Nanabushu Pretends to be a Woman
WomanMii sa eni-izhi-maajaad babimosed.
Mii sa ogii-debitawaa’ ikwewa’ manisenid; aaniish ogiimitawaa’:
“Amanjigish ge-izhchige’ongobanen ji-wiidigemang a’aw inini?” ikidowa’.
“Ambe sa noo, wawiyazh ninga-doodawaag awegweniwigwenag,” gii-inendam Nenaboozhoo
Ogikenimaan ge-mawinid wegwisisinid.
Mii dash gaa-izhi-wawezhi’od gaa-izhi-ikwekaazod.
Mii dash adikoo’obiinisagosiin mii dash iniw gaa-aawechiged i’iw ikweng.
Gaa-izhinaagwo’od, gaa-izhi-naazikawaad i’iw ikwewa’, o’ow idash ogii-inaa’ apii gaa-odisaad:
“Aaniindi ayaad a’aw inini zhiingenimaad i’iw ikwewa’ gaa-inind?”
Mii dash gaa-igod: “Mii omaa naaw-oodena ayaad,” ogii-igoo’.
“Gagwaanisagizi, endogwen ji-inendang.”
“Daga shkomaa, awii-inik,” odinaa’; “Nin-bi-izhi-nisha’ogoo ni-niigi’igoog,’” odinaa’ iw ikwewa’.
Mii sa geget gaa-izhi-giiwed bezhig, gaa-izhi-wiindamawind wa’aw mindimooyenh wegosisid.
E-kidod a’aw ikwe mayaajii’aajimod: “Biiwide omaa ayaa.”
O’ow dash ikido: “Nimbi-izhinizha’ogoo ni-niigi’igoog,” ikido.
“Mii dash gaa-pi-izhi-maajinizha’od, ‘awi-dibaajimon,’ nindig.
Ni-zhaagwenim. ‘Daa-bi-izhaawag nindaangwayag.’(1)”
Mii dash e-kidod aw mindimooye(2): “Aaniin dash i’iw andawaabamaasiweg,(1)” odinaa’ i’iw odaanisa’.
Mii dash geget ba-izhi-nandawaabamaawaad igiw ikwewag, mii sa gaa-giiwewiijiiwaawaad igiw ikwewag. (1)
Mii dash gaa-izhi’onoode’ind iwidi wendabinid iniw niniwan. (3)
Mii sa zhigwa gii-onaabemid. (1) (4)
Zhigwa owiishaamaa’ odaangweya’ ji-manisewaad(5).
Aaniish ajina go gii-mamadwe’igewan, aazha niibiwa misan.
“Awenen dash aw memindage ge-zhi-nshawisid?” odinaawaan, owiindamawaawaan ogiwaan.
“Geget sa gii-zhi-nshawisii a’aw nindaangwewaan.” (6)
Aaniish geget sa minwendam a’aw mindimooye, gaye a’aw akiwenzii gii-zhinshawisinid ona’aanganikwemiwaan.(7)
Mii dash gaa-izhi-ganoonaad waabizheshiwan:
“Ambe sa noo wiidookawishin o’ow ezhichigeyaan,” ogii-inaan.
Mii dash iniw gaa-oniijaanisid; o’ow idash ogii-inaan:
“Ambe sa noo, moozhag mawin,” ogii-inaan.
Mii dash geget gaa-izhichigenid,
dakobinaad ezhichiged mii eta i’imaa shkiinzhigoning zagapinaad; dakobinaad bimoomaawizod.
Mii sa go pane mawinid.
“Wo’ow idash ikidon,” ogii-inaan.
“ ‘Dagwaagishoob niwii-amwaa,’ ikidon i’iw ji-mamawiyan,” ogii-inaan.
Mii dash geget enwed a’aw abinoojii.
“Dagwaagishoob niwii-amwaa!” inwed.
Zhayiigwa nisidotawaa.
Aaniish zhigwa zaagidoowan ozhinisan, aaniish ogimaawiwan; booch gii-zhichigenid i’iw anishinaabe ge-ikidod a’aw akiwenzii.
“Aaniish, anishinaabedog, e-kidod wa’aw noozhishenh, ‘dagwaagishoob niwii-amwaa,’” ikido.
Mii dash geget ge-bi-izhi-miinind Nenaboozhoo dagwaagishoobiin.
Bizaan apii gaa-onizhishininig maajid.
Mii dash waawiidigemaad iniw ininiwan, zhigwa ogikenimaan bigishkananinid iniw obiinisagosiin.
Mii dash gigizheb aazha namadabiwan ozhinisan gaye ozigosisan mii sa zhigwa gikenimaad bigishkanijijaakaamaad.
“Bisoo,” ikidowan ozhinisan.
“Wegonenda gaa-izhimaagwag?” ikidowan ozhinisan.
Geget mamiidaawendam; e-zhi-bazigwiid, aano-anishigaskabenid.
Ezhi-bangishimaad ozhinisan e-naasamabinid, ezhi-maajiibatood.
“Gegeti go ikwe inendamoog!” ikidowan Nenaboozhoowan.
Mii sa ogii-debitawaa’ ikwewa’ manisenid; aaniish ogiimitawaa’:
“Amanjigish ge-izhchige’ongobanen ji-wiidigemang a’aw inini?” ikidowa’.
“Ambe sa noo, wawiyazh ninga-doodawaag awegweniwigwenag,” gii-inendam Nenaboozhoo
Ogikenimaan ge-mawinid wegwisisinid.
Mii dash gaa-izhi-wawezhi’od gaa-izhi-ikwekaazod.
Mii dash adikoo’obiinisagosiin mii dash iniw gaa-aawechiged i’iw ikweng.
Gaa-izhinaagwo’od, gaa-izhi-naazikawaad i’iw ikwewa’, o’ow idash ogii-inaa’ apii gaa-odisaad:
“Aaniindi ayaad a’aw inini zhiingenimaad i’iw ikwewa’ gaa-inind?”
Mii dash gaa-igod: “Mii omaa naaw-oodena ayaad,” ogii-igoo’.
“Gagwaanisagizi, endogwen ji-inendang.”
“Daga shkomaa, awii-inik,” odinaa’; “Nin-bi-izhi-nisha’ogoo ni-niigi’igoog,’” odinaa’ iw ikwewa’.
Mii sa geget gaa-izhi-giiwed bezhig, gaa-izhi-wiindamawind wa’aw mindimooyenh wegosisid.
E-kidod a’aw ikwe mayaajii’aajimod: “Biiwide omaa ayaa.”
O’ow dash ikido: “Nimbi-izhinizha’ogoo ni-niigi’igoog,” ikido.
“Mii dash gaa-pi-izhi-maajinizha’od, ‘awi-dibaajimon,’ nindig.
Ni-zhaagwenim. ‘Daa-bi-izhaawag nindaangwayag.’(1)”
Mii dash e-kidod aw mindimooye(2): “Aaniin dash i’iw andawaabamaasiweg,(1)” odinaa’ i’iw odaanisa’.
Mii dash geget ba-izhi-nandawaabamaawaad igiw ikwewag, mii sa gaa-giiwewiijiiwaawaad igiw ikwewag. (1)
Mii dash gaa-izhi’onoode’ind iwidi wendabinid iniw niniwan. (3)
Mii sa zhigwa gii-onaabemid. (1) (4)
Zhigwa owiishaamaa’ odaangweya’ ji-manisewaad(5).
Aaniish ajina go gii-mamadwe’igewan, aazha niibiwa misan.
“Awenen dash aw memindage ge-zhi-nshawisid?” odinaawaan, owiindamawaawaan ogiwaan.
“Geget sa gii-zhi-nshawisii a’aw nindaangwewaan.” (6)
Aaniish geget sa minwendam a’aw mindimooye, gaye a’aw akiwenzii gii-zhinshawisinid ona’aanganikwemiwaan.(7)
Mii dash gaa-izhi-ganoonaad waabizheshiwan:
“Ambe sa noo wiidookawishin o’ow ezhichigeyaan,” ogii-inaan.
Mii dash iniw gaa-oniijaanisid; o’ow idash ogii-inaan:
“Ambe sa noo, moozhag mawin,” ogii-inaan.
Mii dash geget gaa-izhichigenid,
dakobinaad ezhichiged mii eta i’imaa shkiinzhigoning zagapinaad; dakobinaad bimoomaawizod.
Mii sa go pane mawinid.
“Wo’ow idash ikidon,” ogii-inaan.
“ ‘Dagwaagishoob niwii-amwaa,’ ikidon i’iw ji-mamawiyan,” ogii-inaan.
Mii dash geget enwed a’aw abinoojii.
“Dagwaagishoob niwii-amwaa!” inwed.
Zhayiigwa nisidotawaa.
Aaniish zhigwa zaagidoowan ozhinisan, aaniish ogimaawiwan; booch gii-zhichigenid i’iw anishinaabe ge-ikidod a’aw akiwenzii.
“Aaniish, anishinaabedog, e-kidod wa’aw noozhishenh, ‘dagwaagishoob niwii-amwaa,’” ikido.
Mii dash geget ge-bi-izhi-miinind Nenaboozhoo dagwaagishoobiin.
Bizaan apii gaa-onizhishininig maajid.
Mii dash waawiidigemaad iniw ininiwan, zhigwa ogikenimaan bigishkananinid iniw obiinisagosiin.
Mii dash gigizheb aazha namadabiwan ozhinisan gaye ozigosisan mii sa zhigwa gikenimaad bigishkanijijaakaamaad.
“Bisoo,” ikidowan ozhinisan.
“Wegonenda gaa-izhimaagwag?” ikidowan ozhinisan.
Geget mamiidaawendam; e-zhi-bazigwiid, aano-anishigaskabenid.
Ezhi-bangishimaad ozhinisan e-naasamabinid, ezhi-maajiibatood.
“Gegeti go ikwe inendamoog!” ikidowan Nenaboozhoowan.