Gii-gimoodid ishkode Nenabosho / Nenabosho Steals Fire
Aaniish mii sa iw zhigwa gii-nitaawigi’aad a’aw mindimooyenh.
Mii sa iw zhayiigwa(i) ogii-inaan iniw ookomisan: “Gaawiin ina ningoji anishinaabeg gi-kikenimaasiig ji-ayaawaad?”
“Eye,” ogii-igoon iniw ookomisan. “O’owidi agaami-kichigami ayaawag igiw anishinaabeg.”
“Gonage gaa odayaasiinaawaadog i’iw ishkode?”(ii)
“Eye,” ogii-igoon iniw ookomisan; “Geget odayaanaawaa i’iw ishkode.”
O’owidi dash ogii-inaan iniw ookomisan: “Ambe sa noo, ninga-naazikaan(iii) i’iw ishkode,” ogii-inaan ookomisan.
O’owidi dash ogii-igoon iniw ookomisan: “Gaawiin gidaa-kashkitoosiin.
Geget aapiji oganawendaanaawaa i’iw isa endaawaad.
Akiwenzii i’imaa ayaa.
Mii go apane dasing(iv) giizhigadinig asabiin ozhi’aad.
Gaawiin wiikaa ningoji izhaasii, mii go apane imaa biindig ayaad.
Niizhiwa idash i’iw odaanisa’, mii eta moozhag agwajing eyaanid.”(v)
O’ow idash ogii-inaan iniw ookomisan: “Maanoo ninga-izhaa,” ogii-inaan iniw ookomisan.
“Awawa,”(vi) ogii-igoon iniw ookomisan.
Aaniish mii sa apii zhigwa gaa-ikidod: “Ambe sa noo da-gashkadin(vii) o’ow gichigami, wiigwaasabakwaang da-wii-apiitadin o’ow gichigami.”
Mii sa geget gaa-izhiwebadinig iw isa gaa-ikidod.
“O’ow idash ninga-izhinaagos,” kii-ikido; “niindawaa ninga-waaboosoonsiw.”
Aaniish mii sa geget gaa-izhinaagozid.
Mii sa zhigwa gii-maajiiyaadagaakwad.(viii)
Mii sa geget gaawiin gii-dwaashizii.
Aaniish mii sa ogii-kikenimaan i’imaa ayaanid i’iw Anishinaabe.
Mii dash gaa-izhi-dagwishing i’imaa wenda’ibiinid, o’ow idash gii-inendam: “Ambegish sa bi-nibi-naadid a’aw ikwe,” gii-inendam.
O’ow idash gii-izhichige i’imaa waa-ogwaaba’iminid i’iw nibi,
mii dash gaa-izhi-agwaaweba’ogod i’iw gichigami mii imaa gii-titiba’ogod mii imaa iniw kwewan ge-onji-gwaaba’ibiinid.
O’ow idash gii-ikido: “Ambe sa noo ninga-waawiiyadenimik.”
Aaniish mii sa akawaabamaad ji-bi-naasibiinid.(ix)
Goniiginiin.(x) Geget ogii-waabamaan biidaasamosenid.
Mii dash zhigwa imaa dagwishinoon imaa sa ayaad, zhayigwa ogii-gwaaba’aminid.
Gaa-izhi-miikwaawaabamigod(xi) mii sa gaa-pi-izhi-debibinigod(1)
Mii dash i’iw gaa-izhi-siikoobiiginigod(xii) gaa-izhi-kiiwewinigod o’owidi gaa-izhi-piindoomowind(xiii) iw wiiyaw.(2)
Mii sa gaa-izhi-piindiganigod geget ogii-waabamaan akiwenziiyan namadabinid.
Geget asabikewan.
O’ow idash ogii-inaan a’aw ikwe iniw omisenyan: “Nashke giniin,” ogii-inaan giimooch iniw omisenyan.
“Nashke giniin wa’aw gaa-mikawag, waaboozoons.
Ambe eta waawiiyade[t]aagozi(xiv) wa’aw waaboozoons!
Ambe sa noo geyegiin waawiiya[d]enim(xv) ni-misenh wa’aw isa waaboozoons.”
O’ow idash ogii-igoon iniw omisenyan: “Giga-ayaawigonaan koosinaan giga-onsomigonaan,(xvi)” ogii-igoon inow misenyan;
giimooj idash ogii-igoon iniw omisenyan.
Mii dash i’iw gaa-izhi-nandobagwid(xvii) gaa-izhi-pagidinigod i’imaa jiigi-ishkode wii-pengwaawesagod.
Mii dash i’iw baapi’aad igiw ikwewag wawiiya[n]enimaawaad iniw waabozoonsan.
Ezhi-kikenimigowaad iniw oosiwaan. “Gidoombiigizim,(xviii)” ogii-igoowaan iniw oosiwaan.
O’ow idash ogii-inaawaan iniw oosiwaan: “Nashke giniin,” ogii-inaawaan.
“Nashke giniin wa’aw waaboozoons.”
“she!” ogii-igowaan iniw oosiwaan.
“Gaawiin ina gigii-noondaziim igiw manidoog i’iw gii-niigiwaad?
Gaa na mii aw bezhig aawisiidog. Awi-asig,”(xix) ogii-igowaan iniw oosiwaan.
“Geget sa gii-gagiibaadizim i’iw isa gii-odaapineg.”
O’ow idash gii-ikido aw ikwe: “Etata gosha ni-wawiyadenimaa(xx) a’aw isa waaboozoons.”
O’ow idash ogii-inaan iniw oosan: “Aaniin gegii-izhinaagwak(3) i’iw is age-waaboozoonsiwid a’aw manidoo?” ogii-inaan iniw oosan.
O’ow idash gii-ikido: “Geget sa gaawiin gi-nitaa-noondazii.
Gaawiin ina gi-waabamisii epiichinaagoziyaan?”(xxi)
O’ow idash gii-izhichige a’aw ikwe nawanj igo ogii-abizwaan(xxii) iniw waaboozoonsan;
i’iw isa wii-pengwaaweswaad gaa-izhi-kwekwekishimaad(xxiii) imaa jiigishkode.
O’ow idash gii-inendam a’aw Nenabosho: “Mii maawiin iw zhigwa bengwaawesowaanen.”
Aaniish obaapi’aawaan igiw ikwewag.
O’ow idash gii-inendam: “Ambe sa noo ninga-pakines.”(xxiv)
Geget ezhi-pakinezod.
Gaa-izhinawadizod gaa-izhi-gichikwaashkwaanid.(xxv)
O’ow idash gii-ikidowag igiw ikwewag, “Nashke giniin, ozaagijibadwaadaan(xxvi) i’iw ishkode!” odinaawaan iniw oosiwaan.
“Ayii!” gii-ikido a’aw akiwenzii;
“geget sa gaawiin gi-nitaa-noondaziim gegoo aano-igoyegin.
Kaa na mii a’aw bezhig manidoo(4) bamakaminang(xxvii) iw gidishkodeminaan.”
Gaa-izhi-pazigonjised a’aw akiwenzii aanoo-giimawinadang(xxviii) i’iw ojiimaan.
Aano-gii-izhi-madabiiwebinang, mii dash gaa-izhi-mikwamiikaanig.(xxix)
Mii dash anishaa go gaa-izhi-ganawaabamaawaad mishawi-gichigami ani-ozhaawashkwaakonenid,
mii dash biinish gaa-izhi-pishkwaabamaawaad.(xxx)
Aaniish gii-gwiinawi-izhichigewag.(xxxi)
Mii dash zhigwa odebaabandaan endaawaad wo’ow idash ogii-inaan iniw ookomisan jibwaa-maajaad:
“ashwiin, maagizhaa geget biidooyaan i’iw ishkode,” ogii-inaan iniw ookomisan.
Gaa-izhi-kanoonaad apii debaabandang i’iw endaawaad, o’ow ogii-inaan abi-baandigesed iniw ookomisan:
“aatawebishin ninjaagis, nookoo!”
Mii dash geget gaa-izhi-aatawebinaad a’aw mindimoyenh.
Mii dash i’iw imaa gaa-ondinamowaad i’iw ishkode.
O’ow idash gii-ikido a’aw Nenabosho: “Mii sa iw gaa-izhinaagozid a’aw waabooz i’iw ji-niibing.”(5)
Mii sa iw zhayiigwa(i) ogii-inaan iniw ookomisan: “Gaawiin ina ningoji anishinaabeg gi-kikenimaasiig ji-ayaawaad?”
“Eye,” ogii-igoon iniw ookomisan. “O’owidi agaami-kichigami ayaawag igiw anishinaabeg.”
“Gonage gaa odayaasiinaawaadog i’iw ishkode?”(ii)
“Eye,” ogii-igoon iniw ookomisan; “Geget odayaanaawaa i’iw ishkode.”
O’owidi dash ogii-inaan iniw ookomisan: “Ambe sa noo, ninga-naazikaan(iii) i’iw ishkode,” ogii-inaan ookomisan.
O’owidi dash ogii-igoon iniw ookomisan: “Gaawiin gidaa-kashkitoosiin.
Geget aapiji oganawendaanaawaa i’iw isa endaawaad.
Akiwenzii i’imaa ayaa.
Mii go apane dasing(iv) giizhigadinig asabiin ozhi’aad.
Gaawiin wiikaa ningoji izhaasii, mii go apane imaa biindig ayaad.
Niizhiwa idash i’iw odaanisa’, mii eta moozhag agwajing eyaanid.”(v)
O’ow idash ogii-inaan iniw ookomisan: “Maanoo ninga-izhaa,” ogii-inaan iniw ookomisan.
“Awawa,”(vi) ogii-igoon iniw ookomisan.
Aaniish mii sa apii zhigwa gaa-ikidod: “Ambe sa noo da-gashkadin(vii) o’ow gichigami, wiigwaasabakwaang da-wii-apiitadin o’ow gichigami.”
Mii sa geget gaa-izhiwebadinig iw isa gaa-ikidod.
“O’ow idash ninga-izhinaagos,” kii-ikido; “niindawaa ninga-waaboosoonsiw.”
Aaniish mii sa geget gaa-izhinaagozid.
Mii sa zhigwa gii-maajiiyaadagaakwad.(viii)
Mii sa geget gaawiin gii-dwaashizii.
Aaniish mii sa ogii-kikenimaan i’imaa ayaanid i’iw Anishinaabe.
Mii dash gaa-izhi-dagwishing i’imaa wenda’ibiinid, o’ow idash gii-inendam: “Ambegish sa bi-nibi-naadid a’aw ikwe,” gii-inendam.
O’ow idash gii-izhichige i’imaa waa-ogwaaba’iminid i’iw nibi,
mii dash gaa-izhi-agwaaweba’ogod i’iw gichigami mii imaa gii-titiba’ogod mii imaa iniw kwewan ge-onji-gwaaba’ibiinid.
O’ow idash gii-ikido: “Ambe sa noo ninga-waawiiyadenimik.”
Aaniish mii sa akawaabamaad ji-bi-naasibiinid.(ix)
Goniiginiin.(x) Geget ogii-waabamaan biidaasamosenid.
Mii dash zhigwa imaa dagwishinoon imaa sa ayaad, zhayigwa ogii-gwaaba’aminid.
Gaa-izhi-miikwaawaabamigod(xi) mii sa gaa-pi-izhi-debibinigod(1)
Mii dash i’iw gaa-izhi-siikoobiiginigod(xii) gaa-izhi-kiiwewinigod o’owidi gaa-izhi-piindoomowind(xiii) iw wiiyaw.(2)
Mii sa gaa-izhi-piindiganigod geget ogii-waabamaan akiwenziiyan namadabinid.
Geget asabikewan.
O’ow idash ogii-inaan a’aw ikwe iniw omisenyan: “Nashke giniin,” ogii-inaan giimooch iniw omisenyan.
“Nashke giniin wa’aw gaa-mikawag, waaboozoons.
Ambe eta waawiiyade[t]aagozi(xiv) wa’aw waaboozoons!
Ambe sa noo geyegiin waawiiya[d]enim(xv) ni-misenh wa’aw isa waaboozoons.”
O’ow idash ogii-igoon iniw omisenyan: “Giga-ayaawigonaan koosinaan giga-onsomigonaan,(xvi)” ogii-igoon inow misenyan;
giimooj idash ogii-igoon iniw omisenyan.
Mii dash i’iw gaa-izhi-nandobagwid(xvii) gaa-izhi-pagidinigod i’imaa jiigi-ishkode wii-pengwaawesagod.
Mii dash i’iw baapi’aad igiw ikwewag wawiiya[n]enimaawaad iniw waabozoonsan.
Ezhi-kikenimigowaad iniw oosiwaan. “Gidoombiigizim,(xviii)” ogii-igoowaan iniw oosiwaan.
O’ow idash ogii-inaawaan iniw oosiwaan: “Nashke giniin,” ogii-inaawaan.
“Nashke giniin wa’aw waaboozoons.”
“she!” ogii-igowaan iniw oosiwaan.
“Gaawiin ina gigii-noondaziim igiw manidoog i’iw gii-niigiwaad?
Gaa na mii aw bezhig aawisiidog. Awi-asig,”(xix) ogii-igowaan iniw oosiwaan.
“Geget sa gii-gagiibaadizim i’iw isa gii-odaapineg.”
O’ow idash gii-ikido aw ikwe: “Etata gosha ni-wawiyadenimaa(xx) a’aw isa waaboozoons.”
O’ow idash ogii-inaan iniw oosan: “Aaniin gegii-izhinaagwak(3) i’iw is age-waaboozoonsiwid a’aw manidoo?” ogii-inaan iniw oosan.
O’ow idash gii-ikido: “Geget sa gaawiin gi-nitaa-noondazii.
Gaawiin ina gi-waabamisii epiichinaagoziyaan?”(xxi)
O’ow idash gii-izhichige a’aw ikwe nawanj igo ogii-abizwaan(xxii) iniw waaboozoonsan;
i’iw isa wii-pengwaaweswaad gaa-izhi-kwekwekishimaad(xxiii) imaa jiigishkode.
O’ow idash gii-inendam a’aw Nenabosho: “Mii maawiin iw zhigwa bengwaawesowaanen.”
Aaniish obaapi’aawaan igiw ikwewag.
O’ow idash gii-inendam: “Ambe sa noo ninga-pakines.”(xxiv)
Geget ezhi-pakinezod.
Gaa-izhinawadizod gaa-izhi-gichikwaashkwaanid.(xxv)
O’ow idash gii-ikidowag igiw ikwewag, “Nashke giniin, ozaagijibadwaadaan(xxvi) i’iw ishkode!” odinaawaan iniw oosiwaan.
“Ayii!” gii-ikido a’aw akiwenzii;
“geget sa gaawiin gi-nitaa-noondaziim gegoo aano-igoyegin.
Kaa na mii a’aw bezhig manidoo(4) bamakaminang(xxvii) iw gidishkodeminaan.”
Gaa-izhi-pazigonjised a’aw akiwenzii aanoo-giimawinadang(xxviii) i’iw ojiimaan.
Aano-gii-izhi-madabiiwebinang, mii dash gaa-izhi-mikwamiikaanig.(xxix)
Mii dash anishaa go gaa-izhi-ganawaabamaawaad mishawi-gichigami ani-ozhaawashkwaakonenid,
mii dash biinish gaa-izhi-pishkwaabamaawaad.(xxx)
Aaniish gii-gwiinawi-izhichigewag.(xxxi)
Mii dash zhigwa odebaabandaan endaawaad wo’ow idash ogii-inaan iniw ookomisan jibwaa-maajaad:
“ashwiin, maagizhaa geget biidooyaan i’iw ishkode,” ogii-inaan iniw ookomisan.
Gaa-izhi-kanoonaad apii debaabandang i’iw endaawaad, o’ow ogii-inaan abi-baandigesed iniw ookomisan:
“aatawebishin ninjaagis, nookoo!”
Mii dash geget gaa-izhi-aatawebinaad a’aw mindimoyenh.
Mii dash i’iw imaa gaa-ondinamowaad i’iw ishkode.
O’ow idash gii-ikido a’aw Nenabosho: “Mii sa iw gaa-izhinaagozid a’aw waabooz i’iw ji-niibing.”(5)