Nanabushu and the Moose-Head

Mii dash gii-ani-maajaad.

Mii dash gii-nagishkawaad ininiwan, aapiji onizhishiwan.

Aa, miigwana’ oshtigwaaning!

Nenaboozhoo oganoonaan: “Aa, niijii, aaniindi ezhaayan?”

“Aa, anishaa sa go nimbabaamaadis; giin idash, aaniindi ezhaayan?” (1)

“Gaa, anishaa go naa gaye niin nimbabaamaadis.”

Mitigwaabiin odakonaan a’aw inini, Nenaboozhoo dash oganoonaan: “Daa, niijii geget sa onizhishi gi-mitigwaab.

Shkomaa biish, ninga-gagwedaagibiinaa.”

“Aa, gaawiin! Gaa wiikaa awiya nindawi’aasii.”

“Aa, maanoo, niijii, gaa na gegoo ajina!”

Ginwenzh ogii-dashimaan.

Gegapii ogii-miinigoon iniw mitigwaabiin, Nenaboozhoo dash ogagwedaagibiinaan mitigwaabiin.

“Taa geget sa minwaagizi.

Shkomaa wiin i’iwe gidasawaan.”

Ginwenzh aanawi ogii-saagitaagoon, gegapii ogii-miinigoon.

Mii idash gaa-izhi-naabisidood i’imaa ajaabiing; mii idash gagwedaagibiinaad Nenaboozhoo mitigwaabiin, mii iw gaa-izhi-bimwaad iniw iniwan gaa-nagishkawaapan.

Moonzong gii-izhinaagoziwan apii gaa-nisaad; aapiji wiininoowan.

Gichi-minwendam Nenaboozhoo gichi-wiisinid.

Mii idash gaa-izhi-pi-gishkizhwaad iniw moozoon, aapiji dash wenizhishing wiiyaas ogii-kiizhizaan waa-miijid; bimide gaye.

Gaa-giizhidenig, mii dash gii-agwaa’izekwed.

Zhigwa wii-maadanjiged, giziibaakwad.

“Ji’iin, ji’iin,” inwenig.

Gaawiin ominotanziin.

“Ishte, bizaan daga!”

Eshkam igo gizhiiwe i’iw giziibaakwad.

Nenaboozhoodazh gii-pasigwii, ogii-manizhaan bangii ozhoobiin.

Mii dash edang i’iw giziibaakwad: “Geget sa gidoombiigis.

Gii-wanishkwem wii-wiisiniyaan.

Owe gaye giin miijin.”

Mii dash Nenaboozhoo atood i’iw bimide giziibaakwad ogii-dakwamigon.

Mii imaa gii-agoojing gichi-ginwenzh, biinish anooj awesiiyag – ma’iinganag; gwiingwa’aageg, ojiigag, waagoshag – gii-dagwishinoog gii-amwaawaad moozoon; gaagaagiwag gaye.

Baanimaa gakina gaa-gidamond a’aw mooz mii iw bijiinag, gii-pagidamigod Nenaboozhoo i’iw giziibaakwad.

Aapiji wii-wiisini gii-izhaa i’imaa abinipan iniw moozoon.

Mii eta okanan etenig, oshtigwaanigegan gaye ateni.

Mii dash ezhi-waabamaad wawaabiganoojiiya’ biindigenid imaan mooz oshtigwaaning.

Owaabandaan bangii atenig wiinindib.

“Apegish miijiyaan!” inendam mii dash ezhi-ganoonaad waawaabiganoojiiya’: “Gidaa-gashkitoonaawaa na gaye niin i’iw ji-iniginiyaan eyaniginiyeg?”

“Aa, gaawiin!” odigoon.

“Ozaam gi-mindid,” odigoon.

“Aa, maanoo gaye niin niwii-piindige imaa mooz oshtigwaaning!”

“Ahaaw isa,” odigoon. 

“Omaa eta gi-shtigwaaning giga-dagaashiiniy”

Mii dash waawaabiganoojiiying gii-inikogo ishtigwaaned.

Mii dash gii-piindikwenid, “Bekaa go wiisinin,” odigoon.

“Gego ombikweniken,” odigoon.

Ozaam idash Nenaboozhoo gii-ombikweni, mii dash gaa-izhi-michaanig oshtigwaan.

Gaawiin gii-gashki’osii ji-giichigotaad.

Mii dash gaa-izhi-maajaad dibi e-zhaagwenh, gaawiin owaabandanziin e-zhaad.

Gakina mitigoon betaakoshing ogagwejimaan: “Awenen giin?”

Mina’ig naaningodinoo; wiigwaas naaniingodinoo; azaadiwan ningoding.

Miinawaa mitigoon obitaakoshkawaan, “Awenen giin?” odinaan.

Giizhik sa.

“Mii sa besho jiigibiig indayaamidog,” inendam.

Wiipago geget nibi odakogaadaan.

Mii dash igo gwayak gaa-ani-izhi-niiminaasiid, gii-ani-bimaadage gwayak igo e-zhaad.

Awiya onoondawaan biipaaginid anishinaaben: “E’ii, nashke gosha, mooz bemaadaged! Aaw! Mawinanaadaa!”

Mii dash geget ezhi-pooziwad anishinaabeg wii-nisaawaad moozoon.

Nenaboozhoo dash gii-washkibagizo.

“E’ii! Aazha washkaadage!”

Nenaboozhoo enigok bimaadage.

Anishinaabeg zhigwa besho bi-ayaawag.

Mii dash Nenaboozhoo zhigwa debakiinang, mii dash ezhi-maajiibatood bagwana, gaawiin owaabandanziin e-patood.

Mii dash gii-ozhashaabikishing, mii idash gii-paasesing i’iw moozoo-shtigwaanish.

Mii idash bijiinag gii-waabid.

Mii iw gii-ani-maajiibatood.

Nenaboozhoon wiin gaa-izhinaagozinid; mii apane dibi e-patoogwen Nenaboozhoo.

Mii sa ekoozid.