Nenabosho and the Woodpecker (1)
Zhigwa bakadewag aapiji, mii sa ezhi-maajaad Nenabosho.
Zhigwa, miinawaa odishiwe.
Mii sa miinawaa ezhi-nawaad anishinaabe, niizhiwa oniijaanisini.
Gaawiin gegoo waabandamawaasiin; wekwaagaan i’iw endaanid.
“Wegodogwenigish maajiiwaagwen!” inendam.
“Zhigwa, aaniin dash naa iw giige-aasiwang a’aw gibiiwideminaan?”
Mii sa geget zhigwa ozhiitaawan iiniw ininiwan; wawezhi’oowan ogatigwaning, odishishimaani iiniw miskoosaanamanan; miinawaa odoonjibidoonini biiwaabik aapiji gaa-zhi-boodeni.
Aaniish, onisitawinaan eyaawaninig, miinangwana i’iw izhichigewaad iiniw okonaasanwiin(2) zhegonaanid i’imaa oshangwanaaning aaniish megwaa go gii-namadabinid.
Apii gaa-giizhi’onid, baanimaa go wanjinawatinaanid iiniw mitigoon bedakisonid i’imaa endaanid; noondaagosiwan.
“Kokok, kokok!” inwewan.
Aaniish inaabid Nenabosho, memen owaabamaan; zhigwa odanigwekwenibaabamaani iiniw mitigoon.
Zhigo ko odanikojisagawaani; mii go ezhi-gokweninid(3) i’imaa jiigaatig.
Aaniish, biinish igo i’iwidi shpiming ani-ayaawan, abijiinag (abiijinaag) iiniw zhayiigwa maajikwe’igewan.
Mii dash ningoding igo, inikwenininid, esibanan bimibatoowan, mii sa miinawaa bezhig bimibisoowan.
Mii sa niizh gii-nisaad i’iw esibana, baa-izhi-niisaakwashimoononid.
Mii sa ezhi-mamoonid i’imaa gaa-atoonid oshangwanaaning i’iw biiwaabik.
Mii sa ezhi-gabadawind i’iw esibana; zhigwa agwaa’amawaa ji-wiisinid.
Mii sa zhigwa gii-wiisinid, zhigwa ganoonaa; “Aaniish mii sa ge-zhi-kiiwewidawadwaa giniijaanisag minik eshkwanjigeyan,” gii-inaa.
Mii sa miinawaa wanimook, igo imaa gaa-onji-shegoondaginaad miinawaa i’iw ogii-shoode’ona.
Mii sa miinawaa ani-maajaad.
Baanimaa go madwe-piibaagi, “Ay!” medwe’ikidowan.
“Giwanishigaagome!” madwe-ikidowan.
“Aaniish, wegodogwenigish?” ikidowan ininiwan.
Miinangwana gosha geget gaabonid i’iw ogiizhoode’ona.
“Waasa go onji-webinamawik.
Gego wiin i’iwidi beshoshaakegon,” odinaa i’iw oniijaanisa.
“Gaye go debiwebinamaweg mii imaa apii onji-webinamawik,” odinaa i’iw oniijaanisa.
Anishaa geget zhigwa o’ow idash odinaa i’iw oniijaanisa: “Gaawiin ningodinoo gii-ga-bwaa’igosiiwaa.”
Zhigwa sa geget odaanawi-apagidawaawaan, o’ow idash odinaa Nenabosho: “Gego gaawanaagonewebinaawaag.”
Mii dash geget gaa-izhi-miinaawaad.
Aanawi bimaajiba’idiwag iigiw gwiiwizhenshag gaa-izhi-inaad: “Akawe, i’imaa ayaayog!”
O’ow dash odinaa: “Geget isa gibakademwaasa,” odinaa.
“Mii gosha wiini iw bebaadaashiikewaad iigiw giijikiwe’iwaag; mii go bimide bebaa’opagamaaganiwaad bebaadashiikewaad iigiw giijikiweniwaag, i’iw mashkawajibimide.
Ambe sa noo, apii waabang koosiwaa da-bii-izhaa,” odinaa.
Mii sa eni-maajaad.
Degoshing endaawaad, ozhiitaa mitigoon; obadakinaan endaawaad, wekwaagaan ogii-ozhitoon gaye.
Mii dash egod iiniw wiiwan: “Indashke miinawaa gaa-izhi-nawaagwen awiya,” odigoon iiniw wiiwan.
“Amanjig isa, ezhimiwanen gegoo aanawi zhichigeyaanin?” odinaan iiniw wiiwan.
Aaniish, ogii-oninaan gaye iiniw osaanamanan gaye iiniw okanaasanwiin.
Mii sa gii-giizhiitaad zhayiigwa giigidoowa oniijaanisa: “Biiwide!” ikidoowa.
Aaniish mii sa ezhi-piindigaagowaad iiniw biiwiden.
Miingwana dash iiniw memen, aaniish, miiwaniniw dinowan gaa-odisaad.
Zhigwa sa oganoonaan iiniw wiiwan: “Aaniin dash inaa iw ambe, gige-aasiwang a’aw biiwide?” odinaan iiniw wiiwan.
Zhigwa oganoonigoon: “Wegoneshi iw eyaayang gegiige’iweyang?”
Aaniish onishkimigoon iiniw wiiwan.
“Zhayiigwa sa biija’onagoosh a’aw akik,” odinaan iiniw wiiwan.
Mii sa geget a’aw ikwe anagoonaad iiniw odakikoon.
Aaniish, mii sa zhayiigwa waweshi’od Nenabosho, ezhi-miskonang i’iw oshangwan.
Aaniishi, zhigwa, miinawaa oshegwanaan i’iw biiwaabik i’imaa ashangwanaang.
Megwaa sa go namadabid weji-basingwijised nawadinaad iiniw mitigoon gaa-padakinaad; ani-akwaandawed.
Zhayiigwa noondaagozi: “Gokok, gokok, gokok, gokok,” inwe.
Zhayiigwa sa aaniish gaa-izhi-nawaadigo izhichige, zhigwa sa owiipaakwewaan iiniw mitigoon.
Bijiinag aabiding enikwenid, ezhi-padakishkaagod, pane mii igo gii-bimibizo; bangishing pane go gaa-bidigokamigishing.
Aaniish, miskwi oshangwanaang.
Mii sa ekidonid iiniw obiiwidemiwaan: “Aaniinaa iw mayaawibinaasiwaad?” iiniw maawan iiniw ikwewan.
Mii sa geget ezhi-mayaawibinaad a’aw ikwe.
O’ow idash odigoon iiniw biiwidemiwaan: “Odishkonaan maawiin iiniw osaanamanan.
Ambe sa noo biish,: odigoon.
Mii dash geget, ezhi-miinaad, ezhi-miskonamid i’iw ogatigoni.
Miinawaa odibaabandamowaanini gaa-giizhegonang imaa shingwanaang.
Geget, ezhi-wiikobidawaad, ezhi-miinaad iiniw biiwidemiwaan.
Zhigwa sa maadikwe’igewan, esibanan gii-bimibizoowan aazha miinawaa bezhig; mii sa niizh gii-nisaanid, ba-izhi-niisaakoshimoonanid.
Aaniish mii iw zhigwa gii-mikawid Nenabosho odigoon: “Mii iw da-zhi-wiisiniyug giniijaanisag,” odigoon.
Mii sa geget ani-zhi-maajaanid, mii sa naa gii-wiisiniwaad.
Zhigwa, miinawaa odishiwe.
Mii sa miinawaa ezhi-nawaad anishinaabe, niizhiwa oniijaanisini.
Gaawiin gegoo waabandamawaasiin; wekwaagaan i’iw endaanid.
“Wegodogwenigish maajiiwaagwen!” inendam.
“Zhigwa, aaniin dash naa iw giige-aasiwang a’aw gibiiwideminaan?”
Mii sa geget zhigwa ozhiitaawan iiniw ininiwan; wawezhi’oowan ogatigwaning, odishishimaani iiniw miskoosaanamanan; miinawaa odoonjibidoonini biiwaabik aapiji gaa-zhi-boodeni.
Aaniish, onisitawinaan eyaawaninig, miinangwana i’iw izhichigewaad iiniw okonaasanwiin(2) zhegonaanid i’imaa oshangwanaaning aaniish megwaa go gii-namadabinid.
Apii gaa-giizhi’onid, baanimaa go wanjinawatinaanid iiniw mitigoon bedakisonid i’imaa endaanid; noondaagosiwan.
“Kokok, kokok!” inwewan.
Aaniish inaabid Nenabosho, memen owaabamaan; zhigwa odanigwekwenibaabamaani iiniw mitigoon.
Zhigo ko odanikojisagawaani; mii go ezhi-gokweninid(3) i’imaa jiigaatig.
Aaniish, biinish igo i’iwidi shpiming ani-ayaawan, abijiinag (abiijinaag) iiniw zhayiigwa maajikwe’igewan.
Mii dash ningoding igo, inikwenininid, esibanan bimibatoowan, mii sa miinawaa bezhig bimibisoowan.
Mii sa niizh gii-nisaad i’iw esibana, baa-izhi-niisaakwashimoononid.
Mii sa ezhi-mamoonid i’imaa gaa-atoonid oshangwanaaning i’iw biiwaabik.
Mii sa ezhi-gabadawind i’iw esibana; zhigwa agwaa’amawaa ji-wiisinid.
Mii sa zhigwa gii-wiisinid, zhigwa ganoonaa; “Aaniish mii sa ge-zhi-kiiwewidawadwaa giniijaanisag minik eshkwanjigeyan,” gii-inaa.
Mii sa miinawaa wanimook, igo imaa gaa-onji-shegoondaginaad miinawaa i’iw ogii-shoode’ona.
Mii sa miinawaa ani-maajaad.
Baanimaa go madwe-piibaagi, “Ay!” medwe’ikidowan.
“Giwanishigaagome!” madwe-ikidowan.
“Aaniish, wegodogwenigish?” ikidowan ininiwan.
Miinangwana gosha geget gaabonid i’iw ogiizhoode’ona.
“Waasa go onji-webinamawik.
Gego wiin i’iwidi beshoshaakegon,” odinaa i’iw oniijaanisa.
“Gaye go debiwebinamaweg mii imaa apii onji-webinamawik,” odinaa i’iw oniijaanisa.
Anishaa geget zhigwa o’ow idash odinaa i’iw oniijaanisa: “Gaawiin ningodinoo gii-ga-bwaa’igosiiwaa.”
Zhigwa sa geget odaanawi-apagidawaawaan, o’ow idash odinaa Nenabosho: “Gego gaawanaagonewebinaawaag.”
Mii dash geget gaa-izhi-miinaawaad.
Aanawi bimaajiba’idiwag iigiw gwiiwizhenshag gaa-izhi-inaad: “Akawe, i’imaa ayaayog!”
O’ow dash odinaa: “Geget isa gibakademwaasa,” odinaa.
“Mii gosha wiini iw bebaadaashiikewaad iigiw giijikiwe’iwaag; mii go bimide bebaa’opagamaaganiwaad bebaadashiikewaad iigiw giijikiweniwaag, i’iw mashkawajibimide.
Ambe sa noo, apii waabang koosiwaa da-bii-izhaa,” odinaa.
Mii sa eni-maajaad.
Degoshing endaawaad, ozhiitaa mitigoon; obadakinaan endaawaad, wekwaagaan ogii-ozhitoon gaye.
Mii dash egod iiniw wiiwan: “Indashke miinawaa gaa-izhi-nawaagwen awiya,” odigoon iiniw wiiwan.
“Amanjig isa, ezhimiwanen gegoo aanawi zhichigeyaanin?” odinaan iiniw wiiwan.
Aaniish, ogii-oninaan gaye iiniw osaanamanan gaye iiniw okanaasanwiin.
Mii sa gii-giizhiitaad zhayiigwa giigidoowa oniijaanisa: “Biiwide!” ikidoowa.
Aaniish mii sa ezhi-piindigaagowaad iiniw biiwiden.
Miingwana dash iiniw memen, aaniish, miiwaniniw dinowan gaa-odisaad.
Zhigwa sa oganoonaan iiniw wiiwan: “Aaniin dash inaa iw ambe, gige-aasiwang a’aw biiwide?” odinaan iiniw wiiwan.
Zhigwa oganoonigoon: “Wegoneshi iw eyaayang gegiige’iweyang?”
Aaniish onishkimigoon iiniw wiiwan.
“Zhayiigwa sa biija’onagoosh a’aw akik,” odinaan iiniw wiiwan.
Mii sa geget a’aw ikwe anagoonaad iiniw odakikoon.
Aaniish, mii sa zhayiigwa waweshi’od Nenabosho, ezhi-miskonang i’iw oshangwan.
Aaniishi, zhigwa, miinawaa oshegwanaan i’iw biiwaabik i’imaa ashangwanaang.
Megwaa sa go namadabid weji-basingwijised nawadinaad iiniw mitigoon gaa-padakinaad; ani-akwaandawed.
Zhayiigwa noondaagozi: “Gokok, gokok, gokok, gokok,” inwe.
Zhayiigwa sa aaniish gaa-izhi-nawaadigo izhichige, zhigwa sa owiipaakwewaan iiniw mitigoon.
Bijiinag aabiding enikwenid, ezhi-padakishkaagod, pane mii igo gii-bimibizo; bangishing pane go gaa-bidigokamigishing.
Aaniish, miskwi oshangwanaang.
Mii sa ekidonid iiniw obiiwidemiwaan: “Aaniinaa iw mayaawibinaasiwaad?” iiniw maawan iiniw ikwewan.
Mii sa geget ezhi-mayaawibinaad a’aw ikwe.
O’ow idash odigoon iiniw biiwidemiwaan: “Odishkonaan maawiin iiniw osaanamanan.
Ambe sa noo biish,: odigoon.
Mii dash geget, ezhi-miinaad, ezhi-miskonamid i’iw ogatigoni.
Miinawaa odibaabandamowaanini gaa-giizhegonang imaa shingwanaang.
Geget, ezhi-wiikobidawaad, ezhi-miinaad iiniw biiwidemiwaan.
Zhigwa sa maadikwe’igewan, esibanan gii-bimibizoowan aazha miinawaa bezhig; mii sa niizh gii-nisaanid, ba-izhi-niisaakoshimoonanid.
Aaniish mii iw zhigwa gii-mikawid Nenabosho odigoon: “Mii iw da-zhi-wiisiniyug giniijaanisag,” odigoon.
Mii sa geget ani-zhi-maajaanid, mii sa naa gii-wiisiniwaad.