Nenabosho and the Wolves
Ningoding zaaga’igan omadaagon*.
Ezhi-maajiiyaadagaagod, wabigamaanig beshwaabandang, awiya owaabamaan bimaadagaagopatoonid; aazha miinawaa, niiwiwa’.
Goniginiin, mahiingana’!
Ezhi-biibaagimaad: “Nijiimijaa* [nishiimisaa] akawe, ga-waabamininim!”
Geget gii-bijibatoowa’; ezhiwawenabinid ani-naazikawaad.
Ezhi-ganoonaad: “Niiji-saziikizi, aandi ezhaayeg?”
“Kaa, o’owidi, giizhigadikwaning, mii iwidi ezhaayaang.
Niibinong gii-asanjigoobanig ogow gidooshimag, gichi-ayaaben ogii-nisaawaabaniin.
Mii dash iwidi ezhaayaang.
“Ediwe, mii gaye niin iwidi ezhaayaan, giizhigadikwaning, - mii sa i’iw ji-ani-waawiijiiwinagog.
Aaniish, mii iw zhigwa w[e]naagoshininig.
“Aaniish i’iw, Jiijiigwaanoowis,(1) ani-nanda-oninamaasiwan, maagizhaa da-kisinaa dibikad.
Daga, gi-mishoome’iwaa dani-andoo-oninamaa.”
Aaniish, mii sa geget Nenabosho ani-nanda’oninamaad.
Gaaw[ii] saa nitaawosesii, aano-wiijiiwaad i’iw mahiingana’.
Ezhi-ganoonind Nenabosho: “Ambe sinoo, endoodamaang igo bimibatooyaang, mii gaye giin ge-doodaman.”
Taayaa, gaye wiin doodam.
Aaniish mii dash iw gaawiin gegoo i’iw ozoow, mii dash i’iw wiinag i’iw wezoowaad.
Gaawiin ganage noomag zhigwa ani-mashkawaakwadininig.
“Geget mii maawiin iw ji-nibod gi-mishoomenaan, mashkawaakwadininig i’iw wiinag.
Indawaa giizhoodoowaadaa.”
Mii dash a’aw bezhig mahiingan obiidawazhaan*(2) ezhi-wiiwakwepijigaadenig.
Aapiji igo wasitaawinaagozi aano-pimibatood.
Zhigwa sa omikaan aapiji dabinawaanig.*
“Mii sa omaa ji-nibaayang.”
“Ii! Gaawe sa, gidaa-giikajimin.”
“Daga, giin Jiijiigwaanoowis,” inimaawan iniw akiwenzii mahiinganan.
Geget mii dash i’iw nando-gabeshid aapiji omikaan enaasa’amanininig.
“Mii sa omaa ji-nibaayang.”
Aaniish misan odookwaakowebinaanan.
“A[h]aaw, Nenabosho, boodawen,” inaa Nenabosho.
Aaniish mii sa Nenabosho aanawi-boodawed.
Akawe giizhikisagoon ogii-shibaawebinaan.
Ezhi-ganoonind: “Nenabosho, aaniin naa endoodaman wii-boodaweyan?”
Nashke sa, ganawaabamishin endoodaming waa-boodawengin.”
Goniginiin iniw akiwenzii mahiinganan bazigwiiwan, okwaakwishininig iniw misan ezhi-paashijigwaashkwaninid; mii sa ishkode ezhi-biskaakonenig.
Zhigwa sa dibikadini, ezhi-kawishimod Nenabosho.
Edawaa Nenabosho! Aapiji noondaagozi, epiichi-giikajid.
“Ishte, gi-mishoomenaan mii maawiin iw wii-kawajid, indawaa biidawashe’ig.”
Bezhig ba-izhi-naanaweninid.
Wiiba go amajibiizo.
“Shii, geget sa ow animwaanoowish nindabweshkaagon!”
Aaniish wiiba go miinawaa giikaji.
Ezhi-noondaagozid, “Aaniinde, biidawazhe’ig miinawaa gi-mishoome’iwaa.”
Bezhig ezhi-gii-ikidod: “Ingoji gosha ogii-apagidoon aano-biidawazhe’ag.”
Geget miinawaa ba-izhii’inanooweninid iniw mahiinganan.
Mii dash naa iw ezhi-waabaninig.
Zhigwa gikizheb ezhi-ganoonind Nenabosho: “Naawkweg mii apii ge-oditamang i’iw asanjigon.”
Ezhi-maajaawaad, odaanaang bimosewag iniw wiidakiwenziiyan moozhag oniigaanii’igoon.
Ningoding igo oganoonigoon akiwenzii mahiinganan: “Nenabosho, ambe sa noo, indawaa, gegoo osoowaaken i’iwe giinag, ozaam maazhimaagwad.
Indawaa go ezhichigeyamban mii iw izhichigen ji-bimoseyan.”
Nenabosho mii sa geget ezhichiged, mii sa bijiinag mino-bimosed.
Aapiji go odibi’aa i’iw mahiingana’.
Zhigwa sa dagwishinoog asanjigoning.
Aazha danakamigiziwa’ moona’aminid asanjigon.
Oganoonigoon wiidakiwenziiyan: “Nenabosho, mii sa zhigwa ji-wiisiniyang.
Ahaaw, wiijii’iwen ji-mooka’asanjigong.”
Geget Nenabosho wiijii’iwe i’iw mooka’igaadenig asanjigon.
Zhayiigwa owaabandaanan Nenabosho.
Etawaa, wadoobaakonisagoon gaye i’iw anagekwan gedaawananid.
“Dawad, dawad,* aweneniiwinenag ogow!
Mii iw gaawiin wiin wiikaa miijisiim iniw mitigoshan!”
“Nenabosho, gego ikidoken.
Nashke bijiinag gikizheb, giga-minowiisin.”
Bangii miinawaa i’iw odoobaakonisag gaye iw anagekwan.
“Gego wiin noondaa dibik waabandangen.
Baamaa gikizheb ga-wiisinimin.”
Mii sa zhigwa dibikadinig Nenabosho eni-kweshing odatoon i’iw gaa-miinind.
Ezhi-nibaad Nenabosho.
Ningoding igo dibikadinig wegoneniiwinen owaabandaan i’iwe gaa-miinind.
Etiwe, goniginiin, moozonagish mii iwe iw wadoopaakonisagong gaa-izhinang, miinawaa wanagekwan mii iniw oshoobiin.
Mii go i’iw ezhi-pakwendang, geget ominopidaan.
Mii sa miinawaa ezhi-apikweshimod.
Zhigwa sa waabanini, pane go gaa-moojigizinid i’iw mahiingana’, wendago geget mino-wiisiniwa’.
“Ahaaw, Nenabosho, gaye giin aabiiginan gida-shamigoowin.”
Nenabosho ezhi-waabandang, etawaa, mii geyaabi odoobaakonisag gaye i’iw wanagekwan.
Ezhi-ganoonind Nenabosho: “Dibikong sa gigii-waabandaan o’ow.”
“Gaawiin ningii-waabandaziin.”
“Nenabosho, gidenaabideshin dibikong i’iw gii-pakwendamoowanaan.”
“Indawaa, ashamig gi-mishoome’iwaa.”
Mii sa geget ashamaa, wendago geget Nenabosho de-wiisini.
Zhigwa sa ezhi-ganoonind Nenabosho: “Indawaa giiwen.
Gamaajiida’igoo gi-mindimoo’[ye]mish ge-miijid.”
“Gaawiin ozaam bakade.
Maanoo ga-wiijiiwininim.”
“Aaw, Nenabsohso, ga-wiijiiwigoo.
Aayaangwaamizin, gwayak wii-izhiwebizin.
Waabang giga-gozimin.
Wii-andawenjigewag ogow gidoozhimag, moozoon wii-andawaabamaawaan.”
Mii sa weyaabaninig ezhi-goziwaad.
Aapiji gikizheb maajaawa’ i’iw odooshkinawemiwaa; wiikaa dash ani-maajaawag Nenabosho iniw wiidakiwenziiyan [wiijiakiwenziiyan?] maada’anaawaad mahiingana’.
Nayaawakwenig mii iw oshikawaanigobanen i’iw moozoo.
Bezhig idash igo gii-maajiniizhawaanigoban,* mii sa bima’anaawaad.
Ningoding igo obimweshkidiwinini iniw mahiinganan gii-ani-ateni.
Nenabosho ezhi-ganoonind: “Nenabosho, ani-dakonaw iniw obiidawashaan aw gidoozhim.”
“Aaniinda ge-doodamaan animo-mooowish ge-ani-dakonamaan?”
“Tayaa, Nenabosho! Gaawiin gidaa-ikidosii.”
Mahiingan ezhi-odaapinang, goniginiin, makadewegin odoonji-mamoonini; iniw mahiinaganan baapaawiwebinaminid.
“Nishiimisaa, niin ninga-nipimiwidoowaan nindoozhim i’iw obiidawashaan.”
Mii sa enizhi-dakonamawaad.
Mii sa i’iw eni-izhi-niizha’igekawenid eni-izhaawaad iniw mahiingana’.
Ningoding igo mitigong badakaakwisinini i’iw wiibidaani iniw mahiinaganan.
“Nashke gosha! Gidoozhim gaa-bidaakwa’egwen.
Daga giijigobidoon, Nenabosho, gidoozhim i’iw omitigwanwi ani-dakwonamaw.”
“Aaniinda ge-doodamaan animwaabidish ge-ni-dakonamaan?”
“Nenabosho, gego ikidiken.”
Akiwenzii-mahiingan ezhi-giijigwandang.
Goniginiin, mitigwanwi odoonji-mamoon.
“Daga, niin ninga-ni-dakonaan.”
“Nenabosho, gego wiin ingoji pagidooken.
Giga-zanagi’aa gidoozhim giishpin ingoji apagidoowad.”
Ningoding igo bapima’anaawaad i’iw goniginiin, aapiji bezhigini odaadaagwanesewan niibideyaabanigozinid.
Nenabosho ganoonaa: “Awenen giin gezhiikaagwen gidinendam?”
Odizhinoowaan iniw mejikawe’aad, ezhi-giigidod: “Naabisa nashwiina aw mindimooyenzh wiin a’aw.
Ogow wijago* mii wa gogo* ge-nagashiwewaad.”*
“Gaawiin, mii sa wa’aw ge-nagashiwed.”
Ani-babimosewaad.
Zhigwa aapiji gaa-ki’aanigoban.*
Ningoding igo owaabamaawa’ zhingishininid.
“E, e, ii, gaawiin ina wiin gigigegoosiimin.*
Ahaaw, Nenabosho, ozhiitaan, gedazhimoosokeyang ga-wi-zhitoomin.”
Aaniish Nenabosho aano-inaabid, gaawiin awiya owaabamaasiin ji-abinid moozoon.
Aaniish mii eta go iw omiskwiiwaagonagaanig weyaabandang.
Aapiji sa dadebisiniiwa’.
Nenabosho ezhi-manaazhided, mii dash imaa ezhaad ayidaag zhingishininid iniw bezhig iniw mahiinganan.
Wegoneniiwinen obapasigonjiwebishkawaan.
“Ajimaajiishta’a! Minik gii-gidaanawe?”
Jaangaakwenowan.
“Geget sa giwaawiisagishkaw, Nenabosho.
Gego izhichigeken, Nenabosho.”
Ganoonaa Nenabosho: “ Bizaanayaan.
Giishpin miinawaa gegoo wii-doodaman, mii iw gaawiin giga-shamigoosii.”
Aatayaa, Nenabosho enigok anokii.
Gaawanabii* ogiizhiikaanaawaa i’iw waa-dazhi-moosokewaad.
Ezhi-ganoonaawaad: “Mii sa iw gii-giizhiitaayaang.”
Bapazigwiiwa’ bimi-izhaawa’ i’imaa gii-apishimoonikewaad.
Zhigwa bezhig zhishigagowewan, mii go iw bezhig i’iw ozagiini* ezhi-miziwe-pangisininig.
Geget maamakaadendam Nenabosho, geget minwendam; wendago bekish nanagamoosiwi, epiichi-minwendang a’aw Nenabosho.
“Ambe sa, agwaawaanaakokedaa.”
Gaawanapii ogii-zhitoonaawaa i’iw agwaawaanaak.
Mii sa bijiinag giizhisekwewaad Nenabosho aapiji sa dewiisini.
Abaapish debikadinig, ezhi-nibaawaad.
Zhigwa waabanini.
Gikizheb igo giigidoowan iniw akiwenzii-mahiinganan: “Mii sa zhigwa ji-gii’akeyaambaan.
Aaniish gaawiin wiikaa awiya nin-ganawaabamigoosii i’iw waa-yakeyaanin.
Indawaa akawe badagwiingweshinog.”
Geget badagwiingweshinowag.
Aaniish Nenabosho gaye wiin badagwiingweshin.
Indigonada* madwe-ganaganjige, inendam Nenabosho.
Wegoneniiwinen bangii odoonji-ganawaabamaan na’idaak odazhi-gagwaadigwandamini iw okan.
Wegoneniiwinen ezhi-pishagwandaminid.
Edawaa! Aapiji i’imaa oshkiizhigong ezhi-pangisininig.
Nenabosho mii sa ezhi-giiwashkweshkaagod.
Anishaa go dakaabaawanind wenji-mikawid.
Gaa-mikawid, ganoonaa: “Nenabosho, ganawaabamiwaamban i’iw akeyaan.”
Mii sa iw miinawaa ezhi-dibikadinig; zhigwa waabanini.
Aapiji gikizheb giigido Nenabosho: “Miijajigwa [Mii sa azhigwa?] wii-akeyaan.
Gaawiin anishaa wiikaa nin-ganawaabamigoo[s]ii i’iw waa-akeyaanin.
Indawaa badagwiingweshinog.”
Aaniish, gakina ezhi-padagwiingweshinowaad, Nenabosho madwewe’ige biigwa’ang iniw okanan.
Aaniish, aapiji bimidikweshinoon iniw akiwenzii-mahiinganan.
Wegoneniiwinen odani-naazikawaan.
Gaa-mamood odookanim, gichi-enigok okweganaaning ezhi-bakite’owaad.
Wendago geget mii iw ezhi-deyaabidaganaamaad.
Geget sa zegiziwag igiw we[y]oosiwaad.
Tawaa! Ezhi-dakaabaawanaawaad.
Geget bangii gegoo inaa mekawinid: “Nenabosho, indawaa mii iw izhi-shkwaataan, ozaam wiijiiwigooyan, anooj igo gidizhiwebis.”
“Gaawiin maanoo go gii-wiijiiwininim!”
“Aaw, Nenabosho, bizaanayan ga-wiijiiwigoo.”
Wayaabaninig gabe-giizhig wiisiniwag.
Zhigwa wenaagoshininig giigidoowan iniw akiwenzii-mahiinganan: “Indawaa sa waabang ga-maajaamin ji-goziyang.”
Aaniish nawaj igo zhiingenimaa.
“Nenabosho, ambe sa, waabang gwii-bakewinigoo.”
“Gaawiin. Ambe sa noo a’aw bezhig nindoozhim ninga-wiijii’ayaawaa [wiijiiwaa] giishpin inendaman.
Gaawiin wiikaa gegoo de-izhiwebizisii.”
“Aaniish naa, Nenabosho, ga-miinin a’aw ni-niijaanis.
Gi-gikenimin manidoowiyan, mii iw waa-onji-miininaan.”
Ezhi-maajiiyaadagaagod, wabigamaanig beshwaabandang, awiya owaabamaan bimaadagaagopatoonid; aazha miinawaa, niiwiwa’.
Goniginiin, mahiingana’!
Ezhi-biibaagimaad: “Nijiimijaa* [nishiimisaa] akawe, ga-waabamininim!”
Geget gii-bijibatoowa’; ezhiwawenabinid ani-naazikawaad.
Ezhi-ganoonaad: “Niiji-saziikizi, aandi ezhaayeg?”
“Kaa, o’owidi, giizhigadikwaning, mii iwidi ezhaayaang.
Niibinong gii-asanjigoobanig ogow gidooshimag, gichi-ayaaben ogii-nisaawaabaniin.
Mii dash iwidi ezhaayaang.
“Ediwe, mii gaye niin iwidi ezhaayaan, giizhigadikwaning, - mii sa i’iw ji-ani-waawiijiiwinagog.
Aaniish, mii iw zhigwa w[e]naagoshininig.
“Aaniish i’iw, Jiijiigwaanoowis,(1) ani-nanda-oninamaasiwan, maagizhaa da-kisinaa dibikad.
Daga, gi-mishoome’iwaa dani-andoo-oninamaa.”
Aaniish, mii sa geget Nenabosho ani-nanda’oninamaad.
Gaaw[ii] saa nitaawosesii, aano-wiijiiwaad i’iw mahiingana’.
Ezhi-ganoonind Nenabosho: “Ambe sinoo, endoodamaang igo bimibatooyaang, mii gaye giin ge-doodaman.”
Taayaa, gaye wiin doodam.
Aaniish mii dash iw gaawiin gegoo i’iw ozoow, mii dash i’iw wiinag i’iw wezoowaad.
Gaawiin ganage noomag zhigwa ani-mashkawaakwadininig.
“Geget mii maawiin iw ji-nibod gi-mishoomenaan, mashkawaakwadininig i’iw wiinag.
Indawaa giizhoodoowaadaa.”
Mii dash a’aw bezhig mahiingan obiidawazhaan*(2) ezhi-wiiwakwepijigaadenig.
Aapiji igo wasitaawinaagozi aano-pimibatood.
Zhigwa sa omikaan aapiji dabinawaanig.*
“Mii sa omaa ji-nibaayang.”
“Ii! Gaawe sa, gidaa-giikajimin.”
“Daga, giin Jiijiigwaanoowis,” inimaawan iniw akiwenzii mahiinganan.
Geget mii dash i’iw nando-gabeshid aapiji omikaan enaasa’amanininig.
“Mii sa omaa ji-nibaayang.”
Aaniish misan odookwaakowebinaanan.
“A[h]aaw, Nenabosho, boodawen,” inaa Nenabosho.
Aaniish mii sa Nenabosho aanawi-boodawed.
Akawe giizhikisagoon ogii-shibaawebinaan.
Ezhi-ganoonind: “Nenabosho, aaniin naa endoodaman wii-boodaweyan?”
Nashke sa, ganawaabamishin endoodaming waa-boodawengin.”
Goniginiin iniw akiwenzii mahiinganan bazigwiiwan, okwaakwishininig iniw misan ezhi-paashijigwaashkwaninid; mii sa ishkode ezhi-biskaakonenig.
Zhigwa sa dibikadini, ezhi-kawishimod Nenabosho.
Edawaa Nenabosho! Aapiji noondaagozi, epiichi-giikajid.
“Ishte, gi-mishoomenaan mii maawiin iw wii-kawajid, indawaa biidawashe’ig.”
Bezhig ba-izhi-naanaweninid.
Wiiba go amajibiizo.
“Shii, geget sa ow animwaanoowish nindabweshkaagon!”
Aaniish wiiba go miinawaa giikaji.
Ezhi-noondaagozid, “Aaniinde, biidawazhe’ig miinawaa gi-mishoome’iwaa.”
Bezhig ezhi-gii-ikidod: “Ingoji gosha ogii-apagidoon aano-biidawazhe’ag.”
Geget miinawaa ba-izhii’inanooweninid iniw mahiinganan.
Mii dash naa iw ezhi-waabaninig.
Zhigwa gikizheb ezhi-ganoonind Nenabosho: “Naawkweg mii apii ge-oditamang i’iw asanjigon.”
Ezhi-maajaawaad, odaanaang bimosewag iniw wiidakiwenziiyan moozhag oniigaanii’igoon.
Ningoding igo oganoonigoon akiwenzii mahiinganan: “Nenabosho, ambe sa noo, indawaa, gegoo osoowaaken i’iwe giinag, ozaam maazhimaagwad.
Indawaa go ezhichigeyamban mii iw izhichigen ji-bimoseyan.”
Nenabosho mii sa geget ezhichiged, mii sa bijiinag mino-bimosed.
Aapiji go odibi’aa i’iw mahiingana’.
Zhigwa sa dagwishinoog asanjigoning.
Aazha danakamigiziwa’ moona’aminid asanjigon.
Oganoonigoon wiidakiwenziiyan: “Nenabosho, mii sa zhigwa ji-wiisiniyang.
Ahaaw, wiijii’iwen ji-mooka’asanjigong.”
Geget Nenabosho wiijii’iwe i’iw mooka’igaadenig asanjigon.
Zhayiigwa owaabandaanan Nenabosho.
Etawaa, wadoobaakonisagoon gaye i’iw anagekwan gedaawananid.
“Dawad, dawad,* aweneniiwinenag ogow!
Mii iw gaawiin wiin wiikaa miijisiim iniw mitigoshan!”
“Nenabosho, gego ikidoken.
Nashke bijiinag gikizheb, giga-minowiisin.”
Bangii miinawaa i’iw odoobaakonisag gaye iw anagekwan.
“Gego wiin noondaa dibik waabandangen.
Baamaa gikizheb ga-wiisinimin.”
Mii sa zhigwa dibikadinig Nenabosho eni-kweshing odatoon i’iw gaa-miinind.
Ezhi-nibaad Nenabosho.
Ningoding igo dibikadinig wegoneniiwinen owaabandaan i’iwe gaa-miinind.
Etiwe, goniginiin, moozonagish mii iwe iw wadoopaakonisagong gaa-izhinang, miinawaa wanagekwan mii iniw oshoobiin.
Mii go i’iw ezhi-pakwendang, geget ominopidaan.
Mii sa miinawaa ezhi-apikweshimod.
Zhigwa sa waabanini, pane go gaa-moojigizinid i’iw mahiingana’, wendago geget mino-wiisiniwa’.
“Ahaaw, Nenabosho, gaye giin aabiiginan gida-shamigoowin.”
Nenabosho ezhi-waabandang, etawaa, mii geyaabi odoobaakonisag gaye i’iw wanagekwan.
Ezhi-ganoonind Nenabosho: “Dibikong sa gigii-waabandaan o’ow.”
“Gaawiin ningii-waabandaziin.”
“Nenabosho, gidenaabideshin dibikong i’iw gii-pakwendamoowanaan.”
“Indawaa, ashamig gi-mishoome’iwaa.”
Mii sa geget ashamaa, wendago geget Nenabosho de-wiisini.
Zhigwa sa ezhi-ganoonind Nenabosho: “Indawaa giiwen.
Gamaajiida’igoo gi-mindimoo’[ye]mish ge-miijid.”
“Gaawiin ozaam bakade.
Maanoo ga-wiijiiwininim.”
“Aaw, Nenabsohso, ga-wiijiiwigoo.
Aayaangwaamizin, gwayak wii-izhiwebizin.
Waabang giga-gozimin.
Wii-andawenjigewag ogow gidoozhimag, moozoon wii-andawaabamaawaan.”
Mii sa weyaabaninig ezhi-goziwaad.
Aapiji gikizheb maajaawa’ i’iw odooshkinawemiwaa; wiikaa dash ani-maajaawag Nenabosho iniw wiidakiwenziiyan [wiijiakiwenziiyan?] maada’anaawaad mahiingana’.
Nayaawakwenig mii iw oshikawaanigobanen i’iw moozoo.
Bezhig idash igo gii-maajiniizhawaanigoban,* mii sa bima’anaawaad.
Ningoding igo obimweshkidiwinini iniw mahiinganan gii-ani-ateni.
Nenabosho ezhi-ganoonind: “Nenabosho, ani-dakonaw iniw obiidawashaan aw gidoozhim.”
“Aaniinda ge-doodamaan animo-mooowish ge-ani-dakonamaan?”
“Tayaa, Nenabosho! Gaawiin gidaa-ikidosii.”
Mahiingan ezhi-odaapinang, goniginiin, makadewegin odoonji-mamoonini; iniw mahiinaganan baapaawiwebinaminid.
“Nishiimisaa, niin ninga-nipimiwidoowaan nindoozhim i’iw obiidawashaan.”
Mii sa enizhi-dakonamawaad.
Mii sa i’iw eni-izhi-niizha’igekawenid eni-izhaawaad iniw mahiingana’.
Ningoding igo mitigong badakaakwisinini i’iw wiibidaani iniw mahiinaganan.
“Nashke gosha! Gidoozhim gaa-bidaakwa’egwen.
Daga giijigobidoon, Nenabosho, gidoozhim i’iw omitigwanwi ani-dakwonamaw.”
“Aaniinda ge-doodamaan animwaabidish ge-ni-dakonamaan?”
“Nenabosho, gego ikidiken.”
Akiwenzii-mahiingan ezhi-giijigwandang.
Goniginiin, mitigwanwi odoonji-mamoon.
“Daga, niin ninga-ni-dakonaan.”
“Nenabosho, gego wiin ingoji pagidooken.
Giga-zanagi’aa gidoozhim giishpin ingoji apagidoowad.”
Ningoding igo bapima’anaawaad i’iw goniginiin, aapiji bezhigini odaadaagwanesewan niibideyaabanigozinid.
Nenabosho ganoonaa: “Awenen giin gezhiikaagwen gidinendam?”
Odizhinoowaan iniw mejikawe’aad, ezhi-giigidod: “Naabisa nashwiina aw mindimooyenzh wiin a’aw.
Ogow wijago* mii wa gogo* ge-nagashiwewaad.”*
“Gaawiin, mii sa wa’aw ge-nagashiwed.”
Ani-babimosewaad.
Zhigwa aapiji gaa-ki’aanigoban.*
Ningoding igo owaabamaawa’ zhingishininid.
“E, e, ii, gaawiin ina wiin gigigegoosiimin.*
Ahaaw, Nenabosho, ozhiitaan, gedazhimoosokeyang ga-wi-zhitoomin.”
Aaniish Nenabosho aano-inaabid, gaawiin awiya owaabamaasiin ji-abinid moozoon.
Aaniish mii eta go iw omiskwiiwaagonagaanig weyaabandang.
Aapiji sa dadebisiniiwa’.
Nenabosho ezhi-manaazhided, mii dash imaa ezhaad ayidaag zhingishininid iniw bezhig iniw mahiinganan.
Wegoneniiwinen obapasigonjiwebishkawaan.
“Ajimaajiishta’a! Minik gii-gidaanawe?”
Jaangaakwenowan.
“Geget sa giwaawiisagishkaw, Nenabosho.
Gego izhichigeken, Nenabosho.”
Ganoonaa Nenabosho: “ Bizaanayaan.
Giishpin miinawaa gegoo wii-doodaman, mii iw gaawiin giga-shamigoosii.”
Aatayaa, Nenabosho enigok anokii.
Gaawanabii* ogiizhiikaanaawaa i’iw waa-dazhi-moosokewaad.
Ezhi-ganoonaawaad: “Mii sa iw gii-giizhiitaayaang.”
Bapazigwiiwa’ bimi-izhaawa’ i’imaa gii-apishimoonikewaad.
Zhigwa bezhig zhishigagowewan, mii go iw bezhig i’iw ozagiini* ezhi-miziwe-pangisininig.
Geget maamakaadendam Nenabosho, geget minwendam; wendago bekish nanagamoosiwi, epiichi-minwendang a’aw Nenabosho.
“Ambe sa, agwaawaanaakokedaa.”
Gaawanapii ogii-zhitoonaawaa i’iw agwaawaanaak.
Mii sa bijiinag giizhisekwewaad Nenabosho aapiji sa dewiisini.
Abaapish debikadinig, ezhi-nibaawaad.
Zhigwa waabanini.
Gikizheb igo giigidoowan iniw akiwenzii-mahiinganan: “Mii sa zhigwa ji-gii’akeyaambaan.
Aaniish gaawiin wiikaa awiya nin-ganawaabamigoosii i’iw waa-yakeyaanin.
Indawaa akawe badagwiingweshinog.”
Geget badagwiingweshinowag.
Aaniish Nenabosho gaye wiin badagwiingweshin.
Indigonada* madwe-ganaganjige, inendam Nenabosho.
Wegoneniiwinen bangii odoonji-ganawaabamaan na’idaak odazhi-gagwaadigwandamini iw okan.
Wegoneniiwinen ezhi-pishagwandaminid.
Edawaa! Aapiji i’imaa oshkiizhigong ezhi-pangisininig.
Nenabosho mii sa ezhi-giiwashkweshkaagod.
Anishaa go dakaabaawanind wenji-mikawid.
Gaa-mikawid, ganoonaa: “Nenabosho, ganawaabamiwaamban i’iw akeyaan.”
Mii sa iw miinawaa ezhi-dibikadinig; zhigwa waabanini.
Aapiji gikizheb giigido Nenabosho: “Miijajigwa [Mii sa azhigwa?] wii-akeyaan.
Gaawiin anishaa wiikaa nin-ganawaabamigoo[s]ii i’iw waa-akeyaanin.
Indawaa badagwiingweshinog.”
Aaniish, gakina ezhi-padagwiingweshinowaad, Nenabosho madwewe’ige biigwa’ang iniw okanan.
Aaniish, aapiji bimidikweshinoon iniw akiwenzii-mahiinganan.
Wegoneniiwinen odani-naazikawaan.
Gaa-mamood odookanim, gichi-enigok okweganaaning ezhi-bakite’owaad.
Wendago geget mii iw ezhi-deyaabidaganaamaad.
Geget sa zegiziwag igiw we[y]oosiwaad.
Tawaa! Ezhi-dakaabaawanaawaad.
Geget bangii gegoo inaa mekawinid: “Nenabosho, indawaa mii iw izhi-shkwaataan, ozaam wiijiiwigooyan, anooj igo gidizhiwebis.”
“Gaawiin maanoo go gii-wiijiiwininim!”
“Aaw, Nenabosho, bizaanayan ga-wiijiiwigoo.”
Wayaabaninig gabe-giizhig wiisiniwag.
Zhigwa wenaagoshininig giigidoowan iniw akiwenzii-mahiinganan: “Indawaa sa waabang ga-maajaamin ji-goziyang.”
Aaniish nawaj igo zhiingenimaa.
“Nenabosho, ambe sa, waabang gwii-bakewinigoo.”
“Gaawiin. Ambe sa noo a’aw bezhig nindoozhim ninga-wiijii’ayaawaa [wiijiiwaa] giishpin inendaman.
Gaawiin wiikaa gegoo de-izhiwebizisii.”
“Aaniish naa, Nenabosho, ga-miinin a’aw ni-niijaanis.
Gi-gikenimin manidoowiyan, mii iw waa-onji-miininaan.”