The Origin of Likeness of Nenabosho
Mii dash imaa gchi-gbeyiing gii-yaad wa Nenabosho.
Ngoding dash gii-aanjiiwag Nenaboozhoo wiidgemaagnan, gookmisan dash ogii-wiijii’aagoowaan.
Pane gii-ndawenjige.
Nenaboozhoo, amikwan gaye gii-nooj’aan; naab’gan gii-zhitoon Nenaboozhoo mii wi gaa-aabajtood mikwan gii-bjibwaad; michigiw(1) zhinkaade wi okan gaa-zhitood.
Ngoding dash gii-mkawaan gchi-amikwan daanid mii owe gchi-gaming, aapji maangmingizwag.
Mii dash e-naad wiidgenmaagnan: “Nga-nooj’aag giwi amikwag.”
Niizhinoon niwi amikwag endaawaad, mii iwe bezhig Minong(2) miinwaa dash Mishibiigwadoo-mnising.(3)
Mii iwe gaye amikwag gaa-daawagbanen.
Ogii-biig’aanan niwi amik-gamgoon.
Mii dash gii-bbaamaazhgaamed owe gchi-gami; aanind gii-nsaan amikoonsan bezhig gaye gchi-amikwan; bezhig dash gchi-amikwan gaawiin mkawaasiin.
Gegpii dash gii-nendam: “Indawaa nga-biig’aan wi gbaakwignan,(4) maanoo dash da-skate maanda gchi-gami, mii wi ji-mkawag wa amik.”
Mii dash gaa-zhi-wiijiiwaad gookmisan widi gbaakwigning.
Pii dash gaa-biig’ang gbaakwigan, “Mii maa yaan, ga-kwaabmaa wa amik jibwaa-bmaaboozod wa amik,” dinaan.
Aa! Mii dash gii-zaagjiwang wi nbi.
Miinwaa dash Nenaboozhoo gii-maajiiyaazhgaame naagdood maanda gchi-gami.
Mii dash maa Mishibigwadoo-mnising gaa-aazhigwaashkonid; megwaa dash imaa naaniibwid waabmaan ngigwan eni-skatenig.
Mii dash gaa-ni-bskaabigwaashkonid, mii dash imaa gii-zhaazh’shing zhashkiikaang, gii-zhaashkjiishkweshing.
Mii dash gaa-bzigwiid, gii-baaptoon imaa gaa-mzinaakdiyeshing; myaa go e-zhinaagzid zhinaagwadni.
“Maanoo, noozhshenyag(5) bjiinag ge-ni-bmaadziwaad oga-baaptoonaawaa.”
Mii dash gaa-zhi-noopnanaad niwi ngigwan gii-bjibwaan wi mchigiwanit.
Wii-wiisni giiwenh.
“Indawaa kawe nga-mwaa wa ngig(6),” gii-nendam.
Mii dash gaa-zhi-bkonaad, gii-boodwe; mii dash ezhi-bwed.
Pii dash gaa-giizhizwaad, gii-bdakinaan.
Mii wi ezhi-wawenabid.
Zhigwa dash gaa-giizhkizhang bezhig wi ngig-otawag,(7) mii wi noondwaad gookmisan mdwe-gwiishk’zhinid widi Baawting.
Mii dash gaa-zhi-bzingonjised, gii-maajiibtood.
Pii dash begmabtood widi Baawting, “Aaniin?” dinaan gookmisan.
Mii dash ekidod wa magkii-mdimooye;(8) “Zhaazhi go gii-bmaaboozo wa amik.”
Epiichi-nshkaadzid dash wa Nenaboozhoo mii wi gaa-zhi-naaniimadwaad niwi gookmisan.
Mziwe dash gii-mskwiiwaabkaa wi wajiw.
“Magkiiwaabkong da-zhinkaade,” gii-kido Nenaboozhoo.
Mii dash widi aano-gii-bbaa-ndawaabmaad niwi amikwan, gaawiin dash ogii-mkawaasiin.
Miinwaa dash gii-bi-giiwe, geyaabi gii-bbaa-ndawaabanjiged geyaabi ji-yaanid amikwan; gaawiin dash wiya gii-mkawaasiin.
Mziwe aano-gii-bbaa-zhaa; imaa amik-gamgoon gaa-nji-biig’ang, mii eta mtigoon gaa-biingdamwaad amikwag gaa-waabandangin.
Miinwaa dash gii-ni-giiwe’aazhgaame.
Pane dash go enso-waamdang eni-piiskaad oodi gaa-nji-mzinaakdiyeshing, gchi-baaptoon.
Mii dash imaa Mishibiigwadoo-wiikwedong mii maa gaa-zhi-wenabid.
“Giishpin anishnaabeg ge-bmi-waabmiwaad giishpin bangii semaan miizhwaad nendawendmowaad ji-naam’amwaad, mii wi negaaj ji-boodaajgeyaan.”
Mii dash go imaa pane nmadbid, anishnaabe gii-nmadbid, mii wi ezhinaagwag wi asin(9).
Mii dash go geget e-zhwebag; giishpin wiya bngii bgidnaad semaan, “Nenaboozhoo! G-biindaakoonin ga-bgosenmin ji-mnowaanmak,” mii go geget ezhi-mnowaanmak.
Mii sa ekoozid, binewidis gii-agoode.
Ngoding dash gii-aanjiiwag Nenaboozhoo wiidgemaagnan, gookmisan dash ogii-wiijii’aagoowaan.
Pane gii-ndawenjige.
Nenaboozhoo, amikwan gaye gii-nooj’aan; naab’gan gii-zhitoon Nenaboozhoo mii wi gaa-aabajtood mikwan gii-bjibwaad; michigiw(1) zhinkaade wi okan gaa-zhitood.
Ngoding dash gii-mkawaan gchi-amikwan daanid mii owe gchi-gaming, aapji maangmingizwag.
Mii dash e-naad wiidgenmaagnan: “Nga-nooj’aag giwi amikwag.”
Niizhinoon niwi amikwag endaawaad, mii iwe bezhig Minong(2) miinwaa dash Mishibiigwadoo-mnising.(3)
Mii iwe gaye amikwag gaa-daawagbanen.
Ogii-biig’aanan niwi amik-gamgoon.
Mii dash gii-bbaamaazhgaamed owe gchi-gami; aanind gii-nsaan amikoonsan bezhig gaye gchi-amikwan; bezhig dash gchi-amikwan gaawiin mkawaasiin.
Gegpii dash gii-nendam: “Indawaa nga-biig’aan wi gbaakwignan,(4) maanoo dash da-skate maanda gchi-gami, mii wi ji-mkawag wa amik.”
Mii dash gaa-zhi-wiijiiwaad gookmisan widi gbaakwigning.
Pii dash gaa-biig’ang gbaakwigan, “Mii maa yaan, ga-kwaabmaa wa amik jibwaa-bmaaboozod wa amik,” dinaan.
Aa! Mii dash gii-zaagjiwang wi nbi.
Miinwaa dash Nenaboozhoo gii-maajiiyaazhgaame naagdood maanda gchi-gami.
Mii dash maa Mishibigwadoo-mnising gaa-aazhigwaashkonid; megwaa dash imaa naaniibwid waabmaan ngigwan eni-skatenig.
Mii dash gaa-ni-bskaabigwaashkonid, mii dash imaa gii-zhaazh’shing zhashkiikaang, gii-zhaashkjiishkweshing.
Mii dash gaa-bzigwiid, gii-baaptoon imaa gaa-mzinaakdiyeshing; myaa go e-zhinaagzid zhinaagwadni.
“Maanoo, noozhshenyag(5) bjiinag ge-ni-bmaadziwaad oga-baaptoonaawaa.”
Mii dash gaa-zhi-noopnanaad niwi ngigwan gii-bjibwaan wi mchigiwanit.
Wii-wiisni giiwenh.
“Indawaa kawe nga-mwaa wa ngig(6),” gii-nendam.
Mii dash gaa-zhi-bkonaad, gii-boodwe; mii dash ezhi-bwed.
Pii dash gaa-giizhizwaad, gii-bdakinaan.
Mii wi ezhi-wawenabid.
Zhigwa dash gaa-giizhkizhang bezhig wi ngig-otawag,(7) mii wi noondwaad gookmisan mdwe-gwiishk’zhinid widi Baawting.
Mii dash gaa-zhi-bzingonjised, gii-maajiibtood.
Pii dash begmabtood widi Baawting, “Aaniin?” dinaan gookmisan.
Mii dash ekidod wa magkii-mdimooye;(8) “Zhaazhi go gii-bmaaboozo wa amik.”
Epiichi-nshkaadzid dash wa Nenaboozhoo mii wi gaa-zhi-naaniimadwaad niwi gookmisan.
Mziwe dash gii-mskwiiwaabkaa wi wajiw.
“Magkiiwaabkong da-zhinkaade,” gii-kido Nenaboozhoo.
Mii dash widi aano-gii-bbaa-ndawaabmaad niwi amikwan, gaawiin dash ogii-mkawaasiin.
Miinwaa dash gii-bi-giiwe, geyaabi gii-bbaa-ndawaabanjiged geyaabi ji-yaanid amikwan; gaawiin dash wiya gii-mkawaasiin.
Mziwe aano-gii-bbaa-zhaa; imaa amik-gamgoon gaa-nji-biig’ang, mii eta mtigoon gaa-biingdamwaad amikwag gaa-waabandangin.
Miinwaa dash gii-ni-giiwe’aazhgaame.
Pane dash go enso-waamdang eni-piiskaad oodi gaa-nji-mzinaakdiyeshing, gchi-baaptoon.
Mii dash imaa Mishibiigwadoo-wiikwedong mii maa gaa-zhi-wenabid.
“Giishpin anishnaabeg ge-bmi-waabmiwaad giishpin bangii semaan miizhwaad nendawendmowaad ji-naam’amwaad, mii wi negaaj ji-boodaajgeyaan.”
Mii dash go imaa pane nmadbid, anishnaabe gii-nmadbid, mii wi ezhinaagwag wi asin(9).
Mii dash go geget e-zhwebag; giishpin wiya bngii bgidnaad semaan, “Nenaboozhoo! G-biindaakoonin ga-bgosenmin ji-mnowaanmak,” mii go geget ezhi-mnowaanmak.
Mii sa ekoozid, binewidis gii-agoode.