Nanabush Flies with the Geese (Manitoulin Island Dialect)
Ningoding go ni-babimosed zaag’igan zhi-mdaabiid, pane go nikag manoominikewag
Geget sa meskwenmaan, mii’sh ezhi-gnoonaad: “Ambe sa naa, ka-wiijiiwininim,” odinaan.
“Awawa, Nenaboozhoo,” odigoon. “Mii go iw kawe zhitoowaang waa-nwapoyaang.”
Mii’sh ezhi-bkobiid gewii Nenaboozhoo. Mii sa gaye wiin endoodamnid aano-doodang, mii sa gaawii omikoobiigaziin wi manoomin.
“Aaniin, Nenaboozhoo? indigoo gosha go g-bwaanwitoon wi mnoomin.”
“Enh, nimbwaanaawitoon.”
“Aa Aw, indawaa mii iw minik. Bebngiins i’iw manoomin.” idiwag iw nikag.
Ngoding go zhigwa digoon: “Mii sa waabang wii-maajaayaang.” odigoon wi nikan.
Mii dash gaa-naad: “Nigekaa gdaa-gshki’siim genii ji-bmibzowaambaa?”
“Nenaboozhoo, aanawi ka-gashki’igoo ji-mbibzoyan, gaawiin dash gdaa-bzindzii wi ge-goomba.”
“Oonh, maanoo, n-shiimensag, gdaa-zhi’im ji-bmibzoyaan!”
Mii dash geget aw gii-igoon: “Aangwaamzin dash wiin. Maa aabtawiya’ii anishinaabeg baatiinowag.
Pii imaa ni-dgoshinang, gegwa dbashiish naabken! Ka-zaasaakwaangonaanig. Aangwaamizin, gegwa dbashiish naabken! Mii go wi ji-bngishnan giishpin naabyan. Mii eta go imaa ezhi-gsigoowin,” odigoon.
Mii dash enchiwaad kina bebezhig omiigoniwaan gaa-izhi-miinaawaad.
“Daga shkomaa, gweji-gziken.”
Mii dash geget gaa-zhi-gziked, gaa-izhi-giiwtaabza zaag’igning.
“Mii sa iw ji-wiijiiwigooyan. Mii sa waabang ji-maajaaying.”
Zhigwa waabanini, zhigwa ni-gzikewaad aapji naanaawayii gii-zhinoo’amawaa wii-bmibzod.
“Mii omaa ji-bmibzoyan. Nawaj go jibwaa-naagshig ji-waabmangwaa giwi anishinaabeg.”
Zhigwa geget gnoonigoon: “Mii zhigwa debaamdamang imaa ayaawaad giwi anishinaabeg.”
Zhayiigwa geget mdwe-zaasaakwaanigowaan: “E e e, nikag! Nenaboozhoo owiijbizomaan!” mdwe-naan.
Gegapii mdwe-kidowan: “Gnawaabmik, nashke gsha bngishin!”
“Gegwa naabken, Nenboozhoo,” odigoon wi nikan.
Gegpii mdwe-ngamowag:
“Nenboozhoo wiijbizomaan oshiimesan, oshiimesan. Da-bngishin.
Nenboozhoo wiijbizomaan oshiimesan, oshiimesan. Da-bngishin.
Nenboozhoo wiijbizomaan oshiimesan, oshiimesan. Da-bngishin.”
“Daga bina, nga-ke-naab,” nendam.
Ezhi-naabid, ataah, gchi-oodena! Wenesh ge-noondigba? Mii go eta mdwewenig otawganan.
Aano-daatganaabid, aazha waasa wiijiiwaaganag. Aapji myaa naanaaw’yii oodenaang gii-ni-bngishing.
Mii dash gaa-zhi-maanjigwapinind. “Ambe sa naa, miijinaadaa!” kidowag.
Mii sa geget gaa-zhi-miijnind, kina mnik maa waadetoonid miijnigoon.
Baapish zhigwa ni-zaagjiishkweshin ni-zhiibdoonenid, ni-spidoonenid.
Wiya noondawaan: “Aapiish gaa-miijnind? Aapiish e-yaad gaa-miijnigaazod” kidowag.
Mndimoowenyig, niizh giibiingwewag.
“Aapiish wa gaa-miijnind?” Bi-kidnid.
Ezhi-gnoonaad: “Omaa ndayaa.” odinaan. Zhigwa odoodisgoon.
Zhayiigwa wii-miijnigoon niwi mndimooweyan, ezhi-gnoonaad: “bekaa,” dinaan; “Mii go wi waa-zhi-miijzhiyan? Njida go naa ko ntam aabskobnigoowaanh waa-miijnigowaanin.”
“Oonh,” odigoon. “Gegaa g-mji-doodwaanaa wa gaa-miijnind.”
Mii sa geget ezhi-aabskobnigod gnawaabmaad; gaa-maamoowaabdenid go wi mndimooweyan.
Gaa-giizhiikaagod ezhi-baapaangndibewaad, ntam bezhig, mii’sh miinwaa bezhig.
Eni-zhi-maajaad omaa.
Ni-babmosed zaag’igan eni-biiskaad gii-ni-mdaabii, mii dash gii-ni-bkobiid, ezhi-gziibiigzhed.
Gnawaamdang wi nbi mii go wi ezhi-bmaaboodeg wi moo.
Gaa-gwaadged, mii dash e-kdod: “Ge-zhinkaadmowaad anishinaabeg n-zhisheyig, Wiinibiig!’ Da-zhinkaade wi zaag’igan.”
Geget sa meskwenmaan, mii’sh ezhi-gnoonaad: “Ambe sa naa, ka-wiijiiwininim,” odinaan.
“Awawa, Nenaboozhoo,” odigoon. “Mii go iw kawe zhitoowaang waa-nwapoyaang.”
Mii’sh ezhi-bkobiid gewii Nenaboozhoo. Mii sa gaye wiin endoodamnid aano-doodang, mii sa gaawii omikoobiigaziin wi manoomin.
“Aaniin, Nenaboozhoo? indigoo gosha go g-bwaanwitoon wi mnoomin.”
“Enh, nimbwaanaawitoon.”
“Aa Aw, indawaa mii iw minik. Bebngiins i’iw manoomin.” idiwag iw nikag.
Ngoding go zhigwa digoon: “Mii sa waabang wii-maajaayaang.” odigoon wi nikan.
Mii dash gaa-naad: “Nigekaa gdaa-gshki’siim genii ji-bmibzowaambaa?”
“Nenaboozhoo, aanawi ka-gashki’igoo ji-mbibzoyan, gaawiin dash gdaa-bzindzii wi ge-goomba.”
“Oonh, maanoo, n-shiimensag, gdaa-zhi’im ji-bmibzoyaan!”
Mii dash geget aw gii-igoon: “Aangwaamzin dash wiin. Maa aabtawiya’ii anishinaabeg baatiinowag.
Pii imaa ni-dgoshinang, gegwa dbashiish naabken! Ka-zaasaakwaangonaanig. Aangwaamizin, gegwa dbashiish naabken! Mii go wi ji-bngishnan giishpin naabyan. Mii eta go imaa ezhi-gsigoowin,” odigoon.
Mii dash enchiwaad kina bebezhig omiigoniwaan gaa-izhi-miinaawaad.
“Daga shkomaa, gweji-gziken.”
Mii dash geget gaa-zhi-gziked, gaa-izhi-giiwtaabza zaag’igning.
“Mii sa iw ji-wiijiiwigooyan. Mii sa waabang ji-maajaaying.”
Zhigwa waabanini, zhigwa ni-gzikewaad aapji naanaawayii gii-zhinoo’amawaa wii-bmibzod.
“Mii omaa ji-bmibzoyan. Nawaj go jibwaa-naagshig ji-waabmangwaa giwi anishinaabeg.”
Zhigwa geget gnoonigoon: “Mii zhigwa debaamdamang imaa ayaawaad giwi anishinaabeg.”
Zhayiigwa geget mdwe-zaasaakwaanigowaan: “E e e, nikag! Nenaboozhoo owiijbizomaan!” mdwe-naan.
Gegapii mdwe-kidowan: “Gnawaabmik, nashke gsha bngishin!”
“Gegwa naabken, Nenboozhoo,” odigoon wi nikan.
Gegpii mdwe-ngamowag:
“Nenboozhoo wiijbizomaan oshiimesan, oshiimesan. Da-bngishin.
Nenboozhoo wiijbizomaan oshiimesan, oshiimesan. Da-bngishin.
Nenboozhoo wiijbizomaan oshiimesan, oshiimesan. Da-bngishin.”
“Daga bina, nga-ke-naab,” nendam.
Ezhi-naabid, ataah, gchi-oodena! Wenesh ge-noondigba? Mii go eta mdwewenig otawganan.
Aano-daatganaabid, aazha waasa wiijiiwaaganag. Aapji myaa naanaaw’yii oodenaang gii-ni-bngishing.
Mii dash gaa-zhi-maanjigwapinind. “Ambe sa naa, miijinaadaa!” kidowag.
Mii sa geget gaa-zhi-miijnind, kina mnik maa waadetoonid miijnigoon.
Baapish zhigwa ni-zaagjiishkweshin ni-zhiibdoonenid, ni-spidoonenid.
Wiya noondawaan: “Aapiish gaa-miijnind? Aapiish e-yaad gaa-miijnigaazod” kidowag.
Mndimoowenyig, niizh giibiingwewag.
“Aapiish wa gaa-miijnind?” Bi-kidnid.
Ezhi-gnoonaad: “Omaa ndayaa.” odinaan. Zhigwa odoodisgoon.
Zhayiigwa wii-miijnigoon niwi mndimooweyan, ezhi-gnoonaad: “bekaa,” dinaan; “Mii go wi waa-zhi-miijzhiyan? Njida go naa ko ntam aabskobnigoowaanh waa-miijnigowaanin.”
“Oonh,” odigoon. “Gegaa g-mji-doodwaanaa wa gaa-miijnind.”
Mii sa geget ezhi-aabskobnigod gnawaabmaad; gaa-maamoowaabdenid go wi mndimooweyan.
Gaa-giizhiikaagod ezhi-baapaangndibewaad, ntam bezhig, mii’sh miinwaa bezhig.
Eni-zhi-maajaad omaa.
Ni-babmosed zaag’igan eni-biiskaad gii-ni-mdaabii, mii dash gii-ni-bkobiid, ezhi-gziibiigzhed.
Gnawaamdang wi nbi mii go wi ezhi-bmaaboodeg wi moo.
Gaa-gwaadged, mii dash e-kdod: “Ge-zhinkaadmowaad anishinaabeg n-zhisheyig, Wiinibiig!’ Da-zhinkaade wi zaag’igan.”