The Death of Nenabosho’s Nephew, the Wolf (1)
Aatayaa, geget minwendam Nenabosho.
Wayaabaninig goziwag(i).
Bezhig igo odoozhiman gaye wiinawaa ingoji igo izhi-maajaawag.
Oganoonigoon iniw(ii) odoozhiman: “Nenabosho, besho go giga-nibaamin.”
Mii sa ena’anaad odoozhiman.
Gomaa go apii zhigwa owaabamaan anidewaninig*(iii) namadabinid.
“Noos, mii omaa ji-nibaaying,” Nenabosho odigoon.
Gaa-ishkwaa-wiisiniwaad, aweningwaami.*
Gii-zhi-gii-nibaad (gii-zhi-nibaad?).
Megwaa go nanaamadabid baamaa go wenjimawinid Nenaboshoowan.
Azhijiizhaabinaad.*
“Shii, indashkaa niin nimaanaabamigodog,”(iv) odinaan.
Zhigwa dayenibaanid,(v) goshkoziwan.
Aaniish, danakamigizi a’aw ma’iingan.
“Aaniin enaabandaman(vi) gii-mawiyan?”
“Edawaa, nindoozhim gi-maanaabamin.
Waabang a’aw mooz wii-bimi-nazhawad.(vii)
Ambe sa noo, gego ishkwaa pagidooken i’iw mitigoons ziibiinsing mii sa wa go zhigwa debaabamad a’aw mooz.
Mii go iw wii-izhi-minjimendan.”
Zhigwa sa waabanini.
Gigizheb maajaawan wii-biminizha’igenid, Nenabosho ani-maajaa, odoozhiman bima’anaad.
Zhigwa sa ezhikawenid i’iw ozhikawenigobanen(viii) iniw moozoon.
Aaniish aapiji ziigwanini.
Mii sa iw ena’anaad gaye mii iwe iw ezhi-nametoonid iniw odoozhiman; mitigoons ani-apagidoonid i’imaa bangii ziibiinswakamigaanig;
Zhigwa sa debaabamaanigoban iiniw moozoon;
Mii dash geget gichi-enigok maajaanigobanen iiniw odoozhiman;
Mii dash i’iw zhigwa debibinaanigobanen(ix) a’aw ma’iingan aapiji bangii ziibiinswakamigaanig.
Mii go miinooj aazhawigwaashkwanigobanen, gaa-izhi-dishkiikaag i’iw ziibiins, mii dash imaa naanaawagaam gaa-izhi-bangishing.
Pane go gaa-saswenig(x) iiniw otawagan.
Mii sa go i’iw gaawiin gii-mooshkamosig.
Aaniish mii sa gii-wanendang ji-apagidood iw mitigoons.
Nenabosho zhigwa odebaabandaan ziibi bimitigweyaanig, pane odoozhiman bekobiikawenid.
“Edawaa! Mii maawiin iniw gii-nisaabaawed(xi) a’aw nindoozhim.”
Eni-izhi-aazhawa’od; miziwe niisaajiwan aano-izhaa.
Mii sa gaawiin ingoji oname’aasiin.
Gichi-enigok ezhi-mawid Nenabosho; mii sa gabe-giizhik babaamawid, aano-nandonewaad iiniw odoozhiman.
Shkwaach midaasogon aano-nandone’iged, mii sa gaawiin omikawaasiin.
Aapiji sa zhigwa gawanaandam (gwanaandam).
Ningoding igo niisaajiwan izhi-maajaad i’iw ziibi, ningoding sa babimaazhagaamed owaabamaan ogiishkimanisiin agoozinid i’imaa nibiikaang imaa inaabinid.
Wegoneniiwinen ogaagiimaa’aan;(xii) besho odoodisaan.
Aanawii-izhi-nawadinaad, bangii igo obishkobinaan.(xiii)
Mii dash i’iw gaa-ipinaagobanen, mii iw gii-niishkaweyaandibed* a’aw ogiishkimansii.
Ezhi-ganoonigod ogiishkimansiin: “Ojiideyaab Nenabosho niwii-wiindamowaaban wiin iiniw odoozhimaan.”
“Diwe, nishiimisaa! Wegonen waa-wiindamawiyan?”
“Kaa, gidoozhim. Ninganawaabamaa imaa nibiikaang gii-inaabiyaan; mii aw genawaabamag.
Nenabosho, ambe sa noo, giga-wiindamoon gaa-izhiwebizid a’awe menjinawesiyan.(xiv)
Mii giniin i’iw gaa-izhi-ayaad a’aw gidoozhim: ogimaa mishibizhii ogii-wodaapinaan iiniw gidoozhiman.
Imaa dash zaagidawaag iw ziibi mii imaa ayaag i’iw minisinadaawangaa; mii dash imaa endazhi-gii-zhigishing(xv) a’aw ogimaa mishibizhi giishpin mizhakwadinig.
Aapiji minogiizhigadinig mii bijiinag agwaataad i’imaa minisinadaawangaang.
Nenabosho, giishpin babizinidawisiwan,(xvi) gidaa-waabamaa a’aw gidoozhima’iwayaan, gii-pakonaa gosha a’aw gidoozhim.
Mii go i’iw ge-zhi-debwetawiyan gaa-izhiwebizid i’iwe gaa-onji-wani’ad gidoozhim.
Baataniinowan genawenimigod.
Giishpin idash wiin noondawiyan i’iw ge-ininaan, mii go iw waa-doodawad igo, ji-doodawadiban.(xvii)
Ambe sa noo mitigwaab giga-ozhi’aa.
Gii-kiizhi’ad idash, miinawaa giga-ozhitoon i’iw bikwak i’iwe ge-yaabajitooyan.
Giiga-miinin i’iw ge-naaba’igeyan.”(xviii)
Nenabosho omiinigoon bezhig iiniw oshkazhiini.
Ezhi-ganoonigod: “Nenabosho, mii awe ge-naaba’igeyan i’iw gi-bikwak.
Memwech idash apashkweshkway mii aw ge-odajaabiiyan.
Apii dash, Nenabosho, wii-pimwad, gego wiin wiiyawing bimwaaken.
Ji-naateshing(7)(xix) mii’idinong* ge-pimwad.
Ayaangwaamizin wii-pizindawishin.
Gaye i’iw aanosaagan(xx) ji-ozhitooyan, aapiji go giiga-michaatoon i’iw aanosaagan.
Aa, giishpin eta manidoowiyan, mii eta gegoo ji-naabinanad.(xxi)
Manidoowi ogimaa mishibizhii.
Mii sa go i’iw minik ezhi-kikino’amoonaan.
Ayaangwaamizin, gego aanwedawishiken(8).”(xxii)
“Ooh, miigwech waandamawiyan.
Meshkod, ji-pishigendaman giiyaw giiga-izhi’in.”
“Miigwech, Nenabosho, i’iwe ekidoyan.”
Mii sa zhigwa Nenabosho maajitaad wawezhi’aad ogiishkimanisiin.
Zhigwa sa gaagiizhi’aad, “mii iw izhi-waabandizon,(xxiii) ogiishkimanisii,” odinaan.
Mii sa geget ezhi-waabandizod, geget bishigenimo a’aw giishkimanisii.
“Mii sa iw ge-zhinaagoziyan ji-ani-akiiwang,”(xxiv) ikido Nenabosho.
Mii sa Nenabosho ezhi-maajaad, niisaajiwan izhaad.
Besho go degoshing, geget owaabandaan zaaga’igan.
Wegoneniiwinen odoozhitoon i’iw aanosaagan, aapiji go michaatoon.
Gaagii-zhitood, ezhi-boozid ezhi-izhaad imaa minisinadaawangaanig.
Wegoneniiwinen ezhi-gabaad imaa mitaawangaang.
Aatayaa awiya bimikawewa, anooj awiya bimikawewa.
Mii sa zhigwa neyaab ezhi-boozid, ingoji idash ogaadoon i’iw ojiimaan.
Mii sa zhigwa maajitaad omitigwaabiin ozhi’aad gaye i’iw obikwak; ozhitood gaye i’iw genaaba’ang, odooshkazhiiman naaba’igaaged.
Waawiinge(xxv) gaa-giizhitood, zhigwa dibikadini.
Mii sa zhigwa ezhi-waabaninig, Nenabosho ezhi-giigidod: “Ambe sa noo, dawi-anwaatin gabe-giizhik, gaye go ji-wii-mizhakwak.”
Nenabosho omaa nawaj igo noopiming ezhi-zaadiisagokaazod.
Zhigwa bii-ishpagoojinoon iiniw giizisoon, owaabandaan gagiizhibaajiwaninig(xxvi) i’iw zaaga’igan.
Nitam omakakiin mooshkamowan, gaye go anooj igo i’iw isa manidoo, gakina awiya mii go i’iw bemizh[i]gwaadaanid i’imaa minisinadaawangaanig.
Mii go iw bimi-nibaanid aanind.
“Ambe sa noo, ayaangwaamizin,” ikido aw makwa.
“Indigo gosha Nenabosho gii-ganawaabamigonaan, nindinendam.
Amanj isa naa ge-ikidogwen a’aw gidoo-gimaaminaan.”
Inaabid Nenabosho, pane go gaawaasaadigosenig.(xxvii)
Ningoding sa baamaa go naawagaam wenji-mooshkamonid; goniginiin, mishibizhiin!
Geget mindidoowan, bi-naabiwan madwe-giigidoowan: “Nenabosho awedi gaa-niibawid, azaadiisagong gii-izhinaago’o.”(xxviii)
Aanind igo madwe-giigidoowa: “Gayad(xxix) ayaaban a’aw azaadiisag.”
“Gaawiin, mii go a’aw gaa-izhinaagwa’od.”
Aanind idash ikidowag: “Baakajige* nanda menidoowid daa-izhinaago’o nashke gosha, mishi-ginebig, awi-didibinaakwaabiigaw.”
Geget bi-maajaawan ginebigoon.
Zhigwa sa odoodisigoon, mii sa ezhi-kashkaabigidaanid(xxx) enigok.
Aaniish gibanaamo Nenabosho.
Gwej igo waa-pagidanaamod, ezhi-aanawenjigenid.
Ani-giigidoowan: “Mitig a’aw! Aaniin ge-gii-izhinaagozid Nenabosho ge-yaawid?”
Mii sa gaawiin debwe’andazii(xxxi) a’aw ogimaa.
“Daga, giin makwa awi-baazagobish. Mii gosha aw Nenabosho.”
Zhigwa bi-ayaawan iiniw gichi-makwan.
Zhigwa sa odoodisigoon, ezhi-baazagobinigod.
Wiiba go obooni’igoon,(xxxii) eni-zhi-maajaanid.
“Aaniin ge-giizhinaagwak Nenabosho ge-yaawid? - Mii iw izhi-agwaadan.”
Geget bimi-agwaadaawan.
Aapiji naawaya’ii gawishimoowan.
Nenabosho ezhi-kanawaabamaad, geyaabi go wenji-mayaawikweninid.
“Wiikaa ge sa aapiji dawi-boozaangwaami, gakina go gaye i’iw odooshkinawema dawi-boozaangwaamiwa.”
Geget gakina nibaawa.
Zhigwa sa Nenabosho neyaab anishinaabewi, ezhi-izhaad odaanosaaganing.
Niminaawekii’o(10) ezhi-oodoodidang i’imaa endazhi-nibaanid.
Ezhi-gabaad, anaasawaya’ii ani-dadakokii i’iw manidoo.
Zhigwa sa odoodisaan iniw ogimaan.
Aapiji waa-zhebiinid* obimwaan.
Gaawiin ganage goshkobagizosiiwan.
Babaapiniziwaagan!
Geyaabi bezhig odayaan i’iw bikwak ezhi-mamood.
Mii dash i’imaa bijiinag ajinaateshininid, ezhi-bimwaad.
Etawaa, goshkobagizowan.
Aatawaa gichi-baawitigoowanini,(xxxiii) agaawaa go odooditaan iw odaanosaagan.
Mii sa go iw zhigwa ani-nikibiinig(xxxiv) i’iw zaaga’igan gaye iw wajiwan.
Edawaa, zegizi Nenabosho.
Zhigwa imaa bibooniiwan iniw ogiishkimanisiin ezhi-ganoonigod: “Nenabosho, mii sa iw inigaa’ad a’aw bemaadiziban o’omaa akiing.”
Pane go gaawanaadagaanid, anooj awiya.
Gwej igo nekibiinid i’iw mitigoo mii apii ezhi-noogi-mooshka’aninig.(xxxv)
Goniginiin, neyaab ani-iskateni.
“Eh, eh, eh” odigoon ogiishkimanisiin, “Nenabosho gaawiin gi-nisaasii ogimaa mishi-bizhii!”
Wayaabaninig goziwag(i).
Bezhig igo odoozhiman gaye wiinawaa ingoji igo izhi-maajaawag.
Oganoonigoon iniw(ii) odoozhiman: “Nenabosho, besho go giga-nibaamin.”
Mii sa ena’anaad odoozhiman.
Gomaa go apii zhigwa owaabamaan anidewaninig*(iii) namadabinid.
“Noos, mii omaa ji-nibaaying,” Nenabosho odigoon.
Gaa-ishkwaa-wiisiniwaad, aweningwaami.*
Gii-zhi-gii-nibaad (gii-zhi-nibaad?).
Megwaa go nanaamadabid baamaa go wenjimawinid Nenaboshoowan.
Azhijiizhaabinaad.*
“Shii, indashkaa niin nimaanaabamigodog,”(iv) odinaan.
Zhigwa dayenibaanid,(v) goshkoziwan.
Aaniish, danakamigizi a’aw ma’iingan.
“Aaniin enaabandaman(vi) gii-mawiyan?”
“Edawaa, nindoozhim gi-maanaabamin.
Waabang a’aw mooz wii-bimi-nazhawad.(vii)
Ambe sa noo, gego ishkwaa pagidooken i’iw mitigoons ziibiinsing mii sa wa go zhigwa debaabamad a’aw mooz.
Mii go iw wii-izhi-minjimendan.”
Zhigwa sa waabanini.
Gigizheb maajaawan wii-biminizha’igenid, Nenabosho ani-maajaa, odoozhiman bima’anaad.
Zhigwa sa ezhikawenid i’iw ozhikawenigobanen(viii) iniw moozoon.
Aaniish aapiji ziigwanini.
Mii sa iw ena’anaad gaye mii iwe iw ezhi-nametoonid iniw odoozhiman; mitigoons ani-apagidoonid i’imaa bangii ziibiinswakamigaanig;
Zhigwa sa debaabamaanigoban iiniw moozoon;
Mii dash geget gichi-enigok maajaanigobanen iiniw odoozhiman;
Mii dash i’iw zhigwa debibinaanigobanen(ix) a’aw ma’iingan aapiji bangii ziibiinswakamigaanig.
Mii go miinooj aazhawigwaashkwanigobanen, gaa-izhi-dishkiikaag i’iw ziibiins, mii dash imaa naanaawagaam gaa-izhi-bangishing.
Pane go gaa-saswenig(x) iiniw otawagan.
Mii sa go i’iw gaawiin gii-mooshkamosig.
Aaniish mii sa gii-wanendang ji-apagidood iw mitigoons.
Nenabosho zhigwa odebaabandaan ziibi bimitigweyaanig, pane odoozhiman bekobiikawenid.
“Edawaa! Mii maawiin iniw gii-nisaabaawed(xi) a’aw nindoozhim.”
Eni-izhi-aazhawa’od; miziwe niisaajiwan aano-izhaa.
Mii sa gaawiin ingoji oname’aasiin.
Gichi-enigok ezhi-mawid Nenabosho; mii sa gabe-giizhik babaamawid, aano-nandonewaad iiniw odoozhiman.
Shkwaach midaasogon aano-nandone’iged, mii sa gaawiin omikawaasiin.
Aapiji sa zhigwa gawanaandam (gwanaandam).
Ningoding igo niisaajiwan izhi-maajaad i’iw ziibi, ningoding sa babimaazhagaamed owaabamaan ogiishkimanisiin agoozinid i’imaa nibiikaang imaa inaabinid.
Wegoneniiwinen ogaagiimaa’aan;(xii) besho odoodisaan.
Aanawii-izhi-nawadinaad, bangii igo obishkobinaan.(xiii)
Mii dash i’iw gaa-ipinaagobanen, mii iw gii-niishkaweyaandibed* a’aw ogiishkimansii.
Ezhi-ganoonigod ogiishkimansiin: “Ojiideyaab Nenabosho niwii-wiindamowaaban wiin iiniw odoozhimaan.”
“Diwe, nishiimisaa! Wegonen waa-wiindamawiyan?”
“Kaa, gidoozhim. Ninganawaabamaa imaa nibiikaang gii-inaabiyaan; mii aw genawaabamag.
Nenabosho, ambe sa noo, giga-wiindamoon gaa-izhiwebizid a’awe menjinawesiyan.(xiv)
Mii giniin i’iw gaa-izhi-ayaad a’aw gidoozhim: ogimaa mishibizhii ogii-wodaapinaan iiniw gidoozhiman.
Imaa dash zaagidawaag iw ziibi mii imaa ayaag i’iw minisinadaawangaa; mii dash imaa endazhi-gii-zhigishing(xv) a’aw ogimaa mishibizhi giishpin mizhakwadinig.
Aapiji minogiizhigadinig mii bijiinag agwaataad i’imaa minisinadaawangaang.
Nenabosho, giishpin babizinidawisiwan,(xvi) gidaa-waabamaa a’aw gidoozhima’iwayaan, gii-pakonaa gosha a’aw gidoozhim.
Mii go i’iw ge-zhi-debwetawiyan gaa-izhiwebizid i’iwe gaa-onji-wani’ad gidoozhim.
Baataniinowan genawenimigod.
Giishpin idash wiin noondawiyan i’iw ge-ininaan, mii go iw waa-doodawad igo, ji-doodawadiban.(xvii)
Ambe sa noo mitigwaab giga-ozhi’aa.
Gii-kiizhi’ad idash, miinawaa giga-ozhitoon i’iw bikwak i’iwe ge-yaabajitooyan.
Giiga-miinin i’iw ge-naaba’igeyan.”(xviii)
Nenabosho omiinigoon bezhig iiniw oshkazhiini.
Ezhi-ganoonigod: “Nenabosho, mii awe ge-naaba’igeyan i’iw gi-bikwak.
Memwech idash apashkweshkway mii aw ge-odajaabiiyan.
Apii dash, Nenabosho, wii-pimwad, gego wiin wiiyawing bimwaaken.
Ji-naateshing(7)(xix) mii’idinong* ge-pimwad.
Ayaangwaamizin wii-pizindawishin.
Gaye i’iw aanosaagan(xx) ji-ozhitooyan, aapiji go giiga-michaatoon i’iw aanosaagan.
Aa, giishpin eta manidoowiyan, mii eta gegoo ji-naabinanad.(xxi)
Manidoowi ogimaa mishibizhii.
Mii sa go i’iw minik ezhi-kikino’amoonaan.
Ayaangwaamizin, gego aanwedawishiken(8).”(xxii)
“Ooh, miigwech waandamawiyan.
Meshkod, ji-pishigendaman giiyaw giiga-izhi’in.”
“Miigwech, Nenabosho, i’iwe ekidoyan.”
Mii sa zhigwa Nenabosho maajitaad wawezhi’aad ogiishkimanisiin.
Zhigwa sa gaagiizhi’aad, “mii iw izhi-waabandizon,(xxiii) ogiishkimanisii,” odinaan.
Mii sa geget ezhi-waabandizod, geget bishigenimo a’aw giishkimanisii.
“Mii sa iw ge-zhinaagoziyan ji-ani-akiiwang,”(xxiv) ikido Nenabosho.
Mii sa Nenabosho ezhi-maajaad, niisaajiwan izhaad.
Besho go degoshing, geget owaabandaan zaaga’igan.
Wegoneniiwinen odoozhitoon i’iw aanosaagan, aapiji go michaatoon.
Gaagii-zhitood, ezhi-boozid ezhi-izhaad imaa minisinadaawangaanig.
Wegoneniiwinen ezhi-gabaad imaa mitaawangaang.
Aatayaa awiya bimikawewa, anooj awiya bimikawewa.
Mii sa zhigwa neyaab ezhi-boozid, ingoji idash ogaadoon i’iw ojiimaan.
Mii sa zhigwa maajitaad omitigwaabiin ozhi’aad gaye i’iw obikwak; ozhitood gaye i’iw genaaba’ang, odooshkazhiiman naaba’igaaged.
Waawiinge(xxv) gaa-giizhitood, zhigwa dibikadini.
Mii sa zhigwa ezhi-waabaninig, Nenabosho ezhi-giigidod: “Ambe sa noo, dawi-anwaatin gabe-giizhik, gaye go ji-wii-mizhakwak.”
Nenabosho omaa nawaj igo noopiming ezhi-zaadiisagokaazod.
Zhigwa bii-ishpagoojinoon iiniw giizisoon, owaabandaan gagiizhibaajiwaninig(xxvi) i’iw zaaga’igan.
Nitam omakakiin mooshkamowan, gaye go anooj igo i’iw isa manidoo, gakina awiya mii go i’iw bemizh[i]gwaadaanid i’imaa minisinadaawangaanig.
Mii go iw bimi-nibaanid aanind.
“Ambe sa noo, ayaangwaamizin,” ikido aw makwa.
“Indigo gosha Nenabosho gii-ganawaabamigonaan, nindinendam.
Amanj isa naa ge-ikidogwen a’aw gidoo-gimaaminaan.”
Inaabid Nenabosho, pane go gaawaasaadigosenig.(xxvii)
Ningoding sa baamaa go naawagaam wenji-mooshkamonid; goniginiin, mishibizhiin!
Geget mindidoowan, bi-naabiwan madwe-giigidoowan: “Nenabosho awedi gaa-niibawid, azaadiisagong gii-izhinaago’o.”(xxviii)
Aanind igo madwe-giigidoowa: “Gayad(xxix) ayaaban a’aw azaadiisag.”
“Gaawiin, mii go a’aw gaa-izhinaagwa’od.”
Aanind idash ikidowag: “Baakajige* nanda menidoowid daa-izhinaago’o nashke gosha, mishi-ginebig, awi-didibinaakwaabiigaw.”
Geget bi-maajaawan ginebigoon.
Zhigwa sa odoodisigoon, mii sa ezhi-kashkaabigidaanid(xxx) enigok.
Aaniish gibanaamo Nenabosho.
Gwej igo waa-pagidanaamod, ezhi-aanawenjigenid.
Ani-giigidoowan: “Mitig a’aw! Aaniin ge-gii-izhinaagozid Nenabosho ge-yaawid?”
Mii sa gaawiin debwe’andazii(xxxi) a’aw ogimaa.
“Daga, giin makwa awi-baazagobish. Mii gosha aw Nenabosho.”
Zhigwa bi-ayaawan iiniw gichi-makwan.
Zhigwa sa odoodisigoon, ezhi-baazagobinigod.
Wiiba go obooni’igoon,(xxxii) eni-zhi-maajaanid.
“Aaniin ge-giizhinaagwak Nenabosho ge-yaawid? - Mii iw izhi-agwaadan.”
Geget bimi-agwaadaawan.
Aapiji naawaya’ii gawishimoowan.
Nenabosho ezhi-kanawaabamaad, geyaabi go wenji-mayaawikweninid.
“Wiikaa ge sa aapiji dawi-boozaangwaami, gakina go gaye i’iw odooshkinawema dawi-boozaangwaamiwa.”
Geget gakina nibaawa.
Zhigwa sa Nenabosho neyaab anishinaabewi, ezhi-izhaad odaanosaaganing.
Niminaawekii’o(10) ezhi-oodoodidang i’imaa endazhi-nibaanid.
Ezhi-gabaad, anaasawaya’ii ani-dadakokii i’iw manidoo.
Zhigwa sa odoodisaan iniw ogimaan.
Aapiji waa-zhebiinid* obimwaan.
Gaawiin ganage goshkobagizosiiwan.
Babaapiniziwaagan!
Geyaabi bezhig odayaan i’iw bikwak ezhi-mamood.
Mii dash i’imaa bijiinag ajinaateshininid, ezhi-bimwaad.
Etawaa, goshkobagizowan.
Aatawaa gichi-baawitigoowanini,(xxxiii) agaawaa go odooditaan iw odaanosaagan.
Mii sa go iw zhigwa ani-nikibiinig(xxxiv) i’iw zaaga’igan gaye iw wajiwan.
Edawaa, zegizi Nenabosho.
Zhigwa imaa bibooniiwan iniw ogiishkimanisiin ezhi-ganoonigod: “Nenabosho, mii sa iw inigaa’ad a’aw bemaadiziban o’omaa akiing.”
Pane go gaawanaadagaanid, anooj awiya.
Gwej igo nekibiinid i’iw mitigoo mii apii ezhi-noogi-mooshka’aninig.(xxxv)
Goniginiin, neyaab ani-iskateni.
“Eh, eh, eh” odigoon ogiishkimanisiin, “Nenabosho gaawiin gi-nisaasii ogimaa mishi-bizhii!”