imaa gaa-onzaabimaad, geget gabeya’ii gii-inaandiiwan i’imaa nibiikaang; wiikaa ayagoozid.
Onji-mookisewan, mii go iwidi gaa-bi-inaabinid; o’ow idash ogii-igoon: “Geget sa gi-goshkongesiw,” ogii-igoon.
Mii dash gaa-izhi-giiwed a’aw bine mii dash gaye wiin gaa-izhi-maajiiyaadagaad, mii sa gaa-izhi-agwaadaad.
Mii dash miinawaa gii-ani-maajaad.
