Gaa-zhi-ndaadizid Nenabosho - Classic
The Birth of Nenabosho
Owiigiwaaming anishinaabeg, mindimooyenh odaanisan owiidigemaan.
Ningoding oganoonaan iniw odaanisan: “Ambe sa noo nindaanis aiyaangwaamizin. Wii noondawishin ge-ininaan.
Geget sa ningichi-gotaaj, ginaniizaanenimin.
Gego wiikaa izhichigeken oowidi ningaabii’anong ji-inaasamabiyan zaaga’aman.
Gego giga-izhi-ayaa giishpin i’iwidi inaasamabiyan.
Mii i’wi sa ezhi-naniizaaneniminaan.
Aiyaangwaamizin i’iw [noongomeninaan] ji-izhichigeyan; giga-inigaatoon kiiyaw.
Mii sa iw eninaan.”
Aanish mii sa go iw, aaniish mii sa geget aiyaangwaamizigobanen a’aw ikwe weshkiniigikwewid.
Gaawiin wiikaa ininiwan besho ogii-waabamaasiin.
Ningoding igo gaa-izhi-waniwisid aw oshkiniigikwe;
mii dash apii zaaga’amogobanen gaa-izhi-inaasamabid ningaabii’anong
mii dash apii noondamogobanen biidweweyaanimadinig
Gaa-izhi-kikendang dakaashid i’iwidi ozaaga’amoowining.
Mii dash ezhi-pasigonjised. “nimaamaa, nashke giniin, gaa-izhi-ayaayaan!
Mii ganabach gaa-izhiyan ezhi-ayaayaan.”
Gaa-izhi-kanoonaad a’aw mindimoyenh iniw odaanisan: “Memindage gigii-inigaatoon kiiyaw.”
Aaniish mii sa iw zhigwa gii-mawid aw mindimoyenh. “Aaniish mii go iw nindaanis, inigaatooyan kiiyaw.
Nashke goto ge-izhiwebiziyan.
Awiya gii-piindigewag kiiyawing, mii go iw nindaanis, inigaaziyan.
Gaawiin anishinaabewisiiwag gaa-piindigewaad imaa sa kiiyawing.
Gaawiin waasa iw ji-niigiwaad.
Na, mii dash igiw gaa-gosagwaa.”
Aaniish nashke dash gomaa go apii mii sa go gii-noondawaad a’aw isa mindimoyenh awiya madwegiikaandinid.
Ogii-kikenimaa anaamaya’ii danwewedaminid.
Mii dash moozhag gii-mawid a’aw mindimoyenh.
Mii dash geget i’imaa gii-kwayakwenimaad ji-pimaadizinid iniw odaanisan.
Aaniish ogii-noondawaa sa i’iw gaakaandinid, i’imaa omisadaaning danwewedaminid.
O’ow idash madwe-ikidowan: “Niin ninga-saziikis.”
“Gaawiin” madwe-ikido bezhig biinish go ikido aw bezhig: “Gaawiin gidaa-saziikizisii. Niin isa ninga-saziikis.
Aaniish mii sa pane mawid aw mindimoyenh bizindawaad i’iw gaakaandinid.
Ogii-kikenimaa aw mindimoyenh I’iw waa-dazhinid i’iw ooshisheya’.
Na, mii dash ii’iw ekidowaad nagaawebinidiwaad (ayaani) aanawi-saaga’amowaad.
Igiw dash aanind aano-gii-ikidowag: “gego bina! Kiga-iniga’aanaan gosha gi-maamaanaan.
Weweni pina go zaaga’andaa,” aano-ikidowag.
Gaawiin idash izhi-minwedaziiwag igiw waa-saziikizijig.
Mii dash i’iw ekidowaad zhigwa anooj igo wii-izhi-saaga’amowaad.
Bezhig ogii-waabandaan waasakonenig.
“Aaniish mii imaa gwayak niin waa-izhaayaan.”
Mii dash apii gii-gagwedanimidiwaad awenen aw nitam ge-saaga’ang,
mii dash iw gaa-izhi-piigoshkawaawaad iniw omaamaawaan.
Wiikaa go ningoji babaa-inaabid mindimoyenh ogii-mikaan miskwi bangii.
Mii sa wiigwaas ezhi-paapagonang.
Mii dash imaa gaa-izhi-atood wiigwaasing i’iw miskwi gaa-izhi-kashkashkwemaginang, mii sa gaa-izhina’inang.
Aaniish piijiinag ogii-waabandaan.
Ningoding igo aapashkwemaginang ogii-waabamaan abinoojiiyan, mii go i’iw gii-ganoonigod, o’ow dash ogii-igoon:
“Nookomis,” ogii-igoon apii genoonigod.
Aaniish mii sa zhigwa ogii-igoon: “Gi-kikenim na ayaawiyaan? Niin isa Nenabosho.”
Ningoding oganoonaan iniw odaanisan: “Ambe sa noo nindaanis aiyaangwaamizin. Wii noondawishin ge-ininaan.
Geget sa ningichi-gotaaj, ginaniizaanenimin.
Gego wiikaa izhichigeken oowidi ningaabii’anong ji-inaasamabiyan zaaga’aman.
Gego giga-izhi-ayaa giishpin i’iwidi inaasamabiyan.
Mii i’wi sa ezhi-naniizaaneniminaan.
Aiyaangwaamizin i’iw [noongomeninaan] ji-izhichigeyan; giga-inigaatoon kiiyaw.
Mii sa iw eninaan.”
Aanish mii sa go iw, aaniish mii sa geget aiyaangwaamizigobanen a’aw ikwe weshkiniigikwewid.
Gaawiin wiikaa ininiwan besho ogii-waabamaasiin.
Ningoding igo gaa-izhi-waniwisid aw oshkiniigikwe;
mii dash apii zaaga’amogobanen gaa-izhi-inaasamabid ningaabii’anong
mii dash apii noondamogobanen biidweweyaanimadinig
Gaa-izhi-kikendang dakaashid i’iwidi ozaaga’amoowining.
Mii dash ezhi-pasigonjised. “nimaamaa, nashke giniin, gaa-izhi-ayaayaan!
Mii ganabach gaa-izhiyan ezhi-ayaayaan.”
Gaa-izhi-kanoonaad a’aw mindimoyenh iniw odaanisan: “Memindage gigii-inigaatoon kiiyaw.”
Aaniish mii sa iw zhigwa gii-mawid aw mindimoyenh. “Aaniish mii go iw nindaanis, inigaatooyan kiiyaw.
Nashke goto ge-izhiwebiziyan.
Awiya gii-piindigewag kiiyawing, mii go iw nindaanis, inigaaziyan.
Gaawiin anishinaabewisiiwag gaa-piindigewaad imaa sa kiiyawing.
Gaawiin waasa iw ji-niigiwaad.
Na, mii dash igiw gaa-gosagwaa.”
Aaniish nashke dash gomaa go apii mii sa go gii-noondawaad a’aw isa mindimoyenh awiya madwegiikaandinid.
Ogii-kikenimaa anaamaya’ii danwewedaminid.
Mii dash moozhag gii-mawid a’aw mindimoyenh.
Mii dash geget i’imaa gii-kwayakwenimaad ji-pimaadizinid iniw odaanisan.
Aaniish ogii-noondawaa sa i’iw gaakaandinid, i’imaa omisadaaning danwewedaminid.
O’ow idash madwe-ikidowan: “Niin ninga-saziikis.”
“Gaawiin” madwe-ikido bezhig biinish go ikido aw bezhig: “Gaawiin gidaa-saziikizisii. Niin isa ninga-saziikis.
Aaniish mii sa pane mawid aw mindimoyenh bizindawaad i’iw gaakaandinid.
Ogii-kikenimaa aw mindimoyenh I’iw waa-dazhinid i’iw ooshisheya’.
Na, mii dash ii’iw ekidowaad nagaawebinidiwaad (ayaani) aanawi-saaga’amowaad.
Igiw dash aanind aano-gii-ikidowag: “gego bina! Kiga-iniga’aanaan gosha gi-maamaanaan.
Weweni pina go zaaga’andaa,” aano-ikidowag.
Gaawiin idash izhi-minwedaziiwag igiw waa-saziikizijig.
Mii dash i’iw ekidowaad zhigwa anooj igo wii-izhi-saaga’amowaad.
Bezhig ogii-waabandaan waasakonenig.
“Aaniish mii imaa gwayak niin waa-izhaayaan.”
Mii dash apii gii-gagwedanimidiwaad awenen aw nitam ge-saaga’ang,
mii dash iw gaa-izhi-piigoshkawaawaad iniw omaamaawaan.
Wiikaa go ningoji babaa-inaabid mindimoyenh ogii-mikaan miskwi bangii.
Mii sa wiigwaas ezhi-paapagonang.
Mii dash imaa gaa-izhi-atood wiigwaasing i’iw miskwi gaa-izhi-kashkashkwemaginang, mii sa gaa-izhina’inang.
Aaniish piijiinag ogii-waabandaan.
Ningoding igo aapashkwemaginang ogii-waabamaan abinoojiiyan, mii go i’iw gii-ganoonigod, o’ow dash ogii-igoon:
“Nookomis,” ogii-igoon apii genoonigod.
Aaniish mii sa zhigwa ogii-igoon: “Gi-kikenim na ayaawiyaan? Niin isa Nenabosho.”