Nanabushu and the Buzzard - Classic
Mii dash ezhi-maajaad, gii-babaamosed.
Ningoding igo babaamosed inaabid ishpiming awiya ogii-waabamaan namadabinid aanakwadong.
Geget omisawinawaan. “Ambe dash gaye niin,” Gii-inendam gaa-izhi-ganoonaad: “Gaawiin ina gidaa-bi-izhaasii, nishiimisa?” ogii-inaan.
Mii dash gaa-igod: “Gaawiin,” ogii-igoon.
“Aaniin gegii-izhinaagwag minik awiya gaa-waabamag giin idash i’iw ji-bizindawisiiwaambanen?”
“Nenaboozhoo, Gi-gosin.”
“Gaawiin gidaagwashisii,” odinaan.
Mii dash gaa-izhi-wayeshimaad, aanish mii sa gaa-ganoonigod: “Ambe sa noo, geget sa gi-misawinawin. Gonige naa waasa gidakwaabimidog,” odinaan.
“Eye’, Geget.”
“aw,” odinaan. Mii dash gaa-izhi-inaad: “Ambe sa noo, giga-wiijiiwin.”
“Awawa,” ogii-igoon. Mii dash gaa-izhi-ombiiwaad i’imaa aanakwadong.
Mii dash ezhi-maajaawaad, maajiiyaasinig i’iw aanakwad.
Ningoding agaawaa debinaagwadini i’iw aki zhigwa odinenimigoon. “indashiidog waawiyazh nendaginitaadoodawaad. Ambe sa noo, wawiyazh ninga-doodawaa,” Gii-inendam.
Mii dash gaa-izhi-bakweyaasininig i’iw aanakwad.
Miinawaa ezhi-bakweyaasininig; eshkam igo agaasaani inaa ayaawaad.
Gegapii gegaa go enigokwabiwaad inigokwaani.
Ningoding igo gaa-izhi-daashkikaanig bebakaan gii-namadabiwag.
Aanish miinawaa ezhi-daashkaasininig ezhi-bazigwa’onid, ezhi-booniinid i’iwedi eni-michaanig i’iw aanakwad.
Mii dash odaano-ganoonaan: “Aaniin gediyaan, nishiimisa” ogii-inaan.
Mii zhigwa gii-waabandang ji-bangishing. Zhigwa miinawaa bakweyaasinini mii imaa ayaad; gegapii igo bigoshkaani.
Agaawaa odebaabandaan ozhaawashkwaakamigaanig.
Ezhi-bangishing apane ii ban babimibizod.
Zhigwa e-zhi-debaabandang edaadaa gichi-mitigokaani ge-izhi-bangishing.
Zhayiigwa gaa-izhi-biinjised gichi-mitigoon wiimbizinid.
Mii sa gaa-izhi-biinjinikised, mii sa ezhi-bwaabwaanawi’od.
Aano-wiikwaji’od awiiya ogii-noondawaa, bibaapinid ikwewa’, mii dash gaa-ikidonid: “Mii sa o’omaa ningoji endaad gaa-ikidong waabigaag,” ikidowa’ i’
iw ikwewa’.
Ezhi-giigidod: “Waabigaagoowiyaan endaayaan.”
O’ow dash ikidowa’: “Gonogena mikawang a’aw waabigaag, nishiim,” ogii-inaan mii aw majiikwewis.
“Gaa na giin gi-noondawaasii?” odigoon iniw oshimeyan. “Gi-mikawaanaan, maawiin.”
Mii dash mii imaa miinawaa gaa-izhi-ganoonaad: “Waabigaagoowiyaan endaayaan,” ogii-inaan. Mii dash gaa-izhi-maajikawa’ogod.
“Nishiim, gii-kawawang, awegwenina ge-ayaanigwen ge-mikawaagwen, mii aw ge-onaabemid,” ogii-inaan iniw oshiimeyan. Mii sa zhigwa geget odaano-giishkikaa’ogon.
“Wiikaage sa i’imaa dayaawi a’aw weshiime’im aawid,” gii-inendam aw Nenaboozhoo.
Zhigwa sa odaashkika’ogoon i’iw nandogaa’ogod, biinish majiikwewis gakina gaa-piigoga’ang; mii sa gaa-izhi-gwiinawaabamaad.
Mii sa aw ikwe weshiimemaawid i’imaa eyaad gegapii gaa-izhi-bookwisdood i’iw owaagaakwad.
“Nishiim,” odinaan apii gaa-bookwisidoonid i’iw owaagaakwadooni; “Mii sa niin ji-onaabemiyaan,” ogii-inaan iniw oshimeyan.
“wekaage sa gaye wiin.” O’ow dash gii-inendam: “Ambe sa noo, mii eta go aabiding ji-biyaabaagidood i’iw owaagaakwad,” odinenimaan.
Ezhi-aazhoowinaad; zhigwa geget odaashkika’ogoon; ezhi-bazigonjised.
Nenaboozhoowan iniw onji-bazigonjisewan, ani-gagawaabiwan. “Gegeti go waabigaag endaad inendamoog!”
Mii sa gaa-ani-izhi-mamaajaad Nenaboozhoo. “Amanjigizh ge-izhichigewaanen,” Gii-inendam; “wawiyazh ji-doodawag gaye wiin?” odinenimaan iniw binesiwan.
Ezhi-madaabiid zaaga’igan, mii dash i’imaa mishawikwam gaa-izhi-ozhishing. “Ambe sa noo, ninga- amogoog anooj, binesiwag,” Gii-inendam.
Owiikwadenimaan iniw wawiyazh gaa-doodaagod.
Zhigwa geget odamogoo’ andegwa’ enooji sa go binesiwa’.
Mii dash gaa-inaad: “Gego wiin i’iwidi ninjiiding ondamishikegon,” ogii-inaa’.
Mii dash geget gaa-izhichigenid, aaniish bane go gaa-danwewetoonid.
Zhigwa sa owaabamaan obabaamaasimoononid iniw binesiwan. “Aa, mii sa gaawiin bi-izhaasiiwan!” aanish owiikwadenimaan ji-bi-izhaanid.
Eshkam igo dasing gaazhigadinigin beshonaagoziwan, gegapii ezhi-booniinid; naagewaasa go i’iwidi bangishing odoonzaabamigoon.
Mii dash geget aapiji ogosigoon. Zhigwa sa wiikaa obi-naazikaagoon.
e-zhi-bakiiwagiid, e-zhi-gwaashkwaashkwaninid.
Mii dash zhigwa eshkam igo gaawiin doondansiiwan gegapii igo owawangawenimigoon.
Gegapii igo o’ow ikidowan: “Aaniinde giinawaa ondamaasiweg o’owidi wiininwaakoshiiganed?” Mii sa geget i’iwidi wendamigod.
Zhigwa eshkam igo waasa izhi-biindikwenowan i’imaa ojiiding, gegapii go gaawiin zaagidikwenisiiwan.
Ezhi-bazigonjised gashkidiyaandamawaad i’iw oshtigwaanini.
“mishanim Nenaboozhoo, ningii-gagwaanisagi’ig!”
Maajiibatood i’iw zaaga’igan. Aaniish aano-bimiwiikwaji’onid.
Mii sa zhigwa beshwaabandang wekwaagamiiwaninig i’iw zaaga’igan ezhi-bagijidiyaamaad, mii dash gaa-izhi-bangishininid imaa michaya’ii.
Mii dash gaa-inaad: “Wiinaange giga-igoo ji-ani-akiiwang,” ogii-inaan. “Giga-wiinenimig aw anishinaabe.”
Ningoding igo babaamosed inaabid ishpiming awiya ogii-waabamaan namadabinid aanakwadong.
Geget omisawinawaan. “Ambe dash gaye niin,” Gii-inendam gaa-izhi-ganoonaad: “Gaawiin ina gidaa-bi-izhaasii, nishiimisa?” ogii-inaan.
Mii dash gaa-igod: “Gaawiin,” ogii-igoon.
“Aaniin gegii-izhinaagwag minik awiya gaa-waabamag giin idash i’iw ji-bizindawisiiwaambanen?”
“Nenaboozhoo, Gi-gosin.”
“Gaawiin gidaagwashisii,” odinaan.
Mii dash gaa-izhi-wayeshimaad, aanish mii sa gaa-ganoonigod: “Ambe sa noo, geget sa gi-misawinawin. Gonige naa waasa gidakwaabimidog,” odinaan.
“Eye’, Geget.”
“aw,” odinaan. Mii dash gaa-izhi-inaad: “Ambe sa noo, giga-wiijiiwin.”
“Awawa,” ogii-igoon. Mii dash gaa-izhi-ombiiwaad i’imaa aanakwadong.
Mii dash ezhi-maajaawaad, maajiiyaasinig i’iw aanakwad.
Ningoding agaawaa debinaagwadini i’iw aki zhigwa odinenimigoon. “indashiidog waawiyazh nendaginitaadoodawaad. Ambe sa noo, wawiyazh ninga-doodawaa,” Gii-inendam.
Mii dash gaa-izhi-bakweyaasininig i’iw aanakwad.
Miinawaa ezhi-bakweyaasininig; eshkam igo agaasaani inaa ayaawaad.
Gegapii gegaa go enigokwabiwaad inigokwaani.
Ningoding igo gaa-izhi-daashkikaanig bebakaan gii-namadabiwag.
Aanish miinawaa ezhi-daashkaasininig ezhi-bazigwa’onid, ezhi-booniinid i’iwedi eni-michaanig i’iw aanakwad.
Mii dash odaano-ganoonaan: “Aaniin gediyaan, nishiimisa” ogii-inaan.
Mii zhigwa gii-waabandang ji-bangishing. Zhigwa miinawaa bakweyaasinini mii imaa ayaad; gegapii igo bigoshkaani.
Agaawaa odebaabandaan ozhaawashkwaakamigaanig.
Ezhi-bangishing apane ii ban babimibizod.
Zhigwa e-zhi-debaabandang edaadaa gichi-mitigokaani ge-izhi-bangishing.
Zhayiigwa gaa-izhi-biinjised gichi-mitigoon wiimbizinid.
Mii sa gaa-izhi-biinjinikised, mii sa ezhi-bwaabwaanawi’od.
Aano-wiikwaji’od awiiya ogii-noondawaa, bibaapinid ikwewa’, mii dash gaa-ikidonid: “Mii sa o’omaa ningoji endaad gaa-ikidong waabigaag,” ikidowa’ i’
iw ikwewa’.
Ezhi-giigidod: “Waabigaagoowiyaan endaayaan.”
O’ow dash ikidowa’: “Gonogena mikawang a’aw waabigaag, nishiim,” ogii-inaan mii aw majiikwewis.
“Gaa na giin gi-noondawaasii?” odigoon iniw oshimeyan. “Gi-mikawaanaan, maawiin.”
Mii dash mii imaa miinawaa gaa-izhi-ganoonaad: “Waabigaagoowiyaan endaayaan,” ogii-inaan. Mii dash gaa-izhi-maajikawa’ogod.
“Nishiim, gii-kawawang, awegwenina ge-ayaanigwen ge-mikawaagwen, mii aw ge-onaabemid,” ogii-inaan iniw oshiimeyan. Mii sa zhigwa geget odaano-giishkikaa’ogon.
“Wiikaage sa i’imaa dayaawi a’aw weshiime’im aawid,” gii-inendam aw Nenaboozhoo.
Zhigwa sa odaashkika’ogoon i’iw nandogaa’ogod, biinish majiikwewis gakina gaa-piigoga’ang; mii sa gaa-izhi-gwiinawaabamaad.
Mii sa aw ikwe weshiimemaawid i’imaa eyaad gegapii gaa-izhi-bookwisdood i’iw owaagaakwad.
“Nishiim,” odinaan apii gaa-bookwisidoonid i’iw owaagaakwadooni; “Mii sa niin ji-onaabemiyaan,” ogii-inaan iniw oshimeyan.
“wekaage sa gaye wiin.” O’ow dash gii-inendam: “Ambe sa noo, mii eta go aabiding ji-biyaabaagidood i’iw owaagaakwad,” odinenimaan.
Ezhi-aazhoowinaad; zhigwa geget odaashkika’ogoon; ezhi-bazigonjised.
Nenaboozhoowan iniw onji-bazigonjisewan, ani-gagawaabiwan. “Gegeti go waabigaag endaad inendamoog!”
Mii sa gaa-ani-izhi-mamaajaad Nenaboozhoo. “Amanjigizh ge-izhichigewaanen,” Gii-inendam; “wawiyazh ji-doodawag gaye wiin?” odinenimaan iniw binesiwan.
Ezhi-madaabiid zaaga’igan, mii dash i’imaa mishawikwam gaa-izhi-ozhishing. “Ambe sa noo, ninga- amogoog anooj, binesiwag,” Gii-inendam.
Owiikwadenimaan iniw wawiyazh gaa-doodaagod.
Zhigwa geget odamogoo’ andegwa’ enooji sa go binesiwa’.
Mii dash gaa-inaad: “Gego wiin i’iwidi ninjiiding ondamishikegon,” ogii-inaa’.
Mii dash geget gaa-izhichigenid, aaniish bane go gaa-danwewetoonid.
Zhigwa sa owaabamaan obabaamaasimoononid iniw binesiwan. “Aa, mii sa gaawiin bi-izhaasiiwan!” aanish owiikwadenimaan ji-bi-izhaanid.
Eshkam igo dasing gaazhigadinigin beshonaagoziwan, gegapii ezhi-booniinid; naagewaasa go i’iwidi bangishing odoonzaabamigoon.
Mii dash geget aapiji ogosigoon. Zhigwa sa wiikaa obi-naazikaagoon.
e-zhi-bakiiwagiid, e-zhi-gwaashkwaashkwaninid.
Mii dash zhigwa eshkam igo gaawiin doondansiiwan gegapii igo owawangawenimigoon.
Gegapii igo o’ow ikidowan: “Aaniinde giinawaa ondamaasiweg o’owidi wiininwaakoshiiganed?” Mii sa geget i’iwidi wendamigod.
Zhigwa eshkam igo waasa izhi-biindikwenowan i’imaa ojiiding, gegapii go gaawiin zaagidikwenisiiwan.
Ezhi-bazigonjised gashkidiyaandamawaad i’iw oshtigwaanini.
“mishanim Nenaboozhoo, ningii-gagwaanisagi’ig!”
Maajiibatood i’iw zaaga’igan. Aaniish aano-bimiwiikwaji’onid.
Mii sa zhigwa beshwaabandang wekwaagamiiwaninig i’iw zaaga’igan ezhi-bagijidiyaamaad, mii dash gaa-izhi-bangishininid imaa michaya’ii.
Mii dash gaa-inaad: “Wiinaange giga-igoo ji-ani-akiiwang,” ogii-inaan. “Giga-wiinenimig aw anishinaabe.”
