Nanabushu Flies with the Geese (Classic)
Ningoding igo ani-babimosed zaaga’igan izhi-madaabiid, apane go nika’ manoominikewa’
Geget sa omisawinawaa’, aaniish ezhi-ganoonaad: “Ambe sa noo, giga-wiijiiwininim,” odinaa’.
“Awawa, Nenaboozhoo,” odigoo’. “Mii go i’iw akawe ozhitooyaang waa-nawapoyaang.”
Aaniish ezhi-bakobiid gaye wiin Nenaboozhoo. Mii sa gaye wiin endoodaminid aano-doodang, mii sa gaawiin omikoobiigaansiin i’iw manoomin.
“Aaniin, Nenaboozhoo? indigoo gosha go gibwaanawitoon i’iw manoomin.”
“Eye’, nimbwaanawitoon.”
“Aa Aw, indawaa mii iw minik. Bebangiins i’iw manoomin.” idiwaa’ i’iw nika.
Ningoding igo zhigwa odigoo’: “Mii sa waabang wii-maajaayaang.” odigoo’ i’iw nika.
Mii dash gaa-inaad: “Anigekaa gidaa-gashkii’siim gaye niin ji-bimiseyaambaan?”
“Nenaboozhoo, aanawi giga-gashkii’igoo ji-bimiseyan, gaawiin idash gidaa-bizindanzii i’iw ge-igooyambam.”
“Oonh, maanoo, nishimise, izhi-ishiyok ji-bimiseyaan!”
Mii dash geget aw ogii-igoon: “Ayaangwaamizin dash wiin. oo omaa aabitawaiya’ii anishinaabeg baata’iinowag.
Apii imaa ani-dagwishinang, Gego inaabiken, Giga-saakwaanigonaanig. Ayaangwaamizin, gego inaabiken; mii go i’iw ji-bangishinan giishpin inaabiyan. Mii eta go i’imaa ezhi-zhaagwenimigooyan,” odigoo’.
Mii dash endazhinid gakina bebezhig omiigwanini gaa-izhi-miinigod.
“Daga shkomaa, goji-bazigwa’on.”
Mii dash geget gaa-izhi-bazigwa’od, gaa-izhi-giiwitaagaamesed.
“Mii sa iw ji-wiijiiwigooyan. Mii sa waabang ji-maajaayang.”
Zhigwa waabanini, zhigwa bazigwa’ owa’ aapiji naawaya’ii izhinoo’amawaa.
“Mii omaa ji-bimiseyan. Nawaj igo onaagoshig ji-waabamangwaa igiw anishinaabeg.”
Zhigwa geget oganoonigoon: “Mii zhigwa debaabandamang i’imaa ayaawaad igiw anishinaabeg.”
Zhayiigwa geget madwe-saakwaanigowaa’: “E e e, nikag! Nenaboozhoo owiijisemaa!” madwe’inaa.
Gegapii madwe-ikidowan: “Ganawaabamik, nashke gosha bangishin!”
“Gego inaabiken, Nenaboozhoo,” odigoo i’iw nika’.
Gegapii madwe-nagamowan:
“Nenaboozhoo owiijisemaa oshiimisa’, oshiimisa’. Da-bangishin.
Nenaboozhoo owiijisemaa oshiimisa’, oshiimisa’. Da-bangishin.
Nenaboozhoo owiijisemaa oshiimisa’, oshiimisa’. Da-bangishin.”
“Daga bina, ninga- inaab,” inendam.
Ezhi-inaabid, ataa, gichi-oodena! Aaniin ge-initang bane go gaa-zhookaanig otawagan.
Aano-daataaganaabid, aazha waasa owiijiiwaagana’. Aapiji naa oodena izhi-bangishin.
Mii dash gaa-izhi-mamaanjigwapinind. “Ambe sa noo, miijinaadaa!” ikidowag.
Mii sa geget gaa-izhi-miijinind, gakina minik imaa waadetoonid omiijinigoo.
Abaapish zhigwa negashkijinigod zhiipidoonenid.
Awiiya onoondawaa: “Aandi gaa-miijinind?” ikidowa’.
Goniginiin, mindimooyeya’, niishiwa gagiibiingwewa’.
“Aandi gaa-miijinind?” Bi-ikidonid.
Ezhi-ganoonaad: “Omaa nindayaa.” odinaa’. Zhigwa odoodisigo.
Zhayiigwa owii-miijinigoon iniw mindimooyeyan, ezhi-ganoonaad: “ish,” odinaan; “Gaagishwiin, gosha mii go i’iw waa-izhi-miijishiyan? Akawe niin iko nindaapaa’ogo waa-miijinigowaanin.”
“Oonh,” odigoon. “Gegaa gi-wanidoodawaanaan a’aw gaa-miijinind.”
Mii sa geget ezhi-aabiskwamigod ganawaabamaad; gaa-mamoowaabidenid igo iw mindimooyeya’.
Gaa-kiizhiikaagod ezhi-naaniiwanowaad.
Eni-izhi-maajaad o’omaa.
Ani-babimosed zaaga’igan omadaabiin, mii go iw ezhi-bakobiid ezhi-giziibiigid.
Ganawaabandang i’iw nibi mii go iw ezhi-bimangodenig i’iw moo.
Gaa agwaasiid mii dash ekidod: “Ge-izhinikaadamowaad anishinaabeg nizhisheyag, Wiinibiig!’ Da-izhinikaade iw zaaga’igan.”
Geget sa omisawinawaa’, aaniish ezhi-ganoonaad: “Ambe sa noo, giga-wiijiiwininim,” odinaa’.
“Awawa, Nenaboozhoo,” odigoo’. “Mii go i’iw akawe ozhitooyaang waa-nawapoyaang.”
Aaniish ezhi-bakobiid gaye wiin Nenaboozhoo. Mii sa gaye wiin endoodaminid aano-doodang, mii sa gaawiin omikoobiigaansiin i’iw manoomin.
“Aaniin, Nenaboozhoo? indigoo gosha go gibwaanawitoon i’iw manoomin.”
“Eye’, nimbwaanawitoon.”
“Aa Aw, indawaa mii iw minik. Bebangiins i’iw manoomin.” idiwaa’ i’iw nika.
Ningoding igo zhigwa odigoo’: “Mii sa waabang wii-maajaayaang.” odigoo’ i’iw nika.
Mii dash gaa-inaad: “Anigekaa gidaa-gashkii’siim gaye niin ji-bimiseyaambaan?”
“Nenaboozhoo, aanawi giga-gashkii’igoo ji-bimiseyan, gaawiin idash gidaa-bizindanzii i’iw ge-igooyambam.”
“Oonh, maanoo, nishimise, izhi-ishiyok ji-bimiseyaan!”
Mii dash geget aw ogii-igoon: “Ayaangwaamizin dash wiin. oo omaa aabitawaiya’ii anishinaabeg baata’iinowag.
Apii imaa ani-dagwishinang, Gego inaabiken, Giga-saakwaanigonaanig. Ayaangwaamizin, gego inaabiken; mii go i’iw ji-bangishinan giishpin inaabiyan. Mii eta go i’imaa ezhi-zhaagwenimigooyan,” odigoo’.
Mii dash endazhinid gakina bebezhig omiigwanini gaa-izhi-miinigod.
“Daga shkomaa, goji-bazigwa’on.”
Mii dash geget gaa-izhi-bazigwa’od, gaa-izhi-giiwitaagaamesed.
“Mii sa iw ji-wiijiiwigooyan. Mii sa waabang ji-maajaayang.”
Zhigwa waabanini, zhigwa bazigwa’ owa’ aapiji naawaya’ii izhinoo’amawaa.
“Mii omaa ji-bimiseyan. Nawaj igo onaagoshig ji-waabamangwaa igiw anishinaabeg.”
Zhigwa geget oganoonigoon: “Mii zhigwa debaabandamang i’imaa ayaawaad igiw anishinaabeg.”
Zhayiigwa geget madwe-saakwaanigowaa’: “E e e, nikag! Nenaboozhoo owiijisemaa!” madwe’inaa.
Gegapii madwe-ikidowan: “Ganawaabamik, nashke gosha bangishin!”
“Gego inaabiken, Nenaboozhoo,” odigoo i’iw nika’.
Gegapii madwe-nagamowan:
“Nenaboozhoo owiijisemaa oshiimisa’, oshiimisa’. Da-bangishin.
Nenaboozhoo owiijisemaa oshiimisa’, oshiimisa’. Da-bangishin.
Nenaboozhoo owiijisemaa oshiimisa’, oshiimisa’. Da-bangishin.”
“Daga bina, ninga- inaab,” inendam.
Ezhi-inaabid, ataa, gichi-oodena! Aaniin ge-initang bane go gaa-zhookaanig otawagan.
Aano-daataaganaabid, aazha waasa owiijiiwaagana’. Aapiji naa oodena izhi-bangishin.
Mii dash gaa-izhi-mamaanjigwapinind. “Ambe sa noo, miijinaadaa!” ikidowag.
Mii sa geget gaa-izhi-miijinind, gakina minik imaa waadetoonid omiijinigoo.
Abaapish zhigwa negashkijinigod zhiipidoonenid.
Awiiya onoondawaa: “Aandi gaa-miijinind?” ikidowa’.
Goniginiin, mindimooyeya’, niishiwa gagiibiingwewa’.
“Aandi gaa-miijinind?” Bi-ikidonid.
Ezhi-ganoonaad: “Omaa nindayaa.” odinaa’. Zhigwa odoodisigo.
Zhayiigwa owii-miijinigoon iniw mindimooyeyan, ezhi-ganoonaad: “ish,” odinaan; “Gaagishwiin, gosha mii go i’iw waa-izhi-miijishiyan? Akawe niin iko nindaapaa’ogo waa-miijinigowaanin.”
“Oonh,” odigoon. “Gegaa gi-wanidoodawaanaan a’aw gaa-miijinind.”
Mii sa geget ezhi-aabiskwamigod ganawaabamaad; gaa-mamoowaabidenid igo iw mindimooyeya’.
Gaa-kiizhiikaagod ezhi-naaniiwanowaad.
Eni-izhi-maajaad o’omaa.
Ani-babimosed zaaga’igan omadaabiin, mii go iw ezhi-bakobiid ezhi-giziibiigid.
Ganawaabandang i’iw nibi mii go iw ezhi-bimangodenig i’iw moo.
Gaa agwaasiid mii dash ekidod: “Ge-izhinikaadamowaad anishinaabeg nizhisheyag, Wiinibiig!’ Da-izhinikaade iw zaaga’igan.”