Nanabushu swallowed by the Sturgeon (1)
Mii dash giiwenh a’iin daawaad Nenaboozhoo ookomisan gaye.
Ningoding giiwenh Nenaboozhoo ezhi-naanaagadawendang inendam:
“Indige sa mii go niin gaa-izhi-pezhigowaanen,” inendam Nenaboozhoo.
Mii dash e-nendang: “Ninga-gagwejimaa nookomis.”
Aaniish inaa aadizookaan, mii dash geget e-naad ookomisan:
“Nookomis,” odinaan;
“mii na go giinawind eta go bimaadiziyang?” odinaan.
“Gaawiin na wiikaa niin ningii-ogiisii?” odinaan ookomisan.
“Mii na go ge-izhi-piinishi-bimaadiziyaan?” odinaan ookomisan.
Wiikaa dash oganoonigoonigod:
“Noozhis,” odigoon,
“mii sa go iw gegaa ge-kidoyaambaan.
Namadabin, nashke, giga-wiindamoon.
Bizindawishin weweni,” odigoon.
“Geget gii-anishinaabekaa; mii dash igo gii-ani-jaajaagi-onishinoowaad, biinish gaye wiinawaa igiw gi-niigii’igoog ged-inadwaaban gii-pezhigo gaye gi-sayenh,” odigoon.
“Gaye wiin dash gii-wanishin.
Giin dash gaye, nashke giga-wiindamoon gaa-onji-mookinaagoziyan omaa dash noongom gii-ayaayan.
Awe gi-sayenh mii aw gaa-niigid, i’iw idash ishkwaach e-yaamagag anishinaabe naagishin webinigaade dash iw; mii dash e-zhinikaadeg abinoojiinh odapikweshimon, izhinikaate.
Mii dash imaa giin wendaadiziyan, noozhis.
Apii gaa-niigid gi-sayenh, mii dash gii-saagijigaadeg ingoji dash gii-awi-agoojigaade.
Mii dash naagaj gaa-izhi-noondawind abinoojiinh madwe-mawid iwidi agoodeg iw bikweshimonens.
Mii dash gaa-izhi-izhaayaan, mii dash imaa gii-mikoonaam.
Mii dash niin gaa-izhi-nitaawigi’inaan,” odinaan.
“Gaye wiin dash gi-ga gi-sayenh ogii-nitaawigi’aan.
Mii dash ezhinikaazod aw gi-sayen’iban Nenaapaadam.
Mii dash gaye giin gaa-izhi-wiinigooyan Nenaboozhoo,” odigoon ookomisan.
Mii dash Nenaboozhoo gichi-naanaagadawendam, gashkendam gaye mikwenimaad nangwana gii-osayen’id.
Mii dash Nenaboozhoo zhayiigwa gii-wawenendang aaniin waa-izhichiged, mii dash e-naad ookomisan:
“Nookomis, maamakaadakamig wiikaa gegoo gii-izhisiwan iwi nangwana gii-izhiwebiziwaangen.”
“Onjida sa gaawiin gegoo gigii-wiiwiindamawasinoon,” odigoon ookomisan,
“anishaa ji-kahkendaman, gaye ji-gwii’inawi’inendanziyan,” odigoon ookomisan.
“Bizaan igo ji-pimaadiziyan; enishigo waabandaman giizhig baaji-wayaaseyaagin; gaye zhayiigwa giizis ba-mooka’angin ezhi-onaanigwendaagwag, ji-izhi-onaanigwendaman.
Mii i’iw wiikaa gaa-onji-kegoo-inisinowaan,” odigoon ookomisan.
Mii dash Nenaboozhoo zhayiigwa inaad ookomisan:
“Nookomis,” odinaan, “ninga-nandobani.
Ninga-nandawaabamaag awenenan gaa-nisigowaad ni-gii’igoog gaye ni-sayen.”
Mii dash e-god ookomisan: “Gego, noozhis.
Ingoji gigad-inigaatoon giiyaw,” odigoon.
“Gaawiin,” odinaan ookomisan, “booch igo ninga-nandawaabamaag.”
Mii dash ezhi-maajaad Nenaboozhoo awi-pisa’ang wii-ozhitood bikwakoon gaye sawaanan.
Mii dash giiwenh ba-izhi-kiiwed wayiiba go mii dash e-god ookomisan:
“Aaniin, noozhis?” odigoon.
“Gaawiin gegoo,” ikido Nenaboozhoo.
“Gaawiin biigwaasesinoon ni-waagaakwad.
Shkomaa siboojigan, nookomis.
Niwii-kiiniboodoon waagaakwad.”
Mii dash geget apagizod aw mindimooye, giiskabag idash naanikibidood siboojigan miinaad.
Mii dash ezhi-odaapinang Nenaboozhoo, mii dash ezhi-maajii-asiboojiged.
Mii dash Nenaboozhoo gomaa apii megwaa asiboojiged mii noondang e-god:
“Goos, gi-ga,” inweweg siboojigan.
“Wegonen wenji-ikidod?” inendam.
“Maagizhaa nookomis onjida niwii’ik gigaa-gwejimag,” inendam.
Miinawaa ezhi-maajii-siboojiged mii miinawaa e-nitang: “Goos, goos, goos, gi-ga, gi-ga, gi-ga.”
Aapiji Nenaboozhoo nishkaadizi.
“Na, nashke e-goyaan iw waagaakwad!” odinaan ookomisan.
“Anishaa gosha gid-initam apane iw izhi-kizhibendaman,” odinaan.
“Gaawiin,” odinaan Nenaboozhoo, “anishaa go ninga-gaanjigidemigon.”
Mii dash Nenaboozhoo geget nishkaadizid.
Mii dash ezhi-odaakinang miinawaa siboojigan.
Siboodood waagaakwad, mii go miinawaa e-god:
“Goos, goos, gi-sayenh, gi-sayenh,” odigoon.
Mii dash ezhi-pazigonjised; mii dash ezhi-nawajibidood waagaakwat;
ezhi-kichi-pabakiteowaad asiniin enaabidagaawaninig.
Mii dash geget gichi-ozhiitaad wii-maajaad; niibiwa ogii-ozhitoonan obikwakoon osawaanan gaye.
Anishinaa aadizookaan,
gaawiin dibaajigaadesinoon wegonen gaayoogwen gii-ozhitood gichi-niibiwa obikwakoon gaye odasawaanan,
iw giikiizhkaabidesidood owaagaakwad;
mii eta go debaajimind gii-kiizhiitaa’idizod.
Mii dash giiwenh Nenaboozhoo ezhi-maajaad.
Ishte, mii gaye iwe e-naajimind!
Gii-ozhitood jiimaan;
Gii-wiimbikawaad mitigoon;
eniginid igo ogii-inikokwaadoon inaa.
Mii dash gii-mawinewaad mishi-namegwen.
Mii dash giiwenh Nenaboozhoo ezhi-maajaad, boozhoo’aad(2) ookomisan.
Mii dash giiwenh e-god:
“Ayaangwaamizin, noozhis,” odigoon; “ingoji gigadi-nikaadoon giiyaw,” odigoon ookomisan.
“Gaawiin, nookomis, ninga-dagwishin miinawaa omaa,” odinaan.
Mii sa Nenaboozhoo zhayiigwa ezhi-pakobiinang ojiimaan, maajaad gwayak gichi-mishawagaam;
gegaa dash nenaawagaam degoshing, mii ezhi-piibaagid, nagamod:
“Mishi-namegwedog, mishi-namegwedog,
Wiikwanzhishin, wiikwanzhishin!”
Naagaj igo zhayiigwa maadaagamishkaa gichi-gami;
dibishkoo baawitig ezhi-pi-njiwang, mii epiitijiwang.
Mii dash geget Nenaboozhoo enigok nagamod:
“Mishi-namegwedog, wiikwanzhishig!
Giinawaa gaa-jaagi’egwaa ni-niigi’igoog, gaye niin dash wiikwanzhishig!”
Bijiinag igo gaa-ishkwaa-kidod, mii zhayiigwa waabamaad mishi-namegwen wiikwanigod.
Nitam igo gagizhibaa’aaboodeni iw jiimaan, mii dash e-nishikondaayaaboozod, ani-gomigod mishi-namegwen, gigi jiimaan.
Apane go giiwenh gaa-saaswenig otawagan; miinawaa mikawid, biindaagiiyaw giingoonyan ayaa.
Mii dash bizaan ayaad iwidi; mii dash giiwenh zhayiigwa gikenimaad iniw giigoonyan ani-maajiinigod.
Mii dash a’aw ogimaa-giigoonh giiwed endaawaad anaamibiing anaawaya’ii gichi-gaming.
Mii dash giiwenh madwe-kichi-sagaswe’idiwaad, madwe-kichi-gaye aanimitaagozinid; maamayawenid iw gii-komind.
Ningoding dash giiwenh megwaa nandodang, gegoo owaabandaan Nenaboozhoo bishaagiwiinigod.
Anishinaa aadizookaan.
Amanj ezhi-waabigobanen!
Nenaboozhoo owaabandaan giiwenh gegoo bishaagibidenig, mii nangwana aw mishi-namegwe ode benga’aninig.
Mii dash giiwenh bekaa ezhi-mamaajiid naanikinang odasawaan; mii dash ezhi-pabazhiba’ang.
Mii dash giiwenh naagaj noondawaad madwe-ikidonid:
“Aataa, geget sa naa ni-maazhide’e.”(3)
Mii dash medwe-izhi-nandodamawaad wiiwan ji-mina’igod gegoo ge-onji-shigagowed.
Mii dash zhayiigwa aano-wiikwodood ji-shishigagowed, gaawiin dash ogaskitoosiin.
Mii dash medwe-ikidod: “Gaawesa, Nenaboozhoo ni-maanikaag,” ikido.
Aanawi geget gichi-anokii Nenaboozhoo ji-shashigagowaanaasiwind; mii gaa-izhi-pimidaakwanang omitigwaabiin, mii dash iniw menjimaakwiid Nenaboozhoo.
Mii dash miinawaa mishi-namegwe e-kidod: “Gaawesa.
Ni-maanikaag Nenaboozhoo,” ikido.
Mii dash wayiiba gii-nibod, gii-nisaad Nenaboozhoo.
Aaniish aanawi gakina minik waadetoowaad gii-wiikondiwag ji-wii-pimaajii’aawaad odoogimaamiwan, aaniish gaawiin;
aaniish awiya ged-izhi-pimaadizid ode gii-pi-giishka’igaadenig?
Mii dash gaa-onji-nibonid.
Mii dash wiin Nenaboozhoo, imaa ayaad.
Mii dash geget gichi-izhichigewaad manidookaazowaad.
Aaniish aazha gii-nibo gichi-giigoonh.
Mii dash giiwenh waa-izhi-pagidenimaawaad, aanawi ginwenzh ogii-kanawenimaawaan;
maagizhaa da-aabijiibaa, gii-inendamoog.
Mii dash indawaaj giiwenh zhayiigwa bagidenimaawaad, nawaj naawij aandi aapiji dimiiyaag gichi-gami mii imaa awi-pagidenimaawaad.
Aapiji gichi-manidookaazowag.
Gakina dash wiin Nenaboozhoo ogikendaan enakamigadinig, wiin dash gaawiin awiya ogikenimigosiin imaa ayaad bimaadizid gaye.
Ogikenimaawaan gii-komimind, gaawiin dash wiin ogikenimaasiwaawaan bimaadizinid.
Mii dash gaa-ishkwaa-pagidenimaawaad, gii-bi-kiiweyaawanidiiwaad miinawaa.
Aapiji gii-paatayiinowag, miziwe e-nigokwaag iw gichi-gami gii-onjiwag gii-awi-pagidenimaawaad odoo-gimaamiwaan.
Mii dash giiwenh wiin Nenaboozhoo endazhi-wawenendag aaniin ged-izhi-kashkitood ji-saaga’ang imaa biinjaya’ii giigoonying gaye gii-ningwa’omind.
Mii dash zhayiigwa Nenaboozhoo gikendang aaniin ge-doodang, mii dash e-kidod:
“Aaw, ambe sa noo da-wii-kichi-izhiwebag wiikaa gaa-izhiwebisinog!”
Mii dash Nenaboozhoo gii-sagaswe’aad niiwing inakakeyaa wendabinid manidoo’.
Mii dash gii-nakomigod.
Mii dash geget gaa-izhi-kichi-nooding, gakina gegoo gii-pakodaamikaa’an imaa gii-kichi-gaming inaamaya’ii etegini.
Mii dash gaye wiin Nenaboozhoo, gii-moonaadaawangaa’ininig i’imaa ayaad;
mii dash aw giigoonh gaa-izhi-ogichibiiskaad.
Midaasogon gii-kichi-noodin, mii dash miinawaa gaa-izhi-kichi-anwaatin, mii dash gii-mooshkanjid aw mishi-namegwenh.
Mii dash ningoding igo Nenaboozhoo ayaad imaa anaamaya’ii giigoonying onoondaan gegoo aapiji minotaagodinig;
mii dash aazhi andodang, mii e-nidang: “(cry of gulls).”
Aapiji minotaagoziwan awiya; mii nangwana gayaashkwag.
“Ambe,” mii dash e-nendang Nenaboozhoo, “ninga-kanoonaag,” inendam.
Mii dash geget zhayiigwa miinawaa onoondawaa’ biidwewinaminid, mii go miinawaa baa-inwenid: “(cry of gulls).”
Mii dash ezhi-kanoonaad: “Ishte, ni-shiime sa!(4) shkomaa naa bagwanejiganaanandamawishiyok aw giigoonh!”
Mii dash gayaashkwag ezhi-pazigwa’owaad, gaye ani-noondaagoziwaad gagwaanisagakamig e-nitaagoziwaad.
Mii Nenaboozhoo gaa-izhi-nawadinangin otawagan, gaa-izhi-kipitenidisod.
Naagaj dash miinawaa gii-andodam, mii’sh miinawaa gii-kanoonaad:
“Aaw, nishiim(5), bagwanejiganaanandamawishiyok aw giigoonh!” odinaa’.
Mii dash geget ezhi-pisaanayaawaad.
Miinawaa dash oganoonaan: “Bagwanejiganaandamawishiyok aw giigoonh!” odinaan.
“Meshkod giga-sasegaa’ininim.”
Mii dash gayaashkwag ezhi-kanoonidiwaad: “Nenaboozhoo imaa ayaa.”
Gakina gonda awiya gii-kikenimigoon aw Nenaboozhoo.
Mii’sh miinawaa ezhi-kanoonaad: “Aaw, ni-shiimidog, bagwanejiganaandamawishiyok.
Meshkod giga-sasegaa’ininim; niigaan wenizhishid bebaamised gigad-izhi-onizhishi’inim,” odinaa’.
“Gaawiin gosha nindaa-kashki’aasiiwaanaan,” odigoo’.
“Awaw” odinaa’. “Giga-kashki’aawaa!”
Mii dash geget ezhi-maajitaawaad bagwanejiganaamawaad; wiikaa dash ogashki’aawaan.
Mii dash Nenaboozho gaa-izhi-saagidooded, gaye zaagiji-daabaadang ojiimaan mitigoon gaa-wiimbigawaapan.
Mii dash bijiinag weweni waabamaad iniw mishi-namegwen gaa-gomigod e-nigininid;
indigo minis e-gondeg ezhi-naagozinid agwanjininid.
Mii dash gaa-izhi-odaapinaad bezhig iniw gayaashkwan; mii dash gaa-izhi-wawezhi’aad.
Mii dash gaa-izhi-waabishki’aad, dibishkoo gooning gii-zhi’aad.
Mii dash gaa-inaad: “Giin wiin gayaashk gigad-ani-izhi-wiinigoo ji-ani-akiiwang.”
Mii dash geget gichi-minwendang waabandizod aw gayaashk ezhi-onizhishid.
“Aaw,” odinaan, “mii dash izhi-pazigo’iyok.”
Mii dash aaniish inaa aadizookaan, mii eta go bezhik dagimimind gii-odaapinaad gayaashkwan.
Mii dash booch gaa-izhi-onizhishiwaad gakina minik apii gakina bezigo’owaad.
Mii dash Nenaboozhoo gaa-izhi-maajitaad gii-pi-giishkizhwaad iniw giigoonyan.
Mii dash apii gaa-ishkwaa-nanawizhwaad, mii gii-ikidod gaye bekish gii-saswewebinaad:
“Giigoonh gigad-ani-zhi-wiinigoom ji-ani-akiiwang.
Gigad-amogowaag gaye anishinaabeg ji-ani-akiiwang. – Giin dash,” odinaan mishi-namegwen:
“Gaawiin miinawaa wiikaa gigad-iniginisii ji-ani-akiiwang, gaawiin awiya daa-pimaadizisii,” odinaan.
Mii dash geget gaa-izhiwebadinig giigoonyensa’ gichi-niibiwa gii-onji-ozhi’aad imaa mishi-namegweng.
Mii dash Nenaboozhoo ezhi-kiiwe’od nandawaabamaad ookomisan.
Eni-dagwishing idash omikawaan ookomisan aapiji gawendaminid.
Mii dash eni-zhi-dapaabid, mii’sh e-naad: “Nookomis, nindagwishin,” odinaan.
“Aay, wegodogwen sa pane wenji-izhi-waagwenoko, aya aawashensag!”
“Gaawiin, nookomis.
Niin gosha, Nenaboozhoo, goozhis, ba-dagwishin.”
Mii dash eni-zhi-piindiged.
Mii dash owaabamaad ookomisan agaawaa onzaabinid, apane iidog gii-mawinid.
Mii dash Nenaboozhoo aapiji zhawenimaad ookomisan.
Mii dash nawaj gaa-izhi-aanji-oskiniigi’aad.
Ningoding giiwenh Nenaboozhoo ezhi-naanaagadawendang inendam:
“Indige sa mii go niin gaa-izhi-pezhigowaanen,” inendam Nenaboozhoo.
Mii dash e-nendang: “Ninga-gagwejimaa nookomis.”
Aaniish inaa aadizookaan, mii dash geget e-naad ookomisan:
“Nookomis,” odinaan;
“mii na go giinawind eta go bimaadiziyang?” odinaan.
“Gaawiin na wiikaa niin ningii-ogiisii?” odinaan ookomisan.
“Mii na go ge-izhi-piinishi-bimaadiziyaan?” odinaan ookomisan.
Wiikaa dash oganoonigoonigod:
“Noozhis,” odigoon,
“mii sa go iw gegaa ge-kidoyaambaan.
Namadabin, nashke, giga-wiindamoon.
Bizindawishin weweni,” odigoon.
“Geget gii-anishinaabekaa; mii dash igo gii-ani-jaajaagi-onishinoowaad, biinish gaye wiinawaa igiw gi-niigii’igoog ged-inadwaaban gii-pezhigo gaye gi-sayenh,” odigoon.
“Gaye wiin dash gii-wanishin.
Giin dash gaye, nashke giga-wiindamoon gaa-onji-mookinaagoziyan omaa dash noongom gii-ayaayan.
Awe gi-sayenh mii aw gaa-niigid, i’iw idash ishkwaach e-yaamagag anishinaabe naagishin webinigaade dash iw; mii dash e-zhinikaadeg abinoojiinh odapikweshimon, izhinikaate.
Mii dash imaa giin wendaadiziyan, noozhis.
Apii gaa-niigid gi-sayenh, mii dash gii-saagijigaadeg ingoji dash gii-awi-agoojigaade.
Mii dash naagaj gaa-izhi-noondawind abinoojiinh madwe-mawid iwidi agoodeg iw bikweshimonens.
Mii dash gaa-izhi-izhaayaan, mii dash imaa gii-mikoonaam.
Mii dash niin gaa-izhi-nitaawigi’inaan,” odinaan.
“Gaye wiin dash gi-ga gi-sayenh ogii-nitaawigi’aan.
Mii dash ezhinikaazod aw gi-sayen’iban Nenaapaadam.
Mii dash gaye giin gaa-izhi-wiinigooyan Nenaboozhoo,” odigoon ookomisan.
Mii dash Nenaboozhoo gichi-naanaagadawendam, gashkendam gaye mikwenimaad nangwana gii-osayen’id.
Mii dash Nenaboozhoo zhayiigwa gii-wawenendang aaniin waa-izhichiged, mii dash e-naad ookomisan:
“Nookomis, maamakaadakamig wiikaa gegoo gii-izhisiwan iwi nangwana gii-izhiwebiziwaangen.”
“Onjida sa gaawiin gegoo gigii-wiiwiindamawasinoon,” odigoon ookomisan,
“anishaa ji-kahkendaman, gaye ji-gwii’inawi’inendanziyan,” odigoon ookomisan.
“Bizaan igo ji-pimaadiziyan; enishigo waabandaman giizhig baaji-wayaaseyaagin; gaye zhayiigwa giizis ba-mooka’angin ezhi-onaanigwendaagwag, ji-izhi-onaanigwendaman.
Mii i’iw wiikaa gaa-onji-kegoo-inisinowaan,” odigoon ookomisan.
Mii dash Nenaboozhoo zhayiigwa inaad ookomisan:
“Nookomis,” odinaan, “ninga-nandobani.
Ninga-nandawaabamaag awenenan gaa-nisigowaad ni-gii’igoog gaye ni-sayen.”
Mii dash e-god ookomisan: “Gego, noozhis.
Ingoji gigad-inigaatoon giiyaw,” odigoon.
“Gaawiin,” odinaan ookomisan, “booch igo ninga-nandawaabamaag.”
Mii dash ezhi-maajaad Nenaboozhoo awi-pisa’ang wii-ozhitood bikwakoon gaye sawaanan.
Mii dash giiwenh ba-izhi-kiiwed wayiiba go mii dash e-god ookomisan:
“Aaniin, noozhis?” odigoon.
“Gaawiin gegoo,” ikido Nenaboozhoo.
“Gaawiin biigwaasesinoon ni-waagaakwad.
Shkomaa siboojigan, nookomis.
Niwii-kiiniboodoon waagaakwad.”
Mii dash geget apagizod aw mindimooye, giiskabag idash naanikibidood siboojigan miinaad.
Mii dash ezhi-odaapinang Nenaboozhoo, mii dash ezhi-maajii-asiboojiged.
Mii dash Nenaboozhoo gomaa apii megwaa asiboojiged mii noondang e-god:
“Goos, gi-ga,” inweweg siboojigan.
“Wegonen wenji-ikidod?” inendam.
“Maagizhaa nookomis onjida niwii’ik gigaa-gwejimag,” inendam.
Miinawaa ezhi-maajii-siboojiged mii miinawaa e-nitang: “Goos, goos, goos, gi-ga, gi-ga, gi-ga.”
Aapiji Nenaboozhoo nishkaadizi.
“Na, nashke e-goyaan iw waagaakwad!” odinaan ookomisan.
“Anishaa gosha gid-initam apane iw izhi-kizhibendaman,” odinaan.
“Gaawiin,” odinaan Nenaboozhoo, “anishaa go ninga-gaanjigidemigon.”
Mii dash Nenaboozhoo geget nishkaadizid.
Mii dash ezhi-odaakinang miinawaa siboojigan.
Siboodood waagaakwad, mii go miinawaa e-god:
“Goos, goos, gi-sayenh, gi-sayenh,” odigoon.
Mii dash ezhi-pazigonjised; mii dash ezhi-nawajibidood waagaakwat;
ezhi-kichi-pabakiteowaad asiniin enaabidagaawaninig.
Mii dash geget gichi-ozhiitaad wii-maajaad; niibiwa ogii-ozhitoonan obikwakoon osawaanan gaye.
Anishinaa aadizookaan,
gaawiin dibaajigaadesinoon wegonen gaayoogwen gii-ozhitood gichi-niibiwa obikwakoon gaye odasawaanan,
iw giikiizhkaabidesidood owaagaakwad;
mii eta go debaajimind gii-kiizhiitaa’idizod.
Mii dash giiwenh Nenaboozhoo ezhi-maajaad.
Ishte, mii gaye iwe e-naajimind!
Gii-ozhitood jiimaan;
Gii-wiimbikawaad mitigoon;
eniginid igo ogii-inikokwaadoon inaa.
Mii dash gii-mawinewaad mishi-namegwen.
Mii dash giiwenh Nenaboozhoo ezhi-maajaad, boozhoo’aad(2) ookomisan.
Mii dash giiwenh e-god:
“Ayaangwaamizin, noozhis,” odigoon; “ingoji gigadi-nikaadoon giiyaw,” odigoon ookomisan.
“Gaawiin, nookomis, ninga-dagwishin miinawaa omaa,” odinaan.
Mii sa Nenaboozhoo zhayiigwa ezhi-pakobiinang ojiimaan, maajaad gwayak gichi-mishawagaam;
gegaa dash nenaawagaam degoshing, mii ezhi-piibaagid, nagamod:
“Mishi-namegwedog, mishi-namegwedog,
Wiikwanzhishin, wiikwanzhishin!”
Naagaj igo zhayiigwa maadaagamishkaa gichi-gami;
dibishkoo baawitig ezhi-pi-njiwang, mii epiitijiwang.
Mii dash geget Nenaboozhoo enigok nagamod:
“Mishi-namegwedog, wiikwanzhishig!
Giinawaa gaa-jaagi’egwaa ni-niigi’igoog, gaye niin dash wiikwanzhishig!”
Bijiinag igo gaa-ishkwaa-kidod, mii zhayiigwa waabamaad mishi-namegwen wiikwanigod.
Nitam igo gagizhibaa’aaboodeni iw jiimaan, mii dash e-nishikondaayaaboozod, ani-gomigod mishi-namegwen, gigi jiimaan.
Apane go giiwenh gaa-saaswenig otawagan; miinawaa mikawid, biindaagiiyaw giingoonyan ayaa.
Mii dash bizaan ayaad iwidi; mii dash giiwenh zhayiigwa gikenimaad iniw giigoonyan ani-maajiinigod.
Mii dash a’aw ogimaa-giigoonh giiwed endaawaad anaamibiing anaawaya’ii gichi-gaming.
Mii dash giiwenh madwe-kichi-sagaswe’idiwaad, madwe-kichi-gaye aanimitaagozinid; maamayawenid iw gii-komind.
Ningoding dash giiwenh megwaa nandodang, gegoo owaabandaan Nenaboozhoo bishaagiwiinigod.
Anishinaa aadizookaan.
Amanj ezhi-waabigobanen!
Nenaboozhoo owaabandaan giiwenh gegoo bishaagibidenig, mii nangwana aw mishi-namegwe ode benga’aninig.
Mii dash giiwenh bekaa ezhi-mamaajiid naanikinang odasawaan; mii dash ezhi-pabazhiba’ang.
Mii dash giiwenh naagaj noondawaad madwe-ikidonid:
“Aataa, geget sa naa ni-maazhide’e.”(3)
Mii dash medwe-izhi-nandodamawaad wiiwan ji-mina’igod gegoo ge-onji-shigagowed.
Mii dash zhayiigwa aano-wiikwodood ji-shishigagowed, gaawiin dash ogaskitoosiin.
Mii dash medwe-ikidod: “Gaawesa, Nenaboozhoo ni-maanikaag,” ikido.
Aanawi geget gichi-anokii Nenaboozhoo ji-shashigagowaanaasiwind; mii gaa-izhi-pimidaakwanang omitigwaabiin, mii dash iniw menjimaakwiid Nenaboozhoo.
Mii dash miinawaa mishi-namegwe e-kidod: “Gaawesa.
Ni-maanikaag Nenaboozhoo,” ikido.
Mii dash wayiiba gii-nibod, gii-nisaad Nenaboozhoo.
Aaniish aanawi gakina minik waadetoowaad gii-wiikondiwag ji-wii-pimaajii’aawaad odoogimaamiwan, aaniish gaawiin;
aaniish awiya ged-izhi-pimaadizid ode gii-pi-giishka’igaadenig?
Mii dash gaa-onji-nibonid.
Mii dash wiin Nenaboozhoo, imaa ayaad.
Mii dash geget gichi-izhichigewaad manidookaazowaad.
Aaniish aazha gii-nibo gichi-giigoonh.
Mii dash giiwenh waa-izhi-pagidenimaawaad, aanawi ginwenzh ogii-kanawenimaawaan;
maagizhaa da-aabijiibaa, gii-inendamoog.
Mii dash indawaaj giiwenh zhayiigwa bagidenimaawaad, nawaj naawij aandi aapiji dimiiyaag gichi-gami mii imaa awi-pagidenimaawaad.
Aapiji gichi-manidookaazowag.
Gakina dash wiin Nenaboozhoo ogikendaan enakamigadinig, wiin dash gaawiin awiya ogikenimigosiin imaa ayaad bimaadizid gaye.
Ogikenimaawaan gii-komimind, gaawiin dash wiin ogikenimaasiwaawaan bimaadizinid.
Mii dash gaa-ishkwaa-pagidenimaawaad, gii-bi-kiiweyaawanidiiwaad miinawaa.
Aapiji gii-paatayiinowag, miziwe e-nigokwaag iw gichi-gami gii-onjiwag gii-awi-pagidenimaawaad odoo-gimaamiwaan.
Mii dash giiwenh wiin Nenaboozhoo endazhi-wawenendag aaniin ged-izhi-kashkitood ji-saaga’ang imaa biinjaya’ii giigoonying gaye gii-ningwa’omind.
Mii dash zhayiigwa Nenaboozhoo gikendang aaniin ge-doodang, mii dash e-kidod:
“Aaw, ambe sa noo da-wii-kichi-izhiwebag wiikaa gaa-izhiwebisinog!”
Mii dash Nenaboozhoo gii-sagaswe’aad niiwing inakakeyaa wendabinid manidoo’.
Mii dash gii-nakomigod.
Mii dash geget gaa-izhi-kichi-nooding, gakina gegoo gii-pakodaamikaa’an imaa gii-kichi-gaming inaamaya’ii etegini.
Mii dash gaye wiin Nenaboozhoo, gii-moonaadaawangaa’ininig i’imaa ayaad;
mii dash aw giigoonh gaa-izhi-ogichibiiskaad.
Midaasogon gii-kichi-noodin, mii dash miinawaa gaa-izhi-kichi-anwaatin, mii dash gii-mooshkanjid aw mishi-namegwenh.
Mii dash ningoding igo Nenaboozhoo ayaad imaa anaamaya’ii giigoonying onoondaan gegoo aapiji minotaagodinig;
mii dash aazhi andodang, mii e-nidang: “(cry of gulls).”
Aapiji minotaagoziwan awiya; mii nangwana gayaashkwag.
“Ambe,” mii dash e-nendang Nenaboozhoo, “ninga-kanoonaag,” inendam.
Mii dash geget zhayiigwa miinawaa onoondawaa’ biidwewinaminid, mii go miinawaa baa-inwenid: “(cry of gulls).”
Mii dash ezhi-kanoonaad: “Ishte, ni-shiime sa!(4) shkomaa naa bagwanejiganaanandamawishiyok aw giigoonh!”
Mii dash gayaashkwag ezhi-pazigwa’owaad, gaye ani-noondaagoziwaad gagwaanisagakamig e-nitaagoziwaad.
Mii Nenaboozhoo gaa-izhi-nawadinangin otawagan, gaa-izhi-kipitenidisod.
Naagaj dash miinawaa gii-andodam, mii’sh miinawaa gii-kanoonaad:
“Aaw, nishiim(5), bagwanejiganaanandamawishiyok aw giigoonh!” odinaa’.
Mii dash geget ezhi-pisaanayaawaad.
Miinawaa dash oganoonaan: “Bagwanejiganaandamawishiyok aw giigoonh!” odinaan.
“Meshkod giga-sasegaa’ininim.”
Mii dash gayaashkwag ezhi-kanoonidiwaad: “Nenaboozhoo imaa ayaa.”
Gakina gonda awiya gii-kikenimigoon aw Nenaboozhoo.
Mii’sh miinawaa ezhi-kanoonaad: “Aaw, ni-shiimidog, bagwanejiganaandamawishiyok.
Meshkod giga-sasegaa’ininim; niigaan wenizhishid bebaamised gigad-izhi-onizhishi’inim,” odinaa’.
“Gaawiin gosha nindaa-kashki’aasiiwaanaan,” odigoo’.
“Awaw” odinaa’. “Giga-kashki’aawaa!”
Mii dash geget ezhi-maajitaawaad bagwanejiganaamawaad; wiikaa dash ogashki’aawaan.
Mii dash Nenaboozho gaa-izhi-saagidooded, gaye zaagiji-daabaadang ojiimaan mitigoon gaa-wiimbigawaapan.
Mii dash bijiinag weweni waabamaad iniw mishi-namegwen gaa-gomigod e-nigininid;
indigo minis e-gondeg ezhi-naagozinid agwanjininid.
Mii dash gaa-izhi-odaapinaad bezhig iniw gayaashkwan; mii dash gaa-izhi-wawezhi’aad.
Mii dash gaa-izhi-waabishki’aad, dibishkoo gooning gii-zhi’aad.
Mii dash gaa-inaad: “Giin wiin gayaashk gigad-ani-izhi-wiinigoo ji-ani-akiiwang.”
Mii dash geget gichi-minwendang waabandizod aw gayaashk ezhi-onizhishid.
“Aaw,” odinaan, “mii dash izhi-pazigo’iyok.”
Mii dash aaniish inaa aadizookaan, mii eta go bezhik dagimimind gii-odaapinaad gayaashkwan.
Mii dash booch gaa-izhi-onizhishiwaad gakina minik apii gakina bezigo’owaad.
Mii dash Nenaboozhoo gaa-izhi-maajitaad gii-pi-giishkizhwaad iniw giigoonyan.
Mii dash apii gaa-ishkwaa-nanawizhwaad, mii gii-ikidod gaye bekish gii-saswewebinaad:
“Giigoonh gigad-ani-zhi-wiinigoom ji-ani-akiiwang.
Gigad-amogowaag gaye anishinaabeg ji-ani-akiiwang. – Giin dash,” odinaan mishi-namegwen:
“Gaawiin miinawaa wiikaa gigad-iniginisii ji-ani-akiiwang, gaawiin awiya daa-pimaadizisii,” odinaan.
Mii dash geget gaa-izhiwebadinig giigoonyensa’ gichi-niibiwa gii-onji-ozhi’aad imaa mishi-namegweng.
Mii dash Nenaboozhoo ezhi-kiiwe’od nandawaabamaad ookomisan.
Eni-dagwishing idash omikawaan ookomisan aapiji gawendaminid.
Mii dash eni-zhi-dapaabid, mii’sh e-naad: “Nookomis, nindagwishin,” odinaan.
“Aay, wegodogwen sa pane wenji-izhi-waagwenoko, aya aawashensag!”
“Gaawiin, nookomis.
Niin gosha, Nenaboozhoo, goozhis, ba-dagwishin.”
Mii dash eni-zhi-piindiged.
Mii dash owaabamaad ookomisan agaawaa onzaabinid, apane iidog gii-mawinid.
Mii dash Nenaboozhoo aapiji zhawenimaad ookomisan.
Mii dash nawaj gaa-izhi-aanji-oskiniigi’aad.